II Xwmtxheej 19:3-4
Nqe cim:
“Yog li ntawd, nej cia li tawm mus qhia txhua haivneeg hauv qab ntuj no, kom lawv los ua kuv cov thwjtim: Nej yuav tsum tuav Vaj Leej Txiv, Vaj Leej Tub thiab Vaj Ntsujplig tus Dawbhuv lub npe, muab lawv ua kevcai raus dej. Thiab qhia kom lawv paub coj raws li txhua yam uas kuv tau qhia rau nej lawm; thiab kuv yuav nrog nraim nej mus txog hnub uas lub ntiajteb no kawg” (Mathais 28:19-20).
Lus nug rau sawvdaws xav:
– Nqe 4 qhia paub Vajntxwv Yehausafas nyob qhov twg?
– Tomqab ntawd, vajntxwv mus qhov twg thiab ua dabtsi?
– Kawm raws Vajntxwv Yehausafas tus qauv, peb ua dabtsi kom coj tau coob leej rov los cuag tus Tswv?
Tomqab uas tau tus Tswv cawmdim hauv txojkev tuag rov los, vajntxwv “ua raws li Vajtswv lub siab nyiam” thiab “nyob hauv lub nroog Yeluxalees” tsis mus pem Xamalis ua raws li nws tus phoojywg tej lus taij thiab lus haub ntxias ntxiv lawm (II Xwmtxheej 18). Vajntxwv nyob hauv qhov chaw uas vajntxwv yuav tsum nyob, rov qab los ua tes haujlwm uas vajntxwv yuav tsum ua. Tus me tub uas tsis mloog leej txiv lus, mus koom cov phoojywg phem sab nraud, sijhawm no tau rov los nyob hauv leej txiv tsev, ua leej txiv haujlwm thiab mloog leej txiv lus. Tomqab ntawd, vajntxwv tawm hauv nroog Yeluxalees mus, tiamsis zaum no yog mus xyuas cov pejxeem txhua qhov txij li Qab teb mus txog Qaum teb, thiab “nqua hu kom cov pejxeem sawvdaws rov los cuag tus Tswv uas yog lawv cov yawgkoob tus Vajtswv”. Tus Tswv tej lus qhuab ntuas dhau ntawm tus cevlus Yehus tau dawj txog vajntxwv lub siab. Vajntxwv totaub thiab paub ntau ntxiv txog tus Tswv txojkev tabncuab, kev hlub thiab kev zam txim. Vajntxwv paub hais tias nws tsis tsimnyog tau tej ntawd tiamsis tus Tswv twb zam txim rau vajntxwv, cawm vajntxwv dim txojkev tuag, pub rau vajntxwv tau rov los txog tsev noj qab nyob zoo. Nimno, los ntawm nplooj siab nco tus Tswv txiajntsig, vajntxwv xav ua tas nws lub zog coj cov pejxeem rov qab los pehawm Vajtswv, tus uas tsimnyog lawv yuav tsum pehawm uas tsis yog mus pe lwm haivneeg tej vajtswv.
Vajluskub tsis qhia paub meej Vajntxwv Yehausafas siv txoj haukev twg coj cov pejxeem los cuag tus Tswv, tsuas paub hais tias vajntxwv tus kheej tawm mus ntag, nws tsis txib lwm tus mus qhuab qhia zoo li thaum ub (II Xwmtxheej 17:7). Qhov ntawd qhia pom hais tias vajntxwv saib hlob qhov uas coj lwm tus rov los cuag tus Tswv. Vajntxwv tso nws kev tau zoo tseg mus txhua qhov hauv lub tebchaws ua tus Tswv tes haujlwm.
Tswv Yexus tso txhua yam tseg vim peb. Nws tso Nws lub zwm txwv Ceeb Tsheej nqis los ntiajteb tiv kev txomnyem, txog qib uas raug tuag txomnyem ntsuav saum tus ntoo khaublig vim peb tej kev txhaum. Peb kuj yuav tsum muaj lub siab zoo li Vajntxwv Yehausafas lub, txaus siab mus rau txhua qhov tus Tswv txib, tso txhua yam rau tomqab mus tshajtawm tus Tswv txojkev hlub, coj coob leej rov los pehawm Vajtswv tus uas tsim txhua yam, tsis hais tsim neeg thiab tsim ntuj tsim teb, tsis txhob pe tej yam uas Vajtswv tsim los. Tej yam zoo uas Vajntxwv Yehausafas tau ua thaum ub tau Vajtswv cim tseg ces tej uas hnub no peb ua coj lwm tus los cuag tus Tswv kuj yuav tau Nws cim tseg thiab ib hnub Nws yuav pub nqi zog rau peb (Mathais 16:27; I Kauleethaus 15:58).
Thov Vajtswv,
Tswv Yexus, nyuam yaus ua Koj tsaug vim Koj tau tuag saum tus ntoo khaublig cawm nyuam yaus dim. Thov pab kom nyuam yaus txaus siab tawm mus tshajtawm Txojmoo Zoo coj ntau tug rov los cuag tus Tswv los ntawm nplooj siab paub nco Koj txiajntsig thiab hlub tshua cov neeg yuav raug kev puastsuaj. Amees.
Peb puas txaus siab tso tseg kev yuav ntsejmuag, lossis tso tus kheej txojsia mus coj lwm tus rov los cuag tus Tswv lawm tau?
Nyeem Vajluskub hauv peb lub xyoo: Malakis 3:7-4:6
Kênh Youtube BHKTHN:
