Klei Aê Diê Blŭ: Y-Êsai 50:4-9
Êlan kliăng: “Grăp aguah Ñu pŏk knga kâo čiăng kơ kâo dôk hmư̆ msĕ si pô hriăm.” (Y-Êsai 50:4b).
Klei êmuh ksiêm mĭn: Si klei khua pô hưn êlâo Y-Êsai kñăm ktang kơ ai tiê mđing hmư̆ leh anăn klei kăp hriăm mơ̆ng Dĭng Buăl Aê Diê? Ya klei hriăm kơ drei mơ̆ng rup bi hmô kơ klei hriăm mơ̆ng Dĭng Buăl anei?
Khua pô hưn êlâo Y-Êsai bi êdah lu snăk kơ Khua Yang Yêsu Pô Bi Mtlaih jing msĕ si Mnuih Dĭng Buăl Yêhôwa. Hlăm kdrêč anei, ñu mñă klă kơ klei ai tiê Khua Yang kăp mđing hnư̆ leh anăn tui hriăm. Čiăng dưi jing sa čô dĭng buăl sĭt suôr leh anăn tŭ dưn, brei pô anăn bi mâo hĕ ai tiê kăp hriăm leh anăn mđing hmư̆ bi nik klei khua ñu čiăng. Tinei, Khua Yang Yêsu bi êdah klei jing sa čô Dĭng Buăl mâo klei bi mguôp suôr tliêr hŏng Khua Ñu, Khua êrâo Ñu mdih grăp aguah ưm kăp mđing hmư̆ klei Khua mtô lač (êlan 4), leh anăn jing sa čô Dĭng Buăl gưt nanao asăp Aê Diê jing Ama, kăp tŭ klei knap mñai čiăng bi leh bruă klam jao leh kơ Ñu (êlan 6). Hlăm jih dŭm thŭn êjai dôk ti lăn ala, Khua Yang Yêsu bi êdah leh klei hdĭp khut khat đup gưt klei Aê Diê Ama čiăng (Y-Yôhan 8:28; 5:30; 11:42). Ñu lui leh kơ drei rup bi hmô sa čô dĭng buăl, pô hriăm sĭt suôr brei drei tui ngă hlue.
Êlan 7-9 brei drei ƀuh boh tŭ mơ̆ng ai tiê mđing hmư̆ jing klei mâo Aê Diê “đru”. Ñu amâo mâo klei “hêñ” leh anăn phung roh amâo jhŏng “kčŭt” amâodah “bi kdơ̆ng” hŏng Ñu ôh. Wăt tơdah Khua Yang Yêsu tŭ klei knap mñai msĕ si klei khua pô hưn êlâo Y-Êsai hưn êlâo leh, ƀiădah Ñu mơak gưt asăp Aê Diê Ama hŏng ai tiê klei mĭn Dĭng Buăl sĭt suôr.
Phung đăo mâo klei Khua Yang Yêsu Pô Bi Mtlaih bi tui hŏng êrah Ñu Pô ti kyâo bi kal, kyuanăn jih jang drei dưi iêu jing “dĭng buăl” amâodah “ƀĭng kna” Khua Yang, snăn brei drei tui hriăm mơ̆ng Ñu rup bi hmô kơ ai tiê kăp hriăm leh anăn mđing hmư̆, đup gưt. Brei drei dôk hlăm klei bi mguôp suôr tliêr hŏng Khua Yang kyuadah klei anăn yơh jing êlan čiăng bi mơak kơ Khua Yang, jing Khua drei. Grăp aguah ưm mdih pĭt brei drei kčưm dơ̆ng hruê mrâo hŏng mmông pioh wah lač leh anăn hriăm Klei Aê Diê Blŭ. Brei drei tui duah klei ktrâo atăt mơ̆ng Khua Yang êlâo hĭn hlăm hruê mrâo drei msĕ si klei mtao Y-Đawit bi knal leh: “Kâo srăng bi hriăm ih leh anăn ktrâo kơ ih êlan ih srăng tui hlue; kâo srăng kčĕ kơ ih hŏng ală kâo dôk dlăng kơ ih.” (Klei Mmuñ Hđăp 32:8).
Mđing hmư̆ leh anăn hriăm Klei Aê Diê Blŭ jing sa klei kpĭ mjuăt kơ klei hdĭp mngăt brei drei ngă bi mưng leh anăn dưm êlâo hĭn hlăm klei hdĭp grăp hruê. Kyua knŏng tơdah mđing hmư̆ Klei Aê Diê Blŭ kơh drei dưi thâo ya klei Ñu čiăng leh anăn hdĭp djŏ tui si klei Ñu kñăm čiăng kơ klei hdĭp drei. Kyua hŏng ai tiê mđing hmư̆ leh anăn kăp hriăm, drei srăng jing dĭng buăl sĭt suôr leh anăn tŭ dưn kơ Khua Yang msĕ si sa čô hđeh hriăm hră gưt ngă hlue klei Nai ñu mtô hŏng jih ai tiê, sĭt nik ñu srăng mâo klei tŭ jing. Mơ̆ng klei anăn, Khua Yang srăng brei klei pap kơ drei thâo yua êlah blŭ klei bi juh, bi mđĭ ai, leh anăn dưi krơ̆ng mnuih mkăn.
Si ngă drei bi mjuăt drei pô hlăm klei mđing hmư̆ leh anăn hriăm Klei Aê Diê Blŭ grăp aguah ưm leh amâodah ka?
Wah lač: Ơ Khua Yang, bi mni lač jăk kơ Khua Yang bi tui leh kâo čiăng kơ kâo dưi jing dĭng buăl Ih. Akâo kơ Ih đru kâo djă pioh klei bi mjuăt kâo pô mđing hmư̆ klei Ih blŭ hŏng ai tiê kăp hriăm Klei Aê Diê Blŭ grăp blư̆ kčưm dơ̆ng sa hruê mrâo.
Dlăng Klei Aê Diê Blŭ hlăm tlâo thŭn: Y-Yôp 2:11-13; 3:1-26; 4:1-11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
