Klei Aê Diê Blŭ: Klei Bi Hriêng 22:12-14
Êlan kliăng: “Ală Yêhôwa mgang klei thâo mĭn, ƀiădah Ñu bi luč klei phung lhiăr blŭ” (Klei Bi Hriêng 22:12).
Klei êmuh ksiêm mĭn: Trăn Klei Aê Diê Blŭ hruê anei lač kơ dua phung, hlei jing phung anăn? Si boh knhal tuč kơ dua phung anei? Si knuih drei tơdah ƀuh phung ƀai mâo klei čăt đĭ, bi phung jăk tuôm hŏng klei knap mñai?
Yêhôwa mgang, răng kriê nanao mnuih thâo mĭn, leh anăn bi luč klei phung lhiăr blŭ. Pruê̆ blŭ “Ală Yêhôwa” lač kơ klei Aê Diê uêñ mĭn, ƀuh jih bruă anak mnuih ngă čiăng mgang phung kpă ênô leh anăn bi kmhal phung jhat ƀai. “Klei thâo mĭn” čiăng lač kơ mnuih thâo mĭn, thâo săng, hdĭp kpă ênô leh anăn huĭ mpŭ kơ Aê Diê, kyuadah “klei huĭ mpŭ kơ Yêhôwa jing klei kčưm kơ klei thâo săng” (Klei Bi Hriêng 1:7). Amâodah lač snei, tơdah sa čô mnuih mă tŭ leh anăn djă pioh Klei Aê Diê Blŭ, pô anăn srăng thâo kral klei thâo mĭn leh anăn djă pioh klei huĭ mpŭ kơ Aê Diê, kyuanăn pô anăn truh kơ klei thâo kral Aê Diê (Klei Bi Hriêng 2:5). Aê Diê mgang klei thâo mĭn leh anăn mgang klei sĭt nik Ñu dôk nanao hlŏng lar.
Ƀiădah Aê Diê srăng bi luč klei phung lhiăr blŭ. Trăn Klei Aê Diê Blŭ anei lač kơ dua phung lhiăr anăn jing, mnuih alah leh anăn mniê knhông (êlan 13-14). Pô čih Klei Bi Hriêng yua klei blŭ mčhưr tơdah lač kơ mnuih alah amâo čiăng kbiă kơ tač mă bruă ôh, kyuanăn ñu duah mčeh klei amâo mâo sĭt ôh jing mâo êmông gu ti êlan. Boh nik gơ̆ amâo mâo êmông gu ôh ti êlan dơ̆ng ƀuôn kjăp phung Israel. Phung alah leh anăn gŏ sang diñu amâo srăng tuôm hŏng klei jŭ jhat kyua êmông gu hơiêk ƀơ̆ng ôh, ƀiădah diñu srăng tuôm hŏng klei ƀun ƀin, knap mñai kyua klei alah diñu.
Ti djiêô anăn, “ƀăng êgei mniê knhông” bi hmô hŏng “ƀăng êlam snăk”, sa klei mplư hlei pô hmư̆ srăng lă leh anăn djiê. Mniê knhông jing sa čô mô̆ amâo dôk sĭt suôr ôh leh anăn ngă soh leh hŏng Aê Diê (Klei Bi Hriêng 5:20). Êgao hĭn kơ anăn, ñu yua ƀăng êgei ñu bi msoh kơ pô mkăn snăn yơh si ngă mniê knhông dưi tlaih mơ̆ng klei Aê Diê bi kmhal?
Lu phung anak čô Aê Diê êdu ai kyuadah ƀuh phung kpă ênô tuôm lu klei knap mñai bi phung ƀai mâo klei čăt đĭ. Mtao Y-Đawit mtă: “Đăm rŭng răng ôh kyua phung ngă ƀai, kăn tluh kơ phung ngă klei soh rei” (Klei Mmuñ Hđăp 37:1), leh anăn ñu klah čŭn ti knhal tuč kdrêč snei: “Klei bi mtlaih phung kpă kbiă hriê mơ̆ng Yêhôwa; Ñu jing anôk đuĕ dăp kơ digơ̆ êjai mâo klei knap mñai” (Klei Mmuñ Hđăp 37:39). Aê Diê Pô bŏ hŏng klei khăp brei mmông myun kơ mnuih soh kmhal kơ klei soh, ƀiădah đăm bi luč mmông myun leh anăn tŭ klei bi kmhal ôh. Măng ai ya klei truh dưn, brei grăp čô drei dôk kjăp, djă pioh nanao klei huĭ mpŭ kơ Aê Diê, đăo sĭt kơ ală Aê Diê amâo tuôm kƀreh mơ̆ng drei ôh, Ñu êbat mbĭt hŏng drei nanao, kăp răng kriê leh anăn đru drei găn jih klei dleh dlan čiăng kơ drei dưi hdĭp kơ Ñu nanao. “Ală Yêhôwa mgang klei thâo mĭn, ƀiădah Ñu bi luč klei phung lhiăr blŭ.”
Si ngă drei đăo kluôm ênŭm kơ Khua Yang čiăng Ñu răng mgang drei kơ klei hdĭp jhat ƀai mơ̆?
Wah lač: Ơ Khua Yang, kâo lač jăk kơ Ih kyuadah Ih răng mgang leh anăn brei klei jăk kơ kâo. Akâo Yang Mngăt Jăk đru kâo weh đuă mơ̆ng klei soh, gưt kơ klei Ih mtă leh anăn dôk kjăp ti anăp jih jang klei truh hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
