Henplais 9:15-22
Nqe cim:
“Twb yog vim li ntawd Yexus Khetos thiaj ua ib txoj kevcai tshiab kom cov neeg uas Vajtswv hu los ua Vajtswv haivneeg lawm tau koob hmoov mus ibtxhis raws li tej lus uas Vajtswv cog tseg. Lawv yeej yuav tau, rau qhov muaj ib tug los tuag theej lawv tej kev txhaum uas lawv ua thaum lawv tseem coj raws li txoj qub kevcai.” (Henplais 9:15).
Lus nug rau sawvdaws xav:
– Vim li cas txoj kev tuag yuav hais mus hais los hauv ntu Vajluskub no?
– Tswv Yexus txoj kev tuag thiab cov tsiaj tua fij sib txawv li cas?
– Tus ntseeg Vajtswv cheemtsum zeem paub yam tseebceeb twg?
Vajluskub qhia paub hais tias, Tswv Yexus txoj kev tuag tsis yog tuag tas li ntawd, tiamsis yog qhib kev kom muaj ntau yam tshiab tshwm tuaj (nqe 15). Yog Tswv Yexus tsis tuag peb yeej tsis muaj txoj sia tshiab, tsis tuag ntxuav tsis tau peb lub siab kom huv, tsis tuag peb yeej ua tsis tau Vajtswv menyuam mus ibtxhis li.
Tus uas sau phau ntawv Henplais muab ntau yam los ua lus sib tim hais. Hauv lo lus Kilis “coglus” kuj muaj lub ntsiab hais tias, “daim ntawv sau tseg faib qubtxeeg qubteg”. Thaum uas hais txog daim ntawv faib qubtxeeg qubteg cov ntseeg Henplais totaub zoo. Tsuas yog thaum tus uas sau daim ntawv ntawd tuag lawm tej lus hauv daim ntawv ntawd thiaj li muaj qab hau rau cov lus hauv (nqe 16-17). Ib yam li ntawd, cia kom txhua nqe lus nyob hauv txoj kevcai muaj nqis mas yuavtsum muaj kev tuag, qhov kev tuag ntawd yog kev tuag ntawm cov tsiaj fij uas muaj nqaij ntuag ntshav nrog “Yog nqaij tsis ntuag ntshav tsis nrog Vajtswv yeej zam tsis tau tibneeg lub txim” (nqe 22b). Kuj zoo ib yam li ntawd, txoj kevcai tshiab muaj nqis yog los ntawm Tswv Yexus txoj kev tuag xwb.
Yog ua cas kev tuag yuav cheemtsum heev npaum ntawd? Vim kev tuag qhia pom qhov tseeb hais tias, Vajtswv dawbhuv kawg nkaus thiab Nws yuav tsis saib sib kev txhaum. Kev txhaum yuavtsum them tus nqi kim kawg nkaus uas yog kev tuag. Hauv txoj kevcai qub, cia kom ib tus tibneeg ua txhaum rov muaj sia ua neej nyob mas tus tsiaj muab fij yuav tsum raug tuag. Vim tibneeg pheej ua txhaum tsis tseg thiaj yuavtsum muaj ntau tus tsiaj fij raug tuag, thiab tibneeg txeev ua li ntawd mus tsis paub xaus. Yog los ntawm Vajtswv kev hlub, Tswv Yexus thiaj los yug ua tibneeg nyob hauv lub ntiajteb no. Yexus ua neej tsis muaj ib qhov txhaum li thiab Nws txaus siab tuag saum ntoo khaublig ua yam khoom fij zoo kawg nkaus theej tibneeg lub txhoj. Yexus ua tib zaug xwb theej tau tibneeg lub txhoj mus ibtxhis li. Tswv Yexus qhib txoj kevcai tshiab rau tibneeg kom lawv tau kev zam txim tas nrho mus ibtxhis.
Niaj hnub nimno peb zoo siab thaum ib tus tibneeg txhaum paub los lees txim, txaus siab ntseeg txais yuav Tswv Yexus ua nws tus Tswv Cawmseej kom tau txais kev cawmdim. Peb ua Tswv Yexus tsaug rau txhua yam uas Nws tau ua pub rau peb dhau los lawm. Tiamsis yog peb tsis paub hais tias, Tswv Yexus txhiv peb kim npaum li cas ces peb txoj kev pehawm thiab kev ua Nws tsaug yeej tsis tas siab. Tus uas raws Tswv Yexus qab, tsis yog tus uas lam ntseeg raws ib yam kev ntseeg twg, tiamsis nws yog tus uas zeem paub Tswv Yexus txoj kev tuag nkaus xwb yog txoj haukev uas pab tau yus dim txim. Yog li ntawd, yuav tsum paub hais tias, Yexus tus uas yog Vajtswv thiab yog Tibneeg, Nws cov ntshav twb tau ntws los lawm, Nws tuag kom pab peb tau txais kev zam txim huv tibsi.
Thov Vajtswv
Nyuam yaus ua Tswv Yexus Koj tsaug uas Koj tau tuag theej nyuam yaus lub txhoj. Koj txaus siab tiv kev mob nkees thiab tuag saum ntoo khaublig kom nyuam yaus tau txais kev zam txim. Nyuam yaus paub hais tias, txoj kev txhaum tus nqi kim kawg. Thov cia nyuam yaus ua lub neej tas siab qhia Koj txoj kev tuag mus txog hnub uas Koj rov qab los. Amees!
Peb puas tau paub meej hais tias Tswv Yexus tuag khwv npaum twg txhiv peb lub txim?
Nyeem Vajluskub hauv peb lub xyoos: Tes Haujlwm 1:1-2:13
Kênh Youtube BHKTHN:
