Klei Aê Diê Blŭ: II Klei Yăl Dliê 20:1-4
Êlan kliăng: “Snăn Y-Jôsaphat huĭ leh anăn čuăn duah Yêhôwa, leh anăn mtă klei kăm ƀơ̆ng huă tar ƀar čar Yuđa. Phung Yuđa bi kƀĭn čiăng duah klei Yêhôwa đru; mơ̆ng jih jang ƀuôn čar Yuđa, diñu hriê čiăng duah Yêhôwa” (II Klei Yăl Dliê 20:3-4)
Klei êmuh ksiêm mĭn: Ya ngă Mtao Jôsaphat huĭ? Hlăm klei huĭ, ya ñu hŏng phung Yuđa ngă? Ya diih ngă tơdah tuôm hŏng klei huĭ?
Trăn Klei Aê Diê Blŭ anei mphŭn hŏng boh blŭ “Leh klei anăn” jing leh Mtao Jôsaphat nao čuă phung ƀuôn sang čiăng ba diñu wĭt kơ Yêhôwa Aê Diê (II Klei Yăl Dliê 19:4) leh anăn ruah mdưm phung khua phat kđi, mbĭt anăn mtô bi hriăm diñu brei phat kđi hŏng“ai tiê huĭ mpŭ kơ Aê Diê”. Drei dưi ƀuh boh tŭ mơ̆ng klei gĭr ktưn ba klei bi mrâo hlăm mngăt Mtao Jôsaphat hŏng knuih ñu pô leh anăn phung ƀuôn sang tơdah tuôm hŏng sa klei truh jhat mrâo. Diñu mâo êpul tlâo djuê ana Môap, Amôn leh anăn phung čư̆ Sêir (II Klei Yăl Dliê 20:22-23), jing sa boh čư̆ hlăm krĭng Êđôm, ti knông lăn nah Dhŭng Yuđa, nao blah.
Mâo mnuih nao hưn hŏng Mtao Jôsaphat “Sa phung lu snăk” (êlan 2) mơ̆ng hang Êa ksĭ nao ti ƀuôn Êngêdi, knŏng kbưi hŏng Yêrusalem mâo pă pluh km tĭng nah Ngŏ Dhŭng. Kyua anăn Mtao Jôsaphat “huĭ” (êlan 3) leh anăn “ amâo thâo ôh ya srăng ngă” (êlan 12). Hrô kơ phưi si čiăng jing mă, brei bi mĭn kơ ya hdră čiăng bi kdơ̆ng phung roh, snăn bruă mtao ngă êlâo hĭn “bi kƀĭn čiăng duah klei Yêhôwa đru” leh anăn iêô mthưr krĭng Yuđa kăm ƀơ̆ng huă. Čiăng wĭt lač klei iêô mthưr anei, phung ƀuôn sang Yuđa bi kƀĭn akâo Aê Diê đru; phung hlăm ƀuôn Yuđa nao duah Yêhôwa Aê Diê sơăi. Jih jang phung ƀuôn sang Aê Diê nao čiăng bi êdah klei sa ai leh anăn jih ai tiê tui duah Aê Diê, hlăm anăn mâo jih jang phung êkei Yuđa dôk dơ̆ng ti anăp Yêhôwa mbĭt hŏng phung anak điêt, phung mô̆, leh anăn phung anak diñu (êlan 13). Klei gĭr bi hriăm leh anăn ba phung ƀuôn sang wĭt kơ Aê Diê mơ̆ng Mtao Jôsaphat mâo leh klei hmăi prŏng kơ klei hdĭp mngăt diñu.
Jing phung Aê Diê yap “ai tiê ih čuăn duah Aê Diê” (II Klei Yăl Dliê 19:3), Mtao Jôsaphat ară anei bi êdah leh ai tiê anei hlăk êjai tuôm hŏng dleh dlan hlăm klei hdĭp. Hrô kơ čŏng êmuh “ya bruă brei pô ngă?”; hrô kơ bi kƀĭn phung khua gĭt gai čiăng êmuh diñu “ya drei srăng ngă”; hrô kơ đăo kơ pô, Mtao Jôsaphat kwưh kơ Aê Diê leh anăn knang kơ Ñu.
Tuôm hŏng dleh dlan hlăm klei hdĭp, drei ăt khăng mâo knuih: lui si ñu čiăng jing mă, amâodah duah pô mkăn đru čiăng knang, amâodah knang hlăm ai ktang pô leh anăn klei thâo mĭn pô čiăng msir mgaih hlue si klei pô čiăng. Knuih drei tơdah drei tuôm hŏng dleh dlan brei ƀuh brei drei tui duah Aê Diê leh anăn đăo knang kơ Ñu mơ̆ amâodah hơăi. Brei tui hriăm msĕ si Mtao Jôsaphat “ai tiê čuăn duah Aê Diê” čiăng akâo kơ Ñu đru.
Drei mđing tui duah Aê Diê leh anăn knang kơ Ñu tơdah tuôm hŏng klei dleh dlan, huĭ hyưt mơ̆?
Wah lač: Ơ Khua Yang, akâo kơ Ih đru kâo hriăm leh anăn hlue si klei bi hmô mơ̆ng Mtao Josaphat tơdah tuôm hŏng klei huĭ hyưt, tui duah nanao Aê Diê leh anăn knang kơ Ñu amâo knang ôh kơ ai ktang pô amâodah knang kơ anak mnuih.
Dlăng Klei Aê Diê Blŭ hlăm tlâo thŭn: Y- Mathiơ 27:57-28:20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
