Henplais 8:1-5
Nqe cim:
“Zaj uas peb tabtom hais no lub ntsiab lus tseemceeb hais tias peb muaj ib tug Povthawj Hlob zoo li ntawd; nws zaum ntawm tus uas muaj hwjchim loj kawg nkaus lub zwmtxwv sab xis saum ntuj ceebtsheej. Nws ua tus povthawj hlob txoj haujlwm hauv Chav uas Dawbhuv Kawg Nkaus uas nyob hauv lub tsevntaub tseemceeb uas yog tus Tswv ua tsis yog neeg ua.” (Henplais 8:1-2).
Lus nug rau sawvdaws xav:
– Yam tseemceeb uas tus sau phau Henplais hais txog nyob hauv xya tshooj xubthawj yog dabtsi?
– Tswv Yexus tabtom ua Tus Povthawj Hlob txoj haujlwm zoo licas?
– Zaj kawm no txhawb peb lub zog licas txog kev pehawm?
Lwm phau nyob hauv Vajluskub Tshiab hais txog Tswv Yexus txoj haujlwm ua Tus Cawmseej, ua Vajntxwv, ua Tus Nyob Nruab Nrab, tiamsis phau Henplais hais mus hais los hais tias Tswv Yexus yog peb tus Povthawj Hlob. Ntawd yog yam tseem ntsiab uas tus sau phau Henplais hais txog thoob plaws hauv xya tshooj xubthawj ntawm nws phau ntawv thiab tseem hais ntxiv hauv tshooj 8 nqe 1, nws hais tias: “Zaj uas peb tabtom hais no lub ntsiab lus tseemceeb hais tias peb muaj ib tug Povthawj Hlob zoo li ntawd.”
Yam tseemceeb tshajplaws ntawm txhua tus neeg Yudais yog yuav ua cas thiaj tau txav los ze Vajtswv, pehawm Nws thiab tau Nws lees yuav. Tiamsis qhov ntawd tsis yooj yim ua. Qhov teebmeem yog peb tibneeg zoo tsis txaus, puv npo kev txhaum, tiamsis Vajtswv ho yog tus zoo kawg nkaus, dawbhuv kawg nkaus. Twb yog vim li ntawd, Mauxes Txojcai thiaj muaj tej kevcai nruj heev rau cov povthawj thaum lawv coj tej khoom thiab tej tsiaj mus fij rau Vajtswv: leejtwg thiaj tau mus cuag tus Tswv, yuav mus txog qhov chaw twg thiab thaum twg thiaj tau mus. Tiamsis Yexus Khetos, uas yog peb tus Povthawj Hlob, Nws “zaum ntawm tus uas muaj hwjchim loj kawg nkaus lub zwmtxwv sab xis saum ntuj ceebtsheej”. Sab xis yog qhov chaw siab tshajplaws, muaj hwjchim tshajplaws, thiab nyob ze Vaj Leej Txiv tshajplaws. Nyob qhov ntawd, Tswv Yexus “ua tus Povthawj Hlob txoj haujlwm hauv Chav uas Dawbhuv Kawg Nkaus uas nyob hauv lub tsevntaub tseemceeb uas yog tus Tswv ua tsis yog neeg ua.” Lub Tsevntaub tau tsa nyob tiam cov Yixalayees khiav tawm hauv tebchaws Iziv los, qhia kom lawv paub hais tias Vajtswv nrog lawv nyob thiab yuav nrog nraim lawv mus rau hauv lub Tebchaws Coglus Tseg. Tiamsis lub Tsevntaub yog tibneeg txhais tes ua xwb, yeej yuav puastsuaj mus, kuj zoo ib yam li tes haujlwm povthawj uas tibneeg ua tseem muaj ntau yam tsis zoo. Tsuas yog Tswv Yexus Khetos, tus uas yog peb tus Povthawj Hlob, thiaj ua tau txoj haujlwm no zoo txaus nkaus.
Muaj Tswv Yexus ua tus Povthawj Hlob, peb muaj kev ntseeg ruaj khov hais tias txawm yog peb yuav nyob lub tsamthawj twg, los peb yeej muaj cuabkav los cuag Vajtswv thiab tau Nws lees yuav. Txawm yog tau tuaj hauv lub tuamtsev zoo nkauj, lossis yuav nyob hauv lub tsev uas muaj tsis txaus txhua yam, lossis txawm yuav nyob hauv tej qhov chaw tsis tau muaj tsev pehawm, tseem raug txwv, raug tsimtxom,… los dhau ntawm Tswv Yexus, peb yeej tseem tau pehawm thiab txaus siab hauv Vajtswv kev nyob nrog nraim txhua hnub.
Thov Vajtswv,
Peb Leej Txiv tus uas nyob saum ntuj, thaum saib rau nyuam yaus lub neej, nyuam yaus ua tsaug rau tej uas Tswv Yexus tau ua, nyuam yaus tau cai los cuag Koj thiab pehawm Koj tus uas kav tagnrho ntiajteb qaum ntuj. Thov pab nyuam yaus nco ntsoov tej no kom nyuam yaus tas siab tas ntsws pehawm thiab zoo siab thaum Koj nrog nraim txhua hnub. Amees.
Puas muaj yam dabtsi lossis lub tsamthawj twg tav peb txojkev los cuag tus Tswv thiab pehawm Nws?
Nyeem Vajluskub hauv peb lub xyoos: Mathais 16:1-17:13
Kênh Youtube BHKTHN:
