Klei Aê Diê Blŭ: Y‑Mathiơ 2:1-12
Êlan kliăng: “Digơ̆ mŭt hlăm sang leh anăn ƀuh hđeh điêt mbĭt hŏng amĭ Ñu, H’Mari. Digơ̆ buôn kkuh kơ hđeh điêt anăn. Leh anăn digơ̆ pŏk ngăn drăp digơ̆, leh anăn myơr kơ hđeh điêt anăn mah, mnơ̆ng ƀâo mngưi, leh anăn êa drao phĭ ƀâo mngưi” (Y‑Mathiơ 2:11)
Klei êmuh ksiêm mĭn: Leh hmư̆ klei hưn arăng kkiêng kơ Khua Yang Yêsu, ya ngă phung knhâo duah Khua Yang? Leh bi tuôm hŏng Khua Yang, ya klei diñu ngă? Hdră kñăm duah Khua Yang, knuih leh anăn mnơ̆ng diñu myơr kơ Hđeh Điêt Doh Jăk mñă kơ drei ya mta klei hlăm yan bi hdơr hruê arăng kkiêng kơ Khua Yang?
Leh arăng kkiêng kơ Khua Yang Yêsu, amâo thâo klă ôh hŏng ya hdră, phung knhâo mơ̆ng čar Ngŏ taih kbưi thâo leh anăn duah êlan nao, hlue si klei diñu lač jing “čiăng kkuh mpŭ kơ Ñu” (êlan 2). Leh thâo arăng kkiêng kơ Ñu ti Betlêhem, diñu “đuĕ nao” duah Khua Yang Yêsu. Leh ƀuh leh, digơ̆ “hơ̆k mơak snăk”, “Digơ̆ buôn kkuh kơ hđeh điêt anăn” (êlan 10-11), msĕ si klei digơ̆ lač leh êlâo anăn. Amâo djŏ knŏng buôn kkuh ôh, digơ̆ lŏ “pŏk ngăn drăp digơ̆, leh anăn myơr kơ hđeh điêt anăn mah, mnơ̆ng ƀâo mngưi, leh anăn êa drao phĭ ƀâo mngưi.” Ya klei hriăm drei mâo mơ̆ng phung knhâo kơ bruă yuôm bhăn hĭn brei ngă hlăm yan bi hdơr hruê Khua Yang trŭn hriê?
Tal sa, leh thâo hđeh điêt mrâo kkiêng, digơ̆ duah Khua Yang, amâo djŏ kyua klei čiăng ksiêm dlăng mơ̆ng phung kreh knhâo ôh. Diñu amâo dlăng Khua Yang Yêsu jing mnuih pioh ksiêm hriăm ôh, ƀiădah jing pô čiăng kkuh mpŭ. Êlâo êdei ăt sa, digơ̆ tui tiŏ klei kñăm anăn. Tal dua, digơ̆ “buôn kkuh” čiăng kkuh mpŭ kơ Khua Yang (êlan 11). Wăt tơdah khua thŭn leh, wăt tơdah kơhưm hlăm ala ƀuôn prŏng hĭn, digơ̆ ăt mâo knuih mpŭ, bi ti gŭ pô luă gŭ ti anăp hđeh điêt. Digơ̆ amâo lač ôh anăn knŏng jing sa čô hđeh anăn ngă knuih amâo mpŭ, tŭ kơ leh sĭt nao kơ Khua Yang Yêsu. Hŏng ya hdră, digơ̆ thâo Khua Yang jing “Mtao Yuđa” (êlan 2), leh anăn digơ̆ mâo knuih năng hŏng kơhưm yuôm bhăn mơ̆ng Hđeh điêt. Tal tlâo, digơ̆ “myơr kơ hđeh điêt anăn mah, mnơ̆ng ƀâo mngưi, leh anăn êa drao phĭ ƀâo mngưi” (êlan 11). Digơ̆ myơr mnơ̆ng yuôm bhăn. Khua Yang “ƀiădah Ñu toh hĕ klei anăn, leh anăn tŭ klei jing sa čô dĭng buăl” ƀiădah bruă klam Ñu klă sĭt jing yuôm bhăn snăk (Philip 2:7). Kyua anăn, Ñu năng dưi mâo klei mpŭ leh anăn ya klei jăk hĭn digơ̆ myơr kơ Khua Yang.
Klei bi hdơr hruê Kkiêng kơ Khua Yang thŭn anei, si mnơ̆ng drei myơr kơ Khua Yang? Mâo mơ̆ tăp năng knŏng jing mnĭt mmông êgah êmăn leh dlăng hla pŏk web, dlăng fim, amâodah mtŭk mtŭl hŏng bruă mă knhal jih thŭn… amâo djŏ jing mnĭt mmông jăk hĭn, mdih leh anăn bŏ hŏng ai ktang. Mnơ̆ng myơr drei mâo ênoh yuôm, amâodah knŏng jing prăk hliê hlăm kdô prăk drei? Sa klei hdĭp doh jăk, êdu êun leh anăn đup gưt, amâodah klei hdĭp amâo doh jăk? Brei hlue si phung knhâo hlăk đưm kơ knuih luă gŭ kkuh mpŭ leh anăn ai tiê myơr klei jăk hĭn hlăm yan Noel thŭn anei.
Brei drei lŏ ksiêm dlăng ai tiê pô mŭt hlăm yan Noel hŏng ai tiê kkuh mpŭ amâodah hŏng ai tiê mơak hlăm knăm mơak?
Wah lač: Ơ Khua Yang Yêsu, akâo kơ Ih brei kâo hdơr kơ bruă brei ngă hĭn hlăm yan Noel jing tui duah leh anăn kkuh mpŭ kơ Ih. Akâo kơ Ih đru kâo myơr kơ Ih dŭm mnơ̆ng mâo ênoh yuôm, năng hŏng Ih jing Mtao leh anăn Khua kơ klei hdĭp kâo.
Dlăng Klei Aê Diê Blŭ hlăm tlâo thŭn: Y‑Yêrêmi 41:11–42:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
