Mathais 2:1-12
Nqe cim:
“Thaum lawv mus rau hauv tsev, lawv pom tus metub thiab Malis uas yog tus metub ntawd niam, lawv txhos caug ntua pehawm tus metub. Lawv thau lawv tej kub, tej tshuaj tsw qab thiab tej roj tsw qab mules hauv lawv cov hnab los pub rau tus metub.” (Mathais 2:11).
Lus nug rau sawvdaws xav:
- Thaum hnov xov Tswv Yexus los yug, cov neeg txawj saib hnubqub tuaj nrhiav Nws muaj homphiaj dabtsi?
- Thaum nrhiav tau Nws, lawv ua li cas?
- Lub homphiaj nrhiav tus Tswv, tus cwjpwm thiab cov khoom lawv fij rau tus Metub Yexus qhia yam dabtsi rau peb rau lub caij ua koobtsheej nco txog Yexus yug?
Thaum Tswv Yexus los yug ua neeg, tsis paub qhov chaw, cov neeg txawj saib hnubqub nyob sab hnubtuaj taug kev tuaj nrhiav, raws li lawv cov lus hais mas yog “tuaj pehawm Nws” (nqe 2). Thaum paub hais tias Yexus yug hauv lub nroog Npelehees, lawv “txawm tawm mus” nrhiav Nws. Thaum nrhiav tau, lawv “zoo siab kawg li”, “txhos caug ntua pehawm tus metub” (nqe 10-11), raws li cov lus lawv hais. Tsis yog lawv pehawm xwb, lawv tseem “thau lawv tej kub, tej tshuaj tsw qab thiab tej roj tsw qab mules hauv lawv cov hnab los pub rau tus metub.” Peb kawm tau dabtsi tseemceeb ntawm cov neeg txawj saib hnubqub, peb cheemtsum ua dabtsi rau tus Tswv lub caij koobtsheej no?
Tim ib, thaum paub tus metub Yexus los yug, lawv tuaj nrhiav Nws, tsis yog vim cov neeg txawj ntse xav nrhiav kom paub. Lawv tsis saib Tswv Yexus yog tus neeg tshawb kom paub ua si, tiamsis yog tus uas tsimnyog pehawm. Lawv nrhiav Nws yog lub homphiaj no. Tim ob, lawv “txhos caug ntua” pehawm Nws (nqe 11). Txawm yog lawv muaj hnubnyoog, txawm yog muaj meejmom siab los lawv muaj tus cwjpwm hwm, txo hwjchim tabmeeg tus Metub Yexus. Lawv tsis suav hais tias Nws yog ib tug menyuam yaus, lam saib dhau kev. Los ntawm ib qho twg, lawv yeej paub Nws yog “cov Yudais tus vajntxwv” (nqe 2), thiab lawv muaj tus cwjpwm tsimnyog rau tus Metub Yexus lub meejmom. Tim peb, lawv “thau lawv tej kub, tej tshuaj tsw qab thiab tej roj tsw qab mules hauv lawv cov hnab los pub rau tus metub.” (nqe 11). Lawv fij tej khoom muaj nqis. Tus Tswv “tso ib puas tsav yam tseg, ua lub neej zoo li ib tug tubqhe” tiamsis Nws yeej yog tus muaj hwjchim loj (Filipis 2:7). Yog li ntawd, Nws tsimnyog tau txais tus cwjpwm saib taus thiab tej uas zoo kawg nkaus fij rau Nws.
Lub koobtsheej nco txog Tswv Yexus yug xyoo no, peb muab tej khoom zoo li cas fij rau tus Tswv? Tej zaug peb tsuas muab tej lub sijhawm nkees nkees tom qab uas peb saib xovtooj, movie, lossis ua haujlwm khwv khwv ib xyoos dhau los… xwb, tsis muab lub sijhawm zoo tshaj plaws, zoo siab thiab muaj dag zog fij rau Nws. Tej khoom peb fij muaj nuj nqis lossis tsuas yog tej nyiaj seem xwb? Fij lub neej dawbhuv, txo hwjchim thiab mloog lus, lossis yog fij lub neej txhaum? Cia li xyaum cov neeg txawj saib hnubqub thaum ub tus cwjpwm txo hwjchim pehawm thiab muaj lub siab fij tej khoom zoo tshaj rau tus Tswv lub koobtsheej xyoo no.
Thov Vajtswv,
Tswv Yexus, thov Koj qhia nyuam yaus nco ntsoov ua tes haujlwm cheemtsum tshaj plaws rau lub koobtsheej xyoo no, yog nrhiav thiab pehawm Koj. Fij yam muaj nqis, tsimnyog rau Koj, vim Koj yog nyuam yaus tus Tswv. Amees.
Peb cheemtsum ua tib zoo tshuaj saib tus kheej, ua koobtsheej los ntawm lub siab pehawm tus Tswv los yog lub siab nyiam lomzem?
Nyeem Vajluskub hauv peb lub xyoos: Yelemis 41:11-42:22
Kênh Youtube BHKTHN:
