II-Kevcai 18:1-8
Nqe cim:
“Cov Levis uas ua povthawj thiab tagnrho xeem Levis tsis muaj feem nrog cov Yixalayees faib av; lawv tsuas tau noj tej uas luag coj tuaj fij thiab tej uas luag zoo siab coj tuaj pub rau tus Tswv xwb.” (II-Kevcai 18:1).
Lus nug rau sawvdaws xav:
- Ntu Vajluskub no qhia kom ua dabtsi rau cov povthawj thiab cov Levis ntawm cov Yixalayees?
- Leejtwg yog lawv teej tug?
- Qhov no txhais tau li cas?
- Peb pab tus neeg ua Vajtswv haujlwm kev noj haus zoo li cas?
Ntu Vajluskub no ntuas qhia rau tus Tswv haivneeg nco ntsoov hais tias cov povthawj thiab cov neeg Levis tsis muaj feem nrog lawv faib av ua noj ua haus zoo li txhua xeem. Lawv yog cov uas tus Tswv xaiv thiab tshwj rau ib cag ua Nws tes haujlwm hauv lub Tuamtsev xws li saib cov pejxeem, qhia kev ntseeg, coj kev pehawm Vajtswv, txiav txim thiab ua lwm yam haujlwm sab ntsujplig. Vim cov povthawj thiab cov Levis ua haujlwm pab Vajtswv haivneeg sab ntsujplig, yog li Nws hais kom txhua xeem pab kev noj haus rau lawv los ntawm qhov muab lawv tej khoom coj tuaj fij rau tus Tswv. Qhov no yog lub ntsiab uas tus Tswv hais tias Nws yog lawv teej tug.
Yog tus Tswv haivneeg tsis muab rau cov povthawj thiab cov Levis noj raws li Nws samhwm, ces lawv yuav mus nrhiav noj rau lwm qhov chaw, thiab qhov no yoojyim ua rau lawv tso haujlwm tseg. Thiab yog ua li ntawd ces txhua yam haujlwm hauv chav dawbhuv tsis muaj leejtwg ua, ces tus Tswv haivneeg yuav tsis muaj neeg pab sab ntsujplig, rau qhov tsuas yog cov povthawj thiaj coj tau khoom, sam roj rau lub teeb, nqa ncuav thiab hmoov tshuaj tsw qab mus fij hauv lub Tuamtsev xwb. Yog li, thaum mus nyob hauv lub tebchaws Vajtswv coglus tseg, Nws haivneeg yuav tsum ncaj ncees fij khoom rau tus Tswv; thiab pab rau cov neeg ua Vajtswv haujlwm kom muaj noj haus txaus, lawv thiaj muaj lub siab tiaj tus ua tiav tus Tswv tes haujlwm.
Cov Pawg Ntseeg tiamno kuj muaj feem xyuam pab kev noj haus rau cov neeg siv sijhawm ua Vajtswv haujlwm, kom lawv muaj lub siab tiaj tus ua haujlwm pab cov ntseeg sab ntsujplig thiab lwm yam haujlwm nyob hauv Pawg Ntseeg. Qhov muaj tseeb nimno cov Pawg Ntseeg loj, me nyob yav toj siab muaj cov kws xibhwb, xibhwb, cov txwjlaug saib xyuas Pawg Ntseeg tseem tu ncua kev noj haus tsis txaus, vim kev ua noj nyob yav toj siab tsis zoo li hauv nroog, yog li txojkev pab, kev fij nyiaj txiag hauv Pawg Ntseeg tseem tsawg heev. Tiamsis ua Vajtswv tsaug, txawm yog lub neej txomnyem los cov ua haujlwm yeej ncaj ncees mus ua haujlwm, txhim kho Pawg Ntseeg thiab qhia Txojmoo Zoo raws li tus Tswv hu, nyob qhov chaw Nws kom lawv nyob. Peb txhua tus yuav tsum nco txog lawv thaum thov Vajtswv, thiab cev tes pab thaum lawv tsis muaj noj haus, kom ua rau lawv muaj lub siab tus ua tiav Vajtswv tes haujlwm.
Thov Vajtswv,
Tus Tswv, ua tsaug uas Koj hu ntau leej fij tus kheej mus ua Koj tes haujlwm, qhia cov ntseeg. Thov Koj pab kom nyuam yaus ncaj ncees fij nyiaj rau Koj, thiab hlub cov neeg ua Koj tes haujlwm. Amees.
Peb puas hlub cov neeg ua Vajtswv haujlwm lawm tau?
Nyeem Vajluskub hauv peb lub xyoos: Yelemis 38:14-39:18
Kênh Youtube BHKTHN:
