Klei Aê Diê Blŭ: Y‑Mathiơ 12:6-8
Êlan kliăng: “Kyuadah Anak Mnuih jing Khua Yang kơ hruê sabat” (Y‑Mathiơ 12:8)
Klei êmuh ksiêm mĭn: Khua Yang Yêsu lač hŏng phung Pharisi Ñu brei dưi mpŭ hĭn kơ ya klei? Ya ngă Khua Yang lač snăn? Ya klei Khua Yang čiăng phung Pharisi thâo? Ya klei Khua Yang čiăng kơ drei sĭt drei kkuh mpŭ kơ Ñu?
Hlăk êjai phung Pharisi duah hdră lač kơ Khua Yang Yêsu leh anăn phung ƀĭng kna ñu kơ klei digơ̆ amâo djă pioh hruê sabat, Khua Yang lač kơ diñu snei “mâo tinei sa čô arăng mpŭ hĭn kơ Sang Kkuh Mpŭ” (êlan 6), Khua Yang čiăng bi êdah kơ Ñu Pô jing Aê Diê Anak. Khua Yang ăt mă hlăm Y‑Ôsê 6:6, “Kyuadah kâo čiăng klei pap, amâo djŏ mnơ̆ng ngă yang, klei thâo kral Aê Diê, amâo djŏ ôh mnơ̆ng myơr čuh” čiăng đru kơ phung Pharisi thâo săng ai tiê Aê Diê thâo pap. Khua Yang čiăng kơ phung ƀuôn sang Ñu djă pioh klei bhiăn Ñu hlăm ai tiê mơ̆ng phung thâo pap brei. Phung Pharisi hlue kjăp klei mĭn hjăn pô hlăm klei bhiăn anăn amâo lŏ mâo klei pap ôh hŏng phung riêng gah. Hlue si Bruă Lêwi 19:9-10 leh anăn Klei Mtô Mñă Klei Bhiăn 23:24-25, phung ƀĭng kna Khua Yang amâo ngă soh klei bhiăn ôh, diñu dưi rač mdiê ƀlê ƀơ̆ng kyua diñu dôk êpa. Khua Yang čang hmăng hruê Sabat ăt jing klei găl bi êdah ai tiê thâo pap bi mđing dlăng hdơ̆ng pô ti krah phung ƀuôn sang Ñu.
Khua Yang Yêsu lŏ lač, “Kyuadah Anak Mnuih jing Khua Yang kơ hruê sabat” (êlan 8). Boh blŭ “Anak Mnuih” amâo djŏ knŏng lač kơ anak mnuih ôh ƀiădah lač kơ Ñu pô, Khua Yang bi êdah Ñu mâo klei dưi hlăm hruê sabat leh anăn knŏng Ñu mâo klei dưi čiăng mblang klei yuôm bhăn mơ̆ng hruê sabat. Hlăm Y‑Markôs 2:27 Khua Yang Yêsu ăt brei thâo, “… Aê Diê mjing hruê sabat pioh kơ mnuih,…” Khua Yang čang hmăng hruê sabat ba klei tŭ dưn hĭn kơ anak mnuih hlăm bruă kơrŭ wĭt asei mlei, mđĭ klei bi mguôp hŏng Khua Yang leh anăn bi êdah klei khăp hdơ̆ng pô.
Hruê anei, drei hdơ̆ng bi mñă kơ klei yuôm bhăn mơ̆ng hrue Sabat, drei ăt lŏ dlăng wĭt knuih pô hŏng ayŏng amai adei sa klei đăo, tăp năng kyua mgang đei klei mĭn pô, drei kƀah klei pap leh anăn amâo bi êdah ôh klei khăp hŏng ayŏng amai adei pô. Năng ai digơ̆ dôk êpa, amâodah dôk tuôm hŏng klei rŭng răng hlăm klei hdĭp, amâodah digơ̆ dôk mâo klei amâo thâo bi djŏ hlăm sang kkuh mpŭ… anăn digơ̆ amâo mơak ôh nao kkuh mpŭ kơ Aê Diê. Khua Yang čang hmăng phung nao kkuh mpŭ kơ Ñu brei bi êdah klei khăp, klei mđing dlăng leh anăn klei thâo bi pap hdơ̆ng pô. Brei mâo ai tiê mơ̆ng phung ƀuôn sang Aê Diê ênuk Y‑Nêhêmi leh kkuh mpŭ kơ Aê Diê, “Leh anăn Y‑Êsra lač kơ digơ̆, “Nao bĕ diih ƀơ̆ng mnơ̆ng prăi êmă, leh anăn mnăm êa kpiê mmih, leh anăn mơĭt sa kdrêč mnơ̆ng anăn kơ pô amâo mkra ôh; kyuadah hruê anei jing doh jăk kơ Yêhôwa drei. Leh anăn đăm ênguôt ôh, kyuadah klei hơ̆k mơak Yêhôwa jing klei ktang diih” (Y‑Nêhêmi 8:10).
Drei thâo săng hruê kkuh mpŭ kơ Khua Yang ăt jing klei găl bi êdah klei pap leh anăn blŭ tlao thâo pap kơ ayŏng amai adei sa klei đăo mơ̆?
Wah lač: Ơ Khua Yang, akâo kơ Ih đru kâo amâo khăng đei ai tiê pô ôh hlăm klei hdĭp ƀiădah mâo klei thâo mđing dlăng leh anăn klei khăp čiăng kâo dưi đru ayŏng amai adei hlăm klei đăo hrăm mbĭt mơak kkuh mpŭ kơ Ih.
Dlăng Klei Aê Diê Blŭ hlăm tlâo thŭn: Y‑Yêrêmi 36
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
