Klei Aê Diê Blŭ: Klei Bi Hriêng 11:24-25
Êlan kliăng: “Sa čô kmah srăng đĭ mdrŏng hĭn” (Klei Bi Hriêng 11:25a)
Klei êmuh ksiêm mĭn: Ya klei dua êlan Klei Bi Hriêng čiăng lač kơ boh sĭt hlăm klei hdĭp? Ya mta Klei Aê Diê Blŭ kñăm kơ klei hdĭp sa čô mâo ai tiê kmah? Si klei drei bi knal kơ klei đĭ mdrŏng mơ̆ng klei kmah?
Ktuê răk Klei Aê Diê Blŭ dơ̆ng mơ̆ng Klei Bi Mguôp Hđăp truh kơ Klei Bi Mguôp Mrâo, drei ƀuh nanao Klei Aê Diê Blŭ bi mđĭ ai phung anak ƀuôn sang Ñu brei thâo myơr leh anăn đru arăng hŏng klei kmah. Dua êlan Klei Bi Hriêng drei răk hruê anei hưn mdah sa klei sĭt msĕ si bi mklăk hŏng lu mnuih. Anăn jing hlei pô mâo ai tiê kmah, srăng lŏ mâo lu hĭn, bi hlei pô čuôt klih đei srăng jing kƀah (êlan 24). Hlăm klei hdĭp ƀuôn sang hruê anei, lu mnuih knŏng kuan pioh kơ pô đuč yơh, amâo čiăng brei kơ arăng ôh. Diñu huĭdah thiê brei srăng luč liê. Ƀiădah tinei, Klei Aê Diê Blŭ lač klă klei sĭt nik jing bi klăk wĭt: knư̆ thiê brei hŏng klei kmah knư̆ lŏ mâo lu hĭn êjai. Khua ƀĭng kna Y‑Pôl lŏ mñă mơh klei blŭ Khua Yang Yêsu mtô snei: “Brei kơ arăng jing jăk mơak hĭn kơ mă tŭ” (Bruă Phung Khua Ƀĭng kna 20:35). Pô mă tŭ khăng ƀuh kơ ñu mâo klei jăk mơak, ƀiădah pô thiê brei ƀuh kơ ñu pô mâo klei jăk jĭn lu hĭn. Kdlưn hĭn mơh, pô mâo klei bi mtlaih brei ngă bruă jăk kơ arăng kyuadah anăn yơh jing klei Khua Yang čiăng, čuăn leh êlâo kơ drei (Êphêsô 2:10). Kyua klei anăn yơh Klei Aê Diê Blŭ mtă mtăn nanao kơ drei brei myơr leh anăn thiê brei hŏng klei kmah.
Êlan Klei Bi Hriêng tui tluôn lač klă: “Sa čô kmah srăng đĭ mdrŏng hĭn, leh anăn hlei pô đru arăng, arăng srăng đru ñu msĕ mơh” (êlan 25). Sa čô thiê brei kơ arăng hŏng klei kmah Aê Diê srăng brei thiăm kơ ñu lu hĭn čiăng kơ ñu dưi lŏ đru arăng lu êbeh hĭn. Lŏ sa blư̆, pô čih hră Y‑Salômôn bi mđĭ ai tiê kmah. Êlan hdră anei ăt jing klei Khua Yang Yêsu (Y‑Luk 6:38) leh anăn Khua ƀĭng kna Y‑Pôl mtô mtă mơh (II Kôrantô 9:6-7). Aê Diê srăng mơak snăk tơdah drei hdĭp thâo khăp, thâo đru arăng hŏng mnơ̆ng wăt hŏng klei uêñ mĭn (Y‑Mathiơ 5:16; Y‑Yôhan 13:34-35; I Y‑Yôhan 3:17-18).
Thiê brei jing hdră êlan drei pŏk klei myun čiăng ba klei jăk jĭn mơ̆ng Aê Diê kơ arăng leh anăn wăt drei pô ăt srăng mâo klei jăk jĭn mơh. Tơdah drei čuăn čiăng jing pô Aê Diê tiŏ nao kăp đru arăng leh anăn khăp kơ arăng, jing drei dôk hdĭp djŏ hŏng klei Khua Yang kñăm dưm kơ drei yơh. Drei mâo klei Khua Yang rơ̆ng srăng dưi mă tŭ klei mưn tơdah drei ngă klei jăk kơ jih jang mnuih (Y‑Mathiơ 10:42). Boh sĭt hlăm klei hdĭp, drei ƀuh phung mâo ai tiê kmah mâo nanao klei đĭ kyar hlăm mnơ̆ng mnuă wăt hlăm klei bi mguôp. Diñu khăng mâo klei đru mơ̆ng pô mkăn tơdah tuôm hŏng klei dleh truh, bi mklăk wĭt, phung knan knăk, čuôt klih arăng kreh wơr bĭt. Brei drei mâo ai tiê kmah hlăm klei myơr leh anăn đru arăng, čiăng kơ jih jang drei dưi dưn klei jăk jĭn Aê Diê brei.
Si ngă drei hmiêt mkăp jing sa čô kmah hlăm klei myơr leh anăn đru arăng mơ̆, čiăng dưi mă tŭ klei jăk jĭn êbeh dlai mơ̆ng Khua Yang?
Wah lač: Ơ Khua Yang, bi mni kơ Ih kyuadah jih jang djăp mta mnơ̆ng kâo mâo jing mơ̆ng Khua Yang brei sơăi. Akâo Khua Yang đru kâo bi mđĭ ai tiê kmah kơ bruă Khua Yang leh anăn hmiêt mkăp myơr, thiê brei kơ arăng hŏng klei kmah.
Dlăng Klei Aê Diê Blŭ hlăm tlâo thŭn: Y‑Yêrêmi 25:32–26:24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
