II Xwmtxheej 16:1-9
Nqe cim:
“Tus Tswv yeej saib ntsoov lub ntiajteb no thiab yuav txhawb cov uas muab siab npuab nws. Vim koj tau ua tej yam uas ruam kawg nkaus, yog li ntawd, txij no mus koj lub tebchaws yuav ua tsov ua rog mus li” (II Xwmtxheej 16:9a).
Lus nug rau sawvdaws xav:
- Thaum raug vajntxwv Npa-asas uas kav tebchaws Yixalayees tuaj tua, vajntxwv Axas tau ua dabtsi?
- Lub tswvyim ntawd ua tau zoo licas?
- Vim licas tus cevlus Hananis thiaj hais tias qhov uas vajntxwv ua yog ruam kawg nkaus?
- Vajntxwv raug poob yam koobhmoov dabtsi?
- Thaum ntsib kev txomnyem, peb yuav tsum ua dabtsi thiaj tiv dhau?
Tomqab nees nkaum lub xyoo nyob thajyeeb tiaj tus, rov qab muaj kev tsov rog dua. Vajntxwv Npa-asas uas kav tebchaws Yixalayees txhij tubrog tuaj tua tebchaws Yudas thiab tsim lub nroog Lamas ua chaw txiav kev tsis pub cov Yudas mus los. Vajntxwv Axas mus rau hauv lub Tuamtsev, tsimnyog tuaj taij thov tus Tswv, tiamsis vajntxwv ho tuaj nqa tej kub uas seem hauv lub Tuamtsev coj mus xiab vajntxwv Xilias thiab thov cog phoojywg. Vajntxwv Xilias pom zoo tuaj tua tebchaws Yixalayees, txeeb tau qee lub nroog tseemceeb. Vajntxwv Npa-asas thiaj raug thim tawm hauv Lamas rov qab mus tiv thaiv nws lub tebchaws.
Raws li tibneeg xav, vajntxwv Axas lub tswvyim cuag li ua tiav zoo lawm. Tiamsis tus Tswv txib tus cevlus Hananis tuaj cem vajntxwv Axas tsis muaj kev cia siab rau tus Tswv, ho mus cia siab rau vajntxwv Xilias. Yog cia siab rau tus Tswv, ces vajntxwv Axas yeej yuav kovyeej vajntxwv Xilias huv tibsi. Tus cevlus Hananis rov hais txog tej uas tus Tswv tau ua dhau los, Nws twb pub rau vajntxwv kovyeej cov Iziv thiab cov Linpias uas muaj tubrog coob thiab muaj zog (nqe 8). Yog hais tias vajntxwv “muab siab npuab” tus Tswv, ces Nws yuav txhawb vajntxwv zog thiab pub kom muaj yeej. Tus Tswv lub qhovmuag saib ntsoov lub ntiajteb no tsis seem ib tug twg uas “muab siab npuab Nws”. Tus Tswv yog Vajtswv tus uas paub neeg lub siab thiab thaum peb nrhiav Nws kawg siab kawg ntsws, ces yuav tau ntsib Nws. Vim vajntxwv “tau ua tej yam uas ruam kawg nkaus”, yog li ntawd txij no mus vajntxwv lub tebchaws yuav muaj kev tsov rog, tsis thajyeeb mus li.
Nyob rau caijnyoog muaj ntau kev kub ntxhov zoo li tiam no, yoojyim ua rau peb tsis muab siab npuab tus Tswv, tsuas cia siab rau tus kheej lossis lwm tus tibneeg thiab lwm yam lawm xwb. Thaum ua li ntawd peb xav hais tias yog peb muaj tswvyim tiamsis qhov tseeb yog ruam kawg li. Vajntxwv Axas yav tas los yeej yog ib tug uas cia siab ntsoov rau tus Tswv thaum ntsib teebmeem thiab tau tus Tswv pab cawm. Thaum laus, tsimnyog nws muaj tswvyim tuaj tiamsis nws ho ruam mus lawm. Nws tsis muab siab npuab, tsis taij thov, tsis nrhiav, tsis cia siab rau tus Tswv lawm. Tej zaum yog vim nws txhawj ntshai thaum yeebncuab tuaj ze lub nroog Yeluxalees. Peb los ib yam nkaus li ntawd, yog tsis nrhiav tus Tswv kom kawg, tsis cia siab rau Nws, ces yuav ua rau peb tsis muab siab npuab tus Tswv thaum muaj kev txhawj ntshai.
Tus Tswv lub qhovmuag tabtom saib ntsoov lub ntiajteb, Nws pom txhua yam nyob hauv peb lub siab nyob txhua tsamthawj. Cia li nco txog tej uas tus Tswv tau ua rau peb, thiab yeej meem cia siab rau Nws mus ntxiv, yog tsis ua li ntawd, peb yuav raug poob txojkev thajyeeb.
Thov Vajtswv
Tus Tswv, txawm yuav ntsib kev txomnyem, los thov pab nyuam yaus muab siab npuab Koj, nco ntsoov ua Koj tsaug rau tej yam Koj tau pub dhau los, thiab cia siab ntxiv rau Koj los ntawm kev ntseeg hais tias Koj yuav nyob nrog thiab foom koobhmoov rau nyuam yaus. Amees.
Peb puas muab siab npuab Tus Tswv txhua lub tsamthawj lawm tau?
Nyeem Vajluskub hauv peb lub xyoos: Yaxayas 51:4-23
Kênh Youtube BHKTHN:
