Klei Aê Diê Blŭ: II Klei Yăl Dliê 16:1‑9
Êlan kliăng: “Kyuadah ală Yêhôwa dlăng tar ƀar lăn ala čiăng bi êdah klei ktang ñu tĭng kơ phung mâo ai tiê arăng amâo dưi ƀuah ôh ti anăp Yêhôwa” (II Klei Yăl Dliê 16:9a).
Klei êmuh ksiêm mĭn: Hlăk Y‑Baêsa mtao Israel đĭ bi blah snăn si Mtao Y‑Asa ngă? Si klei tŭ dưn hdră kčah anăn? Ya ngă pô thâo bi ƀuh Y‑Hanani lač bruă mtao ngă jing mluk? Ya klei hơêč hmưi mtao bi luč leh? Sĭt tuôm hŏng klei dleh dlan brei drei ngă ya mta čiăng dưi hgao?
Leh hlăm brô dua pluh thŭn hdĭp hlăm klei êđăp ênang, ară anei lŏ mâo klei bi blah. Y‑Baêsa Mtao Israel ba lĭng kahan nao blah Yuđa leh anăn mkŏ mjing ƀuôn Rama bi kjăp čiăng amâo mâo ôh hlei pô dưi mŭt hlăm Yuđa. Mtao Y‑Asa nao hlăm Sang Yang, ƀiădah hrô kơ nao wah lač hŏng Aê Diê, Mtao Asa lŏ nao mă mah mơ̆ng hjiê hlăm Sang Yang ba sun ngăn leh anăn akâo bi hgŭm hŏng Mtao Syria. Mtao Syria tŭ ư nao blah Israel, mâo mă dŭm ƀuôn prŏng yuôm bhăn. Mtao Baêsa kbiă mơ̆ng ƀuôn Rama čiăng răng mgang lăn čar pô.
Hdră kčah mơ̆ng Mtao Y‑Asa msĕ si tŭ jing hlue si klei mĭn anak mnuih. Khădah snăn Aê Diê tiŏ nao pô thâo bi ƀuh Y‑Hanani nao ƀuah Mtao Asa knang leh kơ mtao Syria hrô kơ knang kơ Aê Diê. Tơdah knang kơ Ñu, klă sĭt Mtao Asa dưi leh hŏng wăt mtao Syria. Y‑Hanani lŏ mñă wĭt ya bruă Aê Diê ngă leh, Ñu tuôm brei kơ mtao dưi hĭn hŏng Êjip leh anăn Libi, hlăk jing phung lĭng kahan lu leh anăn ktang (êlan 8). Tơdah mtao amâo “knang kơ Yêhôwa Aê Diê” snăn Ñu srăng đru leh anăn brei kơ ñu mâo klei dưi. Ală Yêhôwa dlăng tar lăn ala srăng amâo lui ôh hlei pô mâo “ai tiê knang”. Ñu jing Aê Diê thâo ƀuh jih ai tiê mnuih leh anăn sĭt drei lŏ dơ̆ng tui duah Ñu snăn srăng dưi bi tuôm nanao hŏng Ñu. Kyua mtao “ngă klei mluk” anăn mơ̆ng ară anei kơ anăp ala mtao ñu srăng luč klei êđăp ênang.
Hdĭp ti krah ênuk bŏ hŏng dleh dlan ară anei, drei ăt srăng ênưih bi luč ai tiê sĭt suôr hŏng Aê Diê, đăo kơ pô amâodah kơ pô mkăn, klei mkăn hrô kơ knang kơ Aê Diê. Sĭt ngă snăn drei mĭn drei thâo mĭn ƀiădah jing mluk snăk. Mtao Asa tuôm jing sa čô mnuih knang kơ Aê Diê sĭt tuôm hŏng klei dleh dlan leh anăn Aê Diê đru. Truh kơ mduôn, hrô kơ thâo mĭn hĭn snăn ñu lŏ mluk hĭn. Ñu amâo djă pioh ôh ai tiê sĭt suôr hŏng Aê Diê, amâo wah lač, tui duah Aê Diê, knang kơ Ñu. Năng ai kyua ñu huĭ đei leh ƀuh phung roh nao giăm Yêrusalem. Drei snăn mơh, tơdah amâo lŏ dơ̆ng tui duah Aê Diê, đăo knang kơ Ñu snăn drei ăt kyua klei huĭ hyưt amâodah rŭng răng bi luč ai tiê sĭt suôr hŏng Ñu.
Ală Aê Diê dlăng tar lăn ala, Ñu ƀuh ai tiê grăp čô drei hlăm djăp boh klei. Brei drei lŏ hdơr ya klei Ñu ngă leh leh anăn lŏ dơ̆ng knang kơ Ñu, tơdah amâo ngă snăn, drei srăng bi luč klei êđăp ênang.
Drei djă pioh ai tiê sĭt suôr hŏng Aê Diê hlăm djăp boh klei mơ̆?
Wah lač: Ơ Khua Yang, wăt tơdah dleh dlan, akâo kơ Ih brei kơ kâo dưi djă pioh ai tiê sĭt suôr hŏng Ih, thâo hdơr knga kơ Ih kơ ya bruă Ih brei leh, leh anăn lŏ dơ̆ng knang kơ Ih hŏng ai tiê đăo kjăp Ih ăt dôk mbĭt leh anăn brei kơ kâo.
Dlăng klei Aê Diê Blŭ hlăm tlâo thŭn:Y‑Êsai 51:4‑23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
