Mathais 11:16-19
Nqe cim:
“Thaum luag thuam nej thiab tsimtxom nej, vim nej yog kuv cov thwjtim, nej tau koob hmoov” (Mathais 5:11).
Lus nug rau sawvdaws xav:
- Tswv Yexus muab cov Yixalayees tiam ntawd piv rau leejtwg?
- Vim licas Nws piv li ntawd?
- Lub homphiaj uas luag thuam lossis iab hiam rau Yauhas Naptitaus thiab Tswv Yexus yog dabtsi?
- Tsimnyog peb yuav tsum muaj tus cwjpwm thiab kev xav licas thaum ntsib tej kev tawmtsam zoo li ntawd?
Tswv Yexus muab cov Yixalayees nyob rau Nws tiam piv li tej menyuam uas tabtom ua si tom tshavpuam, lawv muaj lub siab dawb tiamsis qee zaus kuj muaj kev sib cav, ntawd yog thaum muaj ib pab xav tej kev ua si zoo siab tiamsis lwm pab ho xav tej kev ua si nyuaj siab. Lawv sib cav, sib chim thiab ua rau zej zog hnov toog ntsej.
Cov Yixalayees nyob rau Tswv Yexus tiam tau tawmtsam txhua tus uas cem thiab taw qhia qhov tseeb rau lawv. Lawv khav txog lawv tej kevcai uas poj koob yawm txwv qhia ua thiab siv txoj kevcai zoo li cuabyeej pab kom lawv muaj hwjchim. Lawv thuam hais tias Yauhas Npatitaus raug dab vim pom nws “ua kevcai yoo mov thiab nws tsis haus cawv txiv hmab”, peb paub hais tias Yauhas Npatitaus nyob tom roob moj sab qhua, nws pheej yoo mov thiab tsuas noj kooj thiab haus zib ntab xwb (Mathais 3:4). Thaum Tswv Yexus nrog cov neeg raug sawvdaws txav deb nyob ua ke, ces lawv thuam hais tias Nws “noj loj haus loj,… nrog cov neeg uas sau se thiab cov neeg txhaum ua phoojywg!” Lub homphiaj ntawm lawv tej lus thuam thiab iab hiam yog los zais lawv tej kev phem vim Yauhas Npatitaus thiab Tswv Yexus tau cem txog lawv lubneej thiab lawv tej kev txhaum, lawv thiaj xav txo Yauhas Npatitaus thiab Tswv Yexus kom poob qis. Tes haujlwm ntawm cov xibhwb qhia Vajtswv txoj kevcai thiab cov Falixais tsis txawv cov menyuam yaus, vim tus neeg hlob tiav thiab muaj tswvyim yuav tsis ua tej yam zoo li ntawd.
Niaj hnub nimno, peb kuj pheej ntsib tej lus thuam, lus iab hiam ntawm cov neeg uas tsis xav mloog qhia txog kev txhaum, kev lees txim thiab txojsia ibtxhis. Ntau zaug ua rau peb nyuaj siab, chim siab thiab xav ua pauj; tiamsis, tus Tswv xav kom peb yeej meem ua lubneej ncaj ncees qhia tshwm Vajtswv qhov tseeb los ntawm peb tes haujlwm txhua hnub. Peb tsis tas yuav hais daws lossis sib cav txog peb lubneej tiamsis yeej meem ua lubneej raws nraim li tej uas tus Tswv qhia, ntawd thiaj yog yam tsimnyog ua ntawm cov neeg tau txais qhov tseeb thiab loj hlob hauv qhov tseeb. Yuav tsum nco Tswv Yexus tej lus uas qhia hais tias, thaum peb ua lubneej pub rau tus Tswv tiamsis raug lwm tus thuam, tsimtxom, iab hiam, ces peb cia li zoo siab vim paub hais tias peb tabtom tau tus Tswv tej koobhmoov (Mathais 5:11-12).
Thov Vajtswv
Tus Tswv, thov pab kom nyuam yaus txhob txhawj ntshai thaum raug luag thuam thiab iab hiam vim qhia txog Koj lub npe. Thov pab nyuam yaus saib ntsoov Koj thiaj ua tau lubneej zoo raws li Koj lub siab nyiam. Amees.
Peb puas paub ua tej yam tsimnyog raws li tus Tswv qhia thaum raug luag thuam, iab hiam thiab tsimtxom lawm tau?
Nyeem Vajluskub hauv peb lub xyoos: Yaxayas 42:10-43:7
