Mathais 11:12-15
Nqe cim:
“Nws yuav muaj tswvyim thiab muaj hwjchim ib yam li Eliyas tus uas cev Vajtswv lus, nws yuav ua tus Tswv ntej mus ua kom tej txiv tub rov sib haum; nws yuav ua kom cov neeg uas tawvncauj hloov ua neeg ncaj ncees; thiab nws yuav npaj ib cov neeg rau tus Tswv” (Lukas 1:17).
Lus nug rau sawvdaws xav:
- Tswv Yexus hais tias txij thaum Yauhas Npatitaus pib ua haujlwm muaj yam dabtsi tshwmsim rau Ntuj Ceebtsheej?
- Vim licas Nws hais li ntawd?
- Tus Tswv hais txog Yauhas Npatitaus lub suab npe licas?
- Txij thaum txais yuav Tswv Yexus, peb lub suab npe rau cov neeg ibncig zoo licas?
Tswv Yexus siv nqe lus “muaj cov neeg uas tawmtsam qhov uas neeg mus Ntuj Ceebtsheej” los piav txog lub suab npe ntawm Yauhas Npatitaus tes haujlwm. Yauhas tej lus qhia txog Tebchaws Ceebtsheej raug cov Falixais thiab cov Xadukais tawmtsam, rau qhov Yauhas qhia cem hais tias lawv yog cov neeg ncauj lus zoo siab phem, nws muab lawv hu ua “cov niag nab” (Mathais 3:7). Qhov kawg nkaus ntawm kev tawmtsam, yog Yauhas Npatitaus raug vajntxwv Helauj Atipas ntes mus kaw hauv tsev lojcuj vim Yauhas qhia cem txog vajntxwv tej kev txhaum. Txawm yog raug tawmtsam, los Tebchaws Ceebtsheej yim hnub yim nthuav dav. Txij thaum Yauhas Npatitaus pib ua haujlwm, los txog thaum Tswv Yexus hais tej lus no, ces twb muaj ntau tus neeg lees txim thiab tso kev txhaum tseg txais yuav Tebchaws Ceebtsheej lawm.
Yauhas Npatitaus tshwmsim raws li sijhawm tus Tswv teem tseg, thiab nws ua tiav lub luag haujlwm Vajtswv txib, uas yog kho kev rau Tswv Yexus. Nws tes haujlwm muab piv zoo ib yam li tus cevlus Eliyas tes haujlwm, txawm yog ntsib kev tawmtsam, tsimtxom txhua qhov, los tus cevlus Eliyas yeej coj tau cov pejxeem tig rov los lees yuav Vajtswv. Yauhas Npatitaus hais tias nws tsis yog tus cevlus Eliyas (Yauhas 1:21), tiamsis nws lub suab npe hauv kev ua haujlwm tau Tswv Yexus muab piv zoo li tus cevlus Eliyas (nqe 14).
Nyob hauv lub meejmom yog tus Tswv cov menyuam, cov ntseeg niaj hnub nimno kuj yog Tebchaws Ceebtsheej tus tubtxib ua haujlwm rau Tswv Yexus. Muaj ib lo lus nug rau peb hais tias, peb puas muaj suab npe zoo nyob ntawm qhov chaw tus Tswv cia peb nyob thiab peb puas ua tiav zoo lub luag haujlwm uas tus Tswv muab cob lawm tau? Yuav tsum zeem paub hais tias, tus Tswv yog tus pub rau peb tau tshwmsim los ua neej thiab pub rau peb tau ua tubtxib rau Tebchaws Ceebtsheej. Peb yuav tsum paub hais tias, peb yuav ntsib kev tawmtsam thiab kev tsimtxom thaum tshajtawm txog Tebchaws Ceebtsheej, tiamsis peb kuj yuav tsum xam pom hais tias tsis muaj leejtwg lossis lub hwjchim twg yuav kovyeej Tebchaws Ceebtsheej, peb thiaj yuav muaj lub siab tawv ua tiav lub luag haujlwm uas tus Tswv muab rau peb ua. Tswv Yexus hais tias “leejtwg muaj pobntseg cia li mloog!” Yog cov uas muaj pobntseg sab ntsujplig, thov tus Tswv pab kom peb hnov tau Nws lub suab hu, ua tubtxib rau Nws nyob qhov chaw uas Nws cia peb nyob.
Thov Vajtswv
Tus Tswv, thov Koj siv nyuamyaus lubneej ua Koj ib tug tubtxib. Txawm yuav ntsib kev txomnyem, raug tsimtxom, los thov Koj pub rau nyuam yaus muaj lub siab npuab Koj, tshajtawm txog Tebchaws Ceebtsheej rau lwm tus paub. Amees.
Peb tabtom ua neej muaj suab npe licas rau cov neeg uas tus Tswv cia nyob ibncig ntawm peb?
Nyeem Vajluskub hauv peb lub xyoos: Yaxayas 41:17-42:9
Kênh Youtube BHKTHN:
