Klei Aê Diê Blŭ: I Bruă Mtao 20:26‑34
Êlan kliăng: “Leh anăn ñu lač kơ mtao, “Snei Yêhôwa lač, ‘Kyuadah ih phưi hĕ mơ̆ng kngan ih mnuih Kâo jao leh kơ klei bi rai, snăn klei hdĭp ih srăng hrô klei hdĭp ñu, leh anăn klei hdĭp phung ƀuôn sang ih hrô klei hdĭp phung ƀuôn sang ñu.’” (I Bruă Mtao 20:42).
Klei êmuh ksiêm mĭn: Si klei truh kơ mtao Y‑Ben-Hadat leh anăn kơ phung kahan Siri? Ya klei diñu ngă leh čiăng bi mtlaih mtao leh anăn si boh tŭ mâo? Si ngă Aê Diê bi kmhal mtao Y‑Ahap? Ya klei hưn êlâo brei drei răng mơ̆ng klei yăl dliê anei?
Čar Siri mtao Y‑Ben-Hadat hŏng ƀuôn ala mtao Israel mtao Y‑Ahap mâo klei bi blah nanao. Phung kahan Siri amâo dưi ôh hlăm klei bi blah tal êlâo kyua mâo Aê Diê dôk tĭng kơ phung Israel (I Bruă Mtao 20:10‑22). Sa thŭn êdei, mtao Y‑Ben-Hadat lŏ nao ksŭng bi blah tal dua, Aê Diê lŏ brei kơ mtao Y‑Ahap mâo klei dưi hĭn. Mtao Y‑Ben-Hadat êran đuĕ dăp mbĭt hŏng phung kahan adôk hlăm sa boh adŭ hlăm ƀuôn Aphek, tlă anăp hŏng klei arăng mă leh anăn bi mdjiê. Hlăm klei luč klei čang hmăng anăn, diñu mđrăm mbĭt kbiă nao tŭ yơr kngan. Mtao Y‑Ahap čuăn phưi amâo bi mdjiê mtao Y‑Ben-Hadat ôh, bi êdah klei ngă jăk ñu brei mtao đĭ êdeh mbĭt hŏng ñu leh anăn ngă klei bi mguôp hdơ̆ng diñu êlâo kơ phưi mtao Y‑Ben-Hadat lŏ wĭt.
Dưi lač, tĭng kơ klei kđi čar leh anăn bruă lĭng kahan, klei čuăn phưi amâo bi mdjiê leh anăn ngă klei bi mguôp hŏng mtao Y‑Ben-Hadat jing sa klei thâo mĭn snăk. Bi mdjiê hĕ mtao Y‑Ben-Hadat snăn mtao Y‑Ahap kăn mâo klei tŭ dưn mơh ƀiădah lŏ bi mđĭ hĭn klei bi roh rŭ ênua ti krah dua nah, leh mtao Y‑Ben-Hadat anei djiê sĭt yơh ăt mâo mtao Siri mkăn lŏ đĭ mơh, năng ai jhat ƀai hĭn leh anăn ktang hĭn kơ Y‑Ben-Hadat. Tĭng kơ kđi čar, klei bi mguôp anei đru mtao Y‑Ahap dưi lŏ mă wĭt lu ƀuôn prŏng phung Siri mă leh hlăk êlâo. Tĭng kơ klei duah ƀơ̆ng, anei jing mmông găl dưi pŏk êhai bruă mnia blei ti Damas, leh anăn boh nik kơ bruă lĭng kahan, klei hnŭk ênang lŏ dưi mkŏ mdơ̆ng ti knông lăn tĭng Dưr, čiăng dưi hrui kƀĭn lĭng kahan kăp bi blah hŏng pô roh jhŏng ktang hĭn jing phung čar Asiri.
Ƀiădah lĕ, mtao Y‑Ahap lĕ hlăm klei soh prŏng tơdah phưi amâo bi mdjiê mtao Y‑Ben-Hadat, anăn jing klei bi kdơ̆ng hŏng klei Aê Diê mtă brei bi mdjiê mtao Y‑Ben-Hadat, kyuanăn yơh srăng tŭ klei Aê Diê bi kmhal ktang snăk (êlan 42). Si ngă tal anei mtao Y‑Ahap amâo gưt asăp Aê Diê ôh? Knŏng sa klei wĭt lač anăn jing klei mgao. Leh mâo klei dưi bi blah hing ang, dưi mă hdĭp mtao Siri, ƀuôn sang ur driâo bi mđĭ snăn mtao amâo lŏ čiăng hmư̆ klei khua pô hưn êlâo ôh, hrô kơ klei thâo kmhal kơ klei soh, mtao ăl ngêñ leh anăn ƀuah khua pô hưn êlâo (êlan 43). Hlăk anăn mtao Y‑Ahap mĭndah ñu yơh jing pô dưi hĭn, jing sa čô knhâo thâo mĭn hĭn snăn ñu wơr bĭt hĕ klei mtao Salômôn mtô: “Knang kơ Yêhôwa hŏng jih ai tiê, đăm knang ôh kơ klei mĭn ih pô” (Klei Bi Hriêng 3:5).
Klei yăl dliê anei hưn êlâo kơ drei brei thâo răng hlăm klei hdĭp, boh nik hlăk mâo klei dưi hĭn, klei tŭ jing, drei êlưih snăk lĕ hlăm klei mgao leh anăn wơr bĭt hĕ Klei Aê Diê Blŭ mtô, êlưih ngă tui si klei drei pô mĭn leh anăn gao klei Aê Diê mtă. Mnuih thâo mĭn jing mnuih gưt ngă tui si klei Khua Yang čiăng kơ klei hdĭp drei nanao hlăm jih jang klei truh.
Si knhuah hdĭp drei hŏng klei Khua Yang čiăng kơ drei ngă?
Wah lač: Ơ Khua Yang, akâo kơ Khua Yang pap brei kơ klei soh kâo kyuadah kâo khăng gao klei Ih mtă. Brei kâo mâo knga myang čiăng mđing hmư̆ asăp Khua Yang, leh anăn ai tiê klei mĭn đup gưt čiăng dưi ngă bi leh klei Khua Yang čiăng kơ klei hdĭp kâo.
Dlăng Klei Aê Diê Blŭ hlăm tlâo thŭn: Y‑Êsai 29:13‑30:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
