I Vajntxwv 20:26-34
Nqe cim:
“Tus cev Vajtswv lus ntawd hais rau vajntxwv hais tias: tus Tswv hais tias, ‘Vim koj muab tus neeg uas kuv muab cob rau koj tua povtseg tso lawm, mas yuav muab koj txojsia pauj nws txoj, thiab koj cov tubrog yuav raug nws cov tubrog uas khiav dim lawm tua kom tuag tas huv tibsi’” (I Vajntxwv 20:42).
Lus nug rau sawvdaws xav:
- Vajntxwv Npeehadas thiab cov tubrog Xilias ntsib teebmeem dabtsi?
- Lawv tau ua dabtsi cawm lawv tus vajntxwv thiab thaum kawg zoo licas?
- Vim licas vajntxwv Ahaj raug Vajtswv txiav txim (nqe 42-43)?
- Zaj no ceebtoom peb txog yam dabtsi?
Tebchaws Xilias uas vajntxwv Npeehadas kav thiab tebchaws Yixalayees uas vajntxwv Ahaj kav niaj hnub muaj kev tsov rog. Thawj zaug, cov tubrog Xilias raug swb vim Vajtswv tuaj Yixalayees tog (I Vajntxwv 20:10-22). Ib xyoos tomqab, vajntxwv Npeehadas txhij tubrog tuaj tua zaum tim ob, vajntxwv Ahaj rov tau Vajtswv pub muaj yeej. Vajntxwv Npeehadas nrog nws cov tubrog uas seem tuag khiav mus nkaum hauv lub nroog Afekas, lawv ntshai raug ntes thiab raug coj mus tua. Thaum tas kev cia siab lawm, lawv thiaj los thawj cov Yixalayees. Vajntxwv Ahaj txiav txim siab tsis tua vajntxwv Npeehadas, nws zoo siab caw vajntxwv Npeehadas nrog nws caij tsheb nees ua ke thiab nkawd sib coglus ua ntej yuav tso vajntxwv Npeehadas mus.
Tseeb tiag, saib rau sab tswjkav tebchaws, ces qhov kev xaiv tsis tua thiab coglus nrog vajntxwv Npeehadas yog ib tes haujlwm uas ntse heev. Yog tua vajntxwv Npeehadas ces vajntxwv Ahaj kuj tsis tau dabtsi, tseem ua rau ob lub tebchaws muaj kev sib ntxub ntxiv, tsis tas li ntawd xwb, yog Npeehadas raug tua tuag ces yuav muaj lwm tus vajntxwv sawv los kav tebchaws Xilias, tej zaum tus ntawd tseem yuav ua phem thiab muaj zog heev dua Npeehadas. Kev sib coglus no ua rau vajntxwv Ahaj rov txeeb tau tej nroog thaum ub raug poob cov Xilias. Saib rau sab lag luam, ces ntawd yog ib qhov zoo rau kev ua lag ua luam hauv lub nroog Damaxes; thiab tseemceeb dua ces yog sab tubrog, yuav tsis muaj kev tsov rog nyob sab qaum teb, thiaj yuav npaj tau txhij txhua yam los tawmtsam lwm tus yeebncuab txaus ntshai dua uas yog tebchaws loj Axilias.
Txawm li ntawd, los vajntxwv Ahaj tau ua ib qhov txhaum loj heev ntawd yog nws tsis ua raws li Vajtswv tej lus samhwm kom tua vajntxwv Npeehadas, nws thiaj raug Vajtswv rau txim hnyav heev (nqe 42). Vim licas zaum no vajntxwv Ahaj tsis mloog Vajtswv lus lawm? Tsuas muaj tib lo lus teb xwb, ntawd yog kev khavtheeb. Tomqab uas kov yeej thiab ntes tau vajntxwv Xilias, vajntxwv Ahaj tau sawvdaws hwm thiab qhuas, qhov ntawd ua rau nws tsis xav mloog cov cevlus tej lus lawm, nws tsis lees kev txhaum tiamsis tseem chim rau tus cevlus tej lus qhia (nqe 43). Thaum ntawd, vajntxwv Ahaj xav hais tias nws yog tus muaj yeej, yog tus txawjntse thiab muaj tswvyim, nws tsis nco txog vajntxwv Xalumoos tej lus qhuab ntuas hais tias: “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse” (Pajlug 3:5).
Zaj no ceebtoom rau peb yuav tsum ceevfaj hauv lubneej, tshwjxeeb yog thaum muaj txhij txhua yam, thaum ntawd peb yoojyim poob mus rau kev khavtheeb tsis nco qab Vajtswv tej lus qhia, yoojyim ua raws tus kheej lub siabnyiam, tsis ua raws tus Tswv tej lus samhwm. Tus neeg muaj tswvyim, yog tus uas niaj hnub ua raws tus Tswv lub siab nyiam txhua lub sijhawm.
Thov Vajtswv
Tus Tswv, thov zam txim rau nyuamyaus vim ntau zaus nyuam yaus tsis tau ua raws li Koj tej lus samhwm. Thov pub nyuam yaus muaj lub pobntseg ntsujplig thiaj hnov Koj tej lus, thiab pub nyuam yaus muaj lub siab mloog lus thiaj ua tau raws li Koj lub siab nyiam. Amees
Peb tabtom muaj tus cwjpwm zoo licas rau tej uas tus Tswv xav kom peb ua?
Nyeem Vajluskub hauv peb lub xyoos: Yaxayas 29:13-30:7
Kênh Youtube BHKTHN:
