Chivkeeb 12:1-5
Nqe cim:
“Twb yog vim Anplahas ntseeg, thaum Vajtswv kom Anplahas tawm mus nyob lub tebchaws uas Vajtswv coglus tseg hais tias Vajtswv yuav muab pub rau nws, nws thiaj mloog Vajtswv lus. Anplahas tawm hauv nws lub tebchaws mus, tiamsis nws tsis paub hais tias xyov nws yuav mus qhov twg” (Henplais 11:8).
Lus nug rau sawvdaws xav:
- Anplahas tabtom ntsib kev txiav txim siab nyuaj licas?
- Los ntawm yam dabtsi ua rau Anplahas muaj kev txiav txim siab?
- Tus Tswv muaj lo lus cogtseg twg rau nws?
- Peb kawm tau dabtsi txog Anplahas tus qauv ntseeg thiab mloog lus?
Chivkeeb tshooj 12 yog ntu Vajluskub zoo heev hais txog Vajtswv kev nqua hu Anplahas. Los ntawm nws cajces yuav huamvam ua ib haivneeg tseemceeb uas yog haivneeg Yixalayees, dhau haivneeg ntawd Tus Cawmseej los yug.
Thaum tseem nyob nrog cov txheeb ze hauv qub tebchaws, Anplahas hnov tus Tswv lub suab hu. Tus Tswv hu nws tawm mus rau lub tebchaws uas tus Tswv yuav qhia rau Nws, tiamsis tsis hais meej hais tias nyob qhov twg thiab zoo licas. Anplahas tabtom ntsib kev txiav txim siab nyuaj heev, uas yog puas tsimnyog tawm hauv lub tebchaws thajyeeb no mus? Los ntawm yam dabtsi ua rau Anplahas muaj kev txiav txim siab? Thaum kawg, los ntawm kev ntseeg ruaj khov rau Vajtswv, nws tau txiav txim siab ua raws tus Tswv tej lus nqua hu. Tus sau tsab ntawv Henplais hais meej tias: “Twb yog vim Anplahas ntseeg, thaum Vajtswv kom Anplahas tawm mus nyob lub tebchaws uas Vajtswv coglus tseg hais tias Vajtswv yuav muab pub rau nws, nws thiaj mloog Vajtswv lus. Anplahas tawm hauv nws lub tebchaws mus, tiamsis nws tsis paub hais tias xyov nws yuav mus qhov twg” (Henplais 11:8).
Txawm li ntawd, los Vajtswv yeej muaj lus cogtseg pub rau cov uas Nws nqua hu. Vajtswv coglus yuav foom koobhmoov rau Anplahas, ua rau nws tau koob tau npe, muaj xeebntxwv coob thiab ua rau lwm tus tau txais koobhmoov (nqe 2-3). Vajtswv cog lus tseg rau Anplahas hais tias, yog nws mloog lus, Vajtswv yuav foom koobhmoov rau nws. Anplahas ntseeg thiab mloog tus Tswv lub suab hu, txiav txim siab coj pojniam, nws tus kwv li tub, tej tub qhe ntxhais qhev mus raws li tus Tswv coj kev (nqe 4-5).
Anplahas txiav txim siab mloog lus thiab mus raws tus Tswv hu, txawm nws tsis paub hais tias xyov yuav mus rau qhov twg. Qhov no yog ib txojkev ntseeg loj qhia tshwm los ntawm kev mloog lus. Tomqab ntawd, peb pom Aplahas ua qhia tshwm kev ntseeg dhau ntawm mloog tus Tswv lus fij tus tub Ixaj ua khoom theej txhoj. Vajtswv txaus siab rau Anplahas txojkev ntseeg dhau ntawm tus timtswv tej lus hais tias: “Nimno kuv paub hais tias koj yeej mloog lus thiab hwm Vajtswv heev” (Chivkeeb 22:1-12). Anplahas dhau los ua peb tus yawg koob ntawm txojkev ntseeg vim nws mloog tus Tswv lus. Kev mloog lus tsis yoojyim yog thaum yus raug poob ntau yam tseemceeb tiamsis tsis paub meej hais tias yuav tau txais dabtsi rau yav tomntej? Tiamsis los ntawm kev ntseeg, Anplahas txiav txim siab mloog lus.
Nyob hauv lubneej raws tus Tswv qab, muaj ntau zaug peb kuj ntsib tej lub sijhawm yuav tau txiav txim siab nyuaj li Anplahas. Peb txiav txim siab los ntawm kev ntseeg tus Tswv tej lus cogtseg lossis thaum pom tej uas muaj nqis rau tus kheej mam txiav txim siab? Yam uas Vajtswv xav pom nyob hauv Nws cov menyuam yog kev ntseeg thiab mloog lus. Peb yuav tsum kawm xyaum thiab coj tus cai tswj hauv kev mloog tus Tswv lus txhua hnub.
Thov Vajtswv
Tus Tswv, thov ntxiv kev ntseeg rau nyuam yaus, kom nyuam yaus txiav txim siab mus raws li Koj coj kev. Thov pab nyuam yaus niaj hnub ntseeg thiab cia siab rau Koj tej lus cogtseg thaum nrog Koj mus. Amees.
Peb puas txiav txim siab mloog tus Tswv lus txhua lub tsamthawj lawm tau?
Nyeem Vajluskub hauv peb lub xyoos: Yaxayas 28:23-29:12
Kênh Youtube BHKTHN:
