Klei Aê Diê Blŭ: Y-Mathiơ 5:8
Êlan kliăng: “Jăk mơak yơh phung mâo ai tiê doh, kyuadah diñu srăng ƀuh Aê Diê” (Y‑Mathiơ 5:8)
Klei êmuh ksiêm mĭn: Si jing ai tiê doh jăk? Si ngă pô mâo ai tiê doh jăk mâo klei jăk mơak? Si mblang ƀuh Aê Diê? Klei jăk mơak anei ya klei brei drei thâo kơ klei jing mngăt ai tiê drei?
Hlăm Klei Aê Diê Blŭ, “ai tiê” jing phŭn čuăn knuih sa čô mnuih; mâo hlăm anăn klei mĭn, ai čiăng, leh anăn klei bluh ai (Rôm 1:21; 2:5; 5:5). Ai tiê jing akŏ phŭn kơ djăp mta boh klei anak mnuih mâo (Klei Bi Hriêng 4:23; Y‑Yêrêmi 17:9; Y‑Mathiơ 12:34; 15:19). Klei mĭn, klei thâo săng jing yuôm ƀiădah knŏng jing sa kdrêč hlăm ai tiê. Klei Khua Yang iêô mthưr amâo djŏ knŏng klei mĭn mâo klei bi mlih čiăng thâo kral klei hdĭp mngăt pô jing knap mñai, ƀiădah wăt klei jing hlăm ai tiê, kluôm jih sa čô mnuih, klei khăp leh anăn ai čiăng drei mơh.
“Doh jăk” mblang jing “ngă bi doh” amâodah “amâo čhŏ mrŏ ôh”. Phung anak ƀuôn sang Aê Diê brei bi mâo ai tiê doh jăk, amâo čhŏ mrŏ ôh kyua ƀuôn ala mtao adiê jing ƀuôn ala mtao mngač bang leh anăn Aê Diê jing Pô Doh Jăk (I Y‑Pêtrôs 1:15‑16; Klei Bi Êdah 21:27). Khua Yang Yêsu jing klei bi hmô doh jăk kơ drei (Y‑Mathiơ 5:48). “Doh jăk” lŏ mblang đa “amâo bi lŭk mtlai” msĕ si mah kông msei doh, amâo mâo čhŭ hŏng mta mnơ̆ng mkăn. Pô mâo ai tiê doh jăk amâo djŏ knŏng ai tiê amâo mâo čhŏ mrŏ ôh, ƀiădah wăt mâo ai tiê dlăng phă Aê Diê leh anăn knŏng pioh hjăn kơ Ñu (Y‑Mathiơ 6:24; 7:13‑14). Khua Yang Yêsu čiăng kơ drei tui hlue Ñu hŏng klei mtrŭt amâo mâo bi lŭk mtlai ôh ƀiădah knŏng sa hjăn tui duah klei Aê Diê čiăng.
Čiăng mâo “ai tiê doh jăk”, brei hdơr snei, knŏng hjăn Khua Yang yơh dưi bi doh ai tiê mnuih. Hlăk khua ƀĭng kna Y-Yôhan lač, brei “bi doh ñu pô” (I Y-Yôhan 3:3), ñu čiăng lač kơ dua mta tur yuôm kơ bruă ngă anei: Tur tal sa jing bruă Khua Yang ngă leh hlăm drei (I Y‑Yôhan 3:1). Drei knŏng dưi “bi doh drei pô” tơdah Khua Yang pô bi doh drei leh, brei leh mnuih mrâo kơ drei tơdah jum drei jing anak Ñu. Tur tal dua jing Ñu bi mblang ală mngăt čiăng drei thâo ƀuh jar bi hmô mơ̆ng Khua Yang Yêsu. “Doh jăk” jing bruă mơ̆ng Aê Diê kčưm ngă. Tui tluôn, kyua thâo kral bruă Khua Yang ngă leh snăn drei srăng êpa mhao čiăng bi mơak kơ Khua Yang, đup gưt kơ Ñu, leh anăn brei Ñu bi doh ai tiê drei grăp hruê hĭn êjai (Philip 2:12‑13; 4:8).
Si mblang “Ƀuh Aê Diê”? Pô mâo ai tiê doh jing pô mâo klei lŏ kkiêng mrâo sĭt, srăng bi tuôm hŏng Aê Diê klă anăp hlăm hruê Khua Yang Yêsu lŏ hriê. Ƀiădah êjai ară anei drei ăt srăng ƀuh Aê Diê hŏng Klei Ñu Blŭ leh anăn hŏng mmông bi mguôp jăk mmih hŏng Ñu. Hŏng klei thâo ƀuh Khua Yang yơh srăng bi krơ̆ng kjăp klei đăo phung mâo ai tiê doh jăk, srăng bi hlao klei ruă êka, đru diñu lŏ kgŭ grăp blư̆ dluh lĕ, dưi jing ktang hĭn leh găn klei lông dlăng (Klei Mmuñ Hđăp 24:3‑6).
Si ngă drei ƀuh mơ̆ Aê Diê hŏng mmông pioh wah lač hjăn?
Wah lač: Ơ Khua Yang, kâo dôk hdĭp hlăm lăn ala mmăt tĭt hlăm mngăt ai tiê leh anăn hlăm klei kpă ênuah, akâo kơ Khua Yang đru kâo hdĭp doh jăk leh anăn brei kâo êpa mhao Khua Yang čiăng kơ grăp hruê kâo dưi msĕ si Khua Yang hĭn.
Dlăng Klei Aê Diê Blŭ hlăm tlâo thŭn: Klei Mmuñ Siam Hĭn 7:1 – 8:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
