Mathais 10:16
“Nej cia li mloog kuv hais! Kuv txib nej mus ib yam li pab yaj uas yuav mus rau hauv pab hma. Nej yuav tsum ntse ib yam li tus nab thiab muaj lub siab mos siab muag ib yam li tus nquab”
Lus nug rau sawvdaws xav:
– Tswv Yexus xav kom cov thwjtim zeem paub tej yam dabtsi?
– Vim qhov ntawd lawv ua licas thaum ntsib tej kev txomnyem hauv kev ua tus Tswv haujlwm?
– Dhau tej yam uas tus Tswv qhia no, peb pom yus tus kheej tseem tshuav dabtsi thaum ua tus Tswv haujlwm?
Thawj lo lus Tswv Yexus hais uas Nws ceebtoom rau cov thwjtim yog “Nej cia li mloog kuv hais”, tus Tswv xav kom lawv yuav tsum ua tib zoo saib tej uas Nws hais. Tus Tswv xav kom lawv zeem paub thaum ua Nws tes haujlwm yuav ntsib ntau yam kev tawmtsam zoo li pab yaj nyob hauv lub nras liaj loj txhua sab muaj hma nyas rawv tom. Cov menyuam yaj yoojyim raug tom vim tsis muaj peevxwm tivthaiv tus kheej, tiamsis lawv tseem noj zaub kaj siab lug thiab mus mus los los hauv tej tshav zaub vim nws nyob ze tus tswv yug yaj uas paub tivthaiv thaum muaj hma tuaj tom. Tus Tswv kuj xav kom cov thwjtim zeem paub lub zog ntawm tus yeebncuab uas yog dab Ntxwgnyoog niaj hnub ncig mus ncig los nrhiav sijhawm tawmtsam (I.Petus 5:8) tiamsis lawv kuj yuav tsum zeem paub lub zog ntawm sab ntsujplig uas tus Tswv pub rau lawv, thiab lawv yuav tsum niaj hnub “nyob ze” Nws.
Thaum cov thwjtim zeem paub li ntawd lawv yuav tsum muaj tswvyim ua tus Tswv haujlwm. Tswv Yexus muab tus nab los ua qauv qhia, vim nab yog ib yam tsiaj ntse thiab nrawm heev, nws paub nws thiab paub lwm tus, nws paub thaum twg thaub rov qab thiab lub sijhawm twg sawv tawmtsam. Tswv Yexus kuj muab tus nquab los qhia, vim tus nquab yog ib yam tsiaj siab mos siab muag, dawbhuv. Tus Tswv xav kom Nws cov thwjtim muaj lub siab mos siab muag thaum ntsib tej kev tsimtsom, muaj tswvyim hais, muaj lub siab ntse ntsuav qhia tawm Vajtswv txojkev Tseeb thiab kev Dawbhuv. Cov thwjtim yuav tsum nco ntsoov hais tias, txawm yog muaj tswvyim hais los yog muab Qhov Tseeb yuam raws siab nyiam, lossis muab Vajtswv Txojlus saib tsis tseemceeb ces qhov ntawd kuj tsis muaj nqis rau kev loj hlob ntawm Txojmoo Zoo li. Timthawj Paulus qhia nws lub siab ua Vajtswv haujlwm rau Pawg Ntseeg Thexalaunikes paub li no: “Tej lus uas peb qhia nej, peb qhia tseeb xwb. Peb yeej tsis muaj ib nplooj siab uas xav ua phem lossis xav dag nej” (I.Thexalaunikes 2:3).
Nimno, muaj qee zaus peb tsis txaus siab rau yus lub peevxwm ua tus Tswv haujlwm. Peb cheemtsum paub hais tias nyob ze tus Tswv thiab nrog Nws sib raug zoo yog ib yam kev txhawb kom peb muaj zog thiab muaj kev kaj siab ua tus Tswv haujlwm. Peb kuj yuav tsum txawj xav thaum ntsib tej kev txomnyem, kev tawmtsam vim ua tus Tswv haujlwm, ua siab tawv qhawv txawm yuav raug tuag los xij, ntse ntsuav tiamsis ncaj ncees qhia Qhov Tseeb xwb.
Koj puas tseem tabtom siv sijhawm los nyob ze tus Tswv txhua hnub kom tau txais lub hwjchim ua Nws haujlwm thiab? Koj puas ua neej ntse ntsuav kom qhia tawm qhov kev dawbhuv thiab lub hwjchim ntawm Txojmoo Zoo?
Thov Vajtswv,
Tus Tswv, thov Koj zam txim rau qhov uas nyuam yaus tsis siv sijhawm los nyob ze Koj, nrog Koj sib raug zoo. Thov tus Tswv Koj pab kom nyuam yaus niaj hnub vamkhom Koj thiab muaj tswvyim qhia tawm Koj lub npe nyob rau txhua lub tsamthawj. Amees.
Nyeem Vajluskub hauv peb lub xyoo: Phau Ntawv Nkauj 78:40-72
Kênh Youtube BHKTHN:
