Klei Aê Diê Blŭ: Y‑Mathiơ 10:16.
Êlan kliăng: “Nĕ anei, Kâo tiŏ nao diih msĕ si phung biăp ti krah phung asâo tan. Snăn brei diih thâo răng msĕ si ala leh anăn ênang msĕ si mgăm.” (Y‑Mathiơ 10:16).
Klei êmuh ksiêm mĭn: Ya klei Khua Yang Yêsu čiăng kơ phung ƀĭng kna thâo? Mơ̆ng anăn si diñu srăng ngă sĭt tlă anăp hŏng klei dleh dlan hlăm klei mă bruă kơ Aê Diê? Mơ̆ng klei Khua Yang mtô, drei ƀuh ya klei pô dôk kƀah hlăk êjai mă bruă kơ Aê Diê?
Khua Yang Yêsu mphŭn pŏk klei Ñu hưn brei răng hŏng phung ƀĭng kna hŏng boh hră “Nĕ anei”, Khua Yang čiăng kơ diñu mđing jih hnơ̆ng kơ klei Ñu blŭ. Khua Yang čiăng kơ digơ̆ thâo sĭt mă bruă kơ Aê Diê srăng bi tuôm nanao hŏng lu klei phung soh ngă msĕ si êpul biăp hlăm kdrăn rơ̆k bi tuôm hŏng klei asâo tan êran tiŏ mă mơ̆ng lu tĭng. Phung biăp ênưih mâo mă kyua amâo dưi čŏng răng mgang pô ôh, ƀiădah diñu ăt êđăp ênang ƀơ̆ng rơ̆k leh anăn êbat hlăm kdrăn rơ̆k kyua diñu dôk giăm pô mgăt biăp leh anăn thâo mgăt biăp srăng răng mgang diñu sĭt êpul asâo tan nao. Khua Yang čiăng kơ phung khua ƀĭng kna thâo săng ai ktang phung roh jing Satan dôk kăp čiăng guôn mông nao mă (I Y‑Pêtrôs 5:8) ƀiădah ăt brei diñu thâo ai ktang hlăm mngăt myang diñu hlăk mâo jing mơ̆ng Aê Diê brei, brei diñu “dôk giăm” Khua Yang nanao.
Leh phung ƀĭng kna thâo snăn diñu srăng mâo bruă ngă thâo mĭn hlăk êjai mă bruă kơ Khua Yang. Khua Yang Yêsu yua rup ala jing sa mta mnơ̆ng thâo mĭn, thâo kơ pô, thâo hbĭl êrui đuĕ leh anăn hbĭl srăng ngă. Khua Yang Yêsu ăt yua rup mgăm jing sa mta čĭm ênang, jăk siam. Khua Yang čiăng kơ phung ƀĭng kna Ñu ngă ti anăp klei arăng ngă jhat, bi kdơ̆ng hŏng klei thâo mĭn, ênang ƀiădah ăt bi êdah Klei Sĭt Nik leh anăn Klei Doh Jăk Aê Diê. Phung ƀĭng kna brei hdơr wăt tơdah wĭt ngă thâo mĭn ƀiădah hưn soh Klei Sĭt Nĭk, amâodah bi mtrŭn hnơ̆ng čuăn Klei Aê Diê Blŭ snăn klei anăn ăt kăn tŭ dưn kơ mđĭ kyar Klei Mrâo Mrang Jăk. Khua ƀĭng kna Y˗Pôl bi êdah klei mĭn Ñu mă bruă Aê Diê hŏng Sang Aê Diê Têsalônik snei: “Kyuadah klei hmei mtô mtrŭt amâo kbiă hriê mơ̆ng klei čhuai amâodah klei čhŏ mrŏ ôh, kăn mơ̆ng klei mplư rei” (I Têsalônik 2:3).
Hruê anei, tăp năng drei ktưn hưn kơ klei dưi, klei thâo pô hlăm klei mă bruă kơ Aê Diê. Brei drei thâo dôk giăm Khua Yang leh anăn bi mguôp sĭt suôr hŏng Ñu jing klei yuôm bhăn čiăng drei mâo klei ktang leh anăn klei êđăp ênang êjai mă bruă kơ Khua Yang. Brei drei ăt mâo klei ngă thâo mĭn ti anăp klei dleh dlan, bi kdơ̆ng êjai mă bruă kơ Khua yang, jhŏng tlă anăp ƀiădah amâo djŏ săn asei hơaĭ mang ôh, drei blŭ tlao thâo mĭn, klă mngač ƀiădah ăt sĭt suôr hŏng Klei Sĭt Nik.
Drei dôk pioh mông giăm Aê Diê grăp hruê čiăng mă ai ktang hlăk êjai mă bruă kơ Khua Yang mơ̆? Drei blŭ tlao thâo mĭn bi êdah klei doh jăk leh anăn klei myang mơ̆ng Klei Mrâo Mrang Jăk mơ̆?
Ơ Khua Yang, akâo kơ Ih pap brei kơ klei êdu kƀah amâo pioh mông nao giăm Ih, bi mguôp hŏng Ih. Akâo Khua Yang đru kâo bi mguôp sĭt suôr hŏng Ih leh anăn mâo klei ngă thâo mĭn hlăm djăp boh klei čiăng bi guh kơang Anăn Ih grăp hruê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 78:40-72
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
