elemis 32:16-44
Nqe cim:
“Tus TSWV uas kav ib puas tsav yam, koj lub hwjchim thiab tus zog loj zog nchav tsim lub ntiajteb thiab lub ntuj; tsis muaj ib yam dabtsi nyuaj rau koj ua tsis tau li.” (Yelemis 32:17).
Lus nug rau sawvdaws xav:
- Tomqab uas ua raws tus Tswv tej lus mus yuav thaj teb, tus cev lus Yelemis tau thov Vajtswv licas?
- Tus Tswv teb Yelemis tej kev khuam siab licas?
- Peb totaub Vajtswv tus uas muaj hwjchim licas nyob hauv peb lubneej?
Ib tsoom cov uas mloog txhua tus,
Tomqab uas ua raws li tus Tswv tej lus mus yuav tau Hanamees thaj teb (nqe 7), tus cev lus Yelemis tau los thov Vajtswv. Nws ntseeg hais tias tsis muaj ib yam dabtsi nyuaj rau Vajtswv ua tsis tau li (nqe 17b). Tomqab ntawd nws hais txog Vajtswv hais tias: “Koj yog Vajtswv tus uas muaj hwvxyeej loj; koj yog tus TSWV uas muaj hwjchim loj kawg nkaus.” (nqe 18b) thiab nws nco txog tej txujci tseemceeb uas tus Tswv tau ua cawm tus Tswv haivneeg tawm hauv tebchaws Iziv thiab lwm qhov los (nqe 20). Tus Tswv zoo siab muab lub tebchaws uas av rog thiab zoo qoob loo rau tus Tswv haivneeg, tiamsis lawv tsis ua raws li tus Tswv tej lus samhwm lossis ua raws li tus Tswv tej lus qhia. Lawv puab mlom Npa-as, pe tus vajtswv Maulej thiab coj lawv cov menyuam mus hlawv fij rau tus vajtswv no, ntawd yog yam uas Vajtswv ntxub ntxaug kawg li (nqe 23, 29-32). Txawm li ntawd, los tus Tswv yeej tsis tau rau txim rau lawv tamsid, Nws pub rau lawv muaj sijhawm los lees kev txhaum dhau los ntawm cov cev Vajtswv lus tej lus qhuab ntuas, tiamsis lawv “…tsis mloog thiab tsis xyaum ua zoo” (nqe 33). Ntawd yog keebtiv ua rau lawv raug tus vajntxwv uas kav tebchaws Npanpiloos tuaj tua thiab txeeb tau lawv lub tebchaws.
Nyob hauv nqe 25, tus cev lus Yelemis muaj qee yam khuam siab xav nug kom paub, tus Tswv hais kom nws yuav av, tiamsis lub nroog twb yuav raug poob rau cov Npanpiloos tes, ua li ntawd puas yog tus Tswv muaj dua lwm lub homphiaj? Tus Tswv teb hais tias, Nws cob lawv rau yeebncuab tes thiab Nws kuj muaj cuabkav coj lawv rov qab los – qhov ntawd yeej tsis nyuaj dabtsi rau tus Tswv, Nws yog tus tsim lub ntuj lub teb thiab teem txojcai rau txhua yam uas Nws tsim los nyias ua nyias haujlwm, yog li ntawd qhov uas mus yuav thaj teb raws li tus Tswv hais kom yuav yog ib tes haujlwm qhia tshwm tus Tswv haivneeg txojkev ntseeg rau ntawm tus Tswv lo lus cogtseg yuav rov txhim kho lawv, thiab kuj qhuab ntuas tus Tswv haivneeg nco ntsoov hnub uas lawv yuav tau rov qab los nyob hauv lub nroog no dua thiab lawv yuav rov tau txais tus Tswv tej koobhmoov dua. Thaum ntawd, tus Tswv yuav muaj kev coglus nyob mus ibtxhis pub rau lawv (nqe 37-41).
Rov qab nco txog tej uas tus Tswv tau ua dhau los yuav txhawb tau peb txojkev ntseeg tamsim no ntau heev. Vajtswv yog tus uas ua raws li Nws tej lus cogtseg, yeej tsis muaj ib yam dabtsi ua nyuaj rau Nws. Nyob hauv Vajluskub, tus Tswv muaj ntau lo lus cogtseg, ntseeg hais tias tsis muaj ib yam dabtsi yuav ua nyuaj kom Nws ua tsis tiav. Thaum ntsib tej yam tsis raws li siab xav, peb thov tus Tswv pab cawm, ntseeg hais tias tsis muaj dabtsi khwv rau tus Tswv kom nws pub tau kev kaj siab rau peb… Qhov tseemceeb yog peb yuavtsum mloog tus Tswv lus thiab tuav ruaj txojkev ntseeg rau ntawm Nws.
Thov Vajtswv,
Vajtswv Tus uas muaj hwjchim thiab ncajncees! Thov pab nyuam yaus tuav ruaj txojkev ntseeg rau ntawm Koj thaum uas nyuam yaus tau saib pom tej haujlwm uas Koj tau ua dhau los, nyuam yaus ntseeg hais tias los ntawm Koj txhais tes uas muaj zog, yuav tsis muaj ib yam dabtsi uas yuav ua nyuaj rau Koj. Amees.
Ib tsoom cov uas mloog hmov thiab tshua,
Peb puas pheej muab tus Tswv lub hwjchim kaw rau ib tug ciam lossis piv rau yam dabtsi twg?
T Nyeem Vajluskub hauv peb lub xyoo: Yauj 31
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
