Klei Aê Diê Blŭ: Y-Yêrêmi 32:16-44
Êlan kliăng: “Ơ Yêhôwa Aê Diê ah! Ih yơh mjing leh phung adiê leh anăn lăn hŏng klei myang prŏng Ih leh anăn hŏng păl Ih yơr leh! Amâo mâo sa klei ôh jing dleh đei kơ Ih” (Y-Yêrêmi 32:17).
Klei êmuh ksiêm mĭn: Leh gưt asăp Aê Diê blei lăn lŏ, ya klei Khua pô hưn êlâo Y-Yêrêmi hưn hŏng Aê Diê? Si Yêhôwa Aê Diê wĭt lač klei ñu êmuh? Si ngă drei thâo klei myang Aê Diê hlăm klei hdĭp drei?
Leh gưt asăp klei Yêhôwa mtă blei lăn lŏ mơ̆ng Y-Hanamel (êlan 7), Khua pô hưn êlâo Y-Yêrêmi myơr kơ Aê Diê klei wah lač. Ñu đăo “…Amâo mâo sa klei ôh jing dleh đei kơ Ih” (êlan 17b). Leh anăn ñu bi mni kơ Anăn Aê Diê jing: “Ơ Aê Diê pô prŏng leh anăn myang, anăn Ih jing Yêhôwa kơ phung kahan”” (êlan 18b) leh anăn hdơr kơ dŭm klei myang Aê Diê ngă leh čiăng bi mtlaih phung ƀuôn sang Ñu kbiă mơ̆ng čar Êjip ăt msĕ mơh hlăm djăp anôk mkăn (êlan 20). Yêhôwa mơak brei lăn bŏ hŏng êa ksâo leh anăn êa hnuê kơ phung ƀuôn sang Ñu, khădah snăn diñu amâo hlue gưt ôh klei bhiăn Aê Diê mtă. Diñu mdơ̆ng rup yang Baal, kkuh kơ rup yang Môlok leh anăn ngă klei bhiăn myơr anak điêt kơ yang anei jing klei Yêhôwa Aê Diê ngêñ snăk (êlan 23, 29-32). Khădah snăn, Yêhôwa amâo bi kmhal mtam diñu ôh ƀiădah ăt brei mông găl kmhal klei soh hlăk Aê Diê ƀuah mkra diñu mơ̆ng phung khua pô hưn êlâo Ñu, ƀiădah diñu “…amâo čiăng dôk hmư̆ leh anăn mă tŭ ôh klei kâo bi hriăm” (êlan 33). Anei jing mta phŭn ngă diñu tlă anăp hŏng klei mtao Ƀaƀilôn nao blah leh anăn dlưh rai.
Hlăm êlan 25, Khua pô hưn êlâo Y-Yêrêmi ăt mâo klei êmuh, Aê Diê mtă kơ ñu blei lăn, ƀiădah ƀuôn prŏng anei jao leh hlăm kngan phung Kalde, snăn si hdră kčah Aê Diê? Yêhôwa wĭt lač Ñu jao digơ̆ kơ phung roh leh anăn Ñu mâo klei dưi lŏ ba diñu wĭt – klei anăn amâo dleh đei ôh kơ Yêhôwa, Pô myang hrih mjing leh êngĭt adiê leh anăn mkŏ mjing klei bhiăn ngă bruă kơ jih jang mnơ̆ng Ñu hrih mjing, kyua anăn bruă blei lăn lŏ hluê si Klei Yêhôwa mtă jing sa bruă bi êdah klei đăo phung ƀuôn sang Aê Diê kơ klei bi mrâo mơ̆ng Yêhôwa, leh anăn ăt mñă kơ phung ƀuôn sang ñu hdơr nanao kơ hruê diñu srăng lŏ wĭt ti ƀuôn prŏng anei ăt msĕ mơh lŏ dơ̆ng mâo lu klei Yêhôwa hơêč hmưi. Hlăk anăn, Ñu srăng bi mrâo klei bi mguôp Ñu hŏng digơ̆, jing klei bi mguôp lă lar amâo srăng kruh rai ôh (êlan 37-41).
Lŏ lač kơ bruă klei myang Aê Diê ngă leh hlăm êlâo dih srăng mđĭ ai lu snăk kơ klei đăo drei ară anei. Aê Diê jing Pô sĭt suôr, amâo mâo ôh ya klei dleh đei kơ Ñu. Hlăm Klei Aê Diê Blŭ mâo lu klei Aê Diê ƀuăn, đăo sĭt amâo mâo ôh ya klei dleh đei kơ Ñu amâo dưi bi leh. Sĭt tlă anăp hŏng klei dleh dlan, drei wah lač akâo kơ Aê Diê bi mtlaih, đăo sĭt amâo mâo ya klei dleh đei kơ Ñu čiăng brei klei êđăp ênang kơ drei… Mta phŭn jing brei drei gưt nanao asăp Ñu leh anăn đăo nanao kơ klei sĭt suôr Aê Diê.
Mâo mơ̆ ya mta bruă drei khăng bi kčah klei myang Aê Diê?
Wah lač: Ơ Aê Diê Pô Myang leh anăn Sĭt Suôr! Akâo kơ Ih đru kâo đăo kjăp kơ Ih tơdah ƀuh bruă myang Ih ngă leh hlăm ênuk êlâo dih, đăo sĭt hlăm kngan myang Ih, amâo mâo ôh ya klei dleh đei kơ Ih.
Dlăng Klei Aê Diê Blŭ hlăm tlâo thŭn: Y-Yôp 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
