Klei Aê Diê Blŭ: Klei Bi Hriêng 3:3-4
Êlan kliăng: “Đăm brei klei khăp leh anăn klei sĭt suôr tuôm lui ih ôh;kă klei anăn ti kkuê ih,čih klei anăn ti mdhă ai tiê ih.” (Klei Bi Hriêng 3:3).
Klei êmuh ksiêm mĭn: Ya dua mta klei mtao Salômôn mtô brei anak djă pioh đăm bi ktlah ôh hŏng pô? Klei Bi Mguôp Hđăp brei thâo anei jing knuih hlei pô? (dlăng Klei Kbiă 34:6-7)? Ya boh tŭ dưn prŏng hĭn anak srăng mă tŭ? Ya klei drei akâo kơ Khua Yang bi mlih?
Sa čô Mi jing pô hiu hưn klei đăo anăn ñu Jim Elliot mâo sa klei blŭ hing ang snăk: “Amâo djŏ kyua mluk ôh arăng brei ya mta mnơ̆ng amâo dưi djă pioh čiăng dưi djă pioh mta mnơ̆ng amâo dưi luč.” Mtao Salômôn mtô leh kơ anak dua mta klei đăm bi ktlah ôh hŏng pô, klei anăn jing “klei khăp” leh anăn “klei sĭt suôr”.
Hlăm Klei Bi Mguôp Hđăp, klei khăp leh anăn klei sĭt suôr jing dua mta klei khăng nao mbĭt leh anăn jing knuih Aê Diê (Klei Kbiă 34:6-7; Klei Mmuñ Hđăp 108:4). Snăn, mtao Salômôn čiăng bi hriăm anak brei hơô knuih Aê Diê. Mta phŭn jing, si dưi čoh čuăn sa čô mnuih brei hdĭp tui si knuih knŏng mâo hlăm Aê Diê? Sĭt yơh klei jing mnuih amâo dưi mâo ôh knuih anei, ƀiădah Aê Diê dưi ngă ya mta klei mnuih amâo dưi ngă ôh (Y-Mathiơ 19:26). Blŭ êlan mdê, “klei khăp leh anăn klei sĭt suôr” jing bruă Aê Diê bi mlih ai tiê mnuih. Tơdah mâo klei bi tuôm sĭt hŏng Khua Yang, anak srăng mâo klei bi mlih leh anăn anak mâo klei čoh čuăn hdĭp hŏng knuih mrâo Aê Diê brei. Tui si klei sĭt mâo lu mnuih nao kơ Khua Yang hŏng klei kñăm čiăng Aê Diê ngă brei đơ mta klei diñu čiăng, ƀiădah amâo čiăng bi mlih čiăng dưi jing msĕ si Ñu ôh. Lu mnuih nao Sang Aê Diê sui thŭn ƀiădah amâo dlăng kơ klei jing msĕ si Khua Yang jing bruă čiăng tui duah, čiăng kwưh akâo kơ Khua Yang ôh. Diñu amâo thâo ôh bruă tui tiŏ čiăng dưi jing msĕ si Khua Yang yơh srăng brei kơ pô anăn “mâo klei pap leh anăn mâo klei hing ang jăk”.
“Klei khăp” leh anăn “klei sĭt suôr” jing wăt ti êngao – “kă klei anăn ti kkuê ih”, leh anăn hlăm lam mơh – “čih klei anăn ti mdhă ai tiê ih” . “Klei khăp” leh anăn “klei sĭt suôr” bi êdah ti êngao brei anak “mâo klei pap” ti anăp arăng, êjai anăn Aê Diê mơak tơdah ƀuh ai tiê pô thâo mĭn. Kñăm čiăng klei bi hriăm hlăm Klei Bi Hriêng jing klei bi mlih hlăm lam ai tiê anak leh anăn mơ̆ng atăt kơ klei bi mlih klei ngă ti êngao. Drei khăng čhuai kyuadah khăng gĭr bi mlih klei ngă ti êngao ƀiădah amâo tui duah klei bi mlih sĭt hlăm lam ôh. Mta klei drei čiăng mâo jing akâo kơ Khua Yang bi mlih klei hdĭp drei, dưm Klei Ñu Blŭ hlăm ai tiê drei, đăm ôh knŏng tui duah klei bi mlih ti êngao. Akâo kơ Khua Yang brei drei bi tuôm hŏng Khua Yang, bi knal klei bi mlih hlăm Khua Yang, hdĭp hŏng knuih mrâo grăp hruê leh anăn mă klei anăn jing mta kñăm kăp rŭ mdơ̆ng phung riêng gah drei.
Si ngă drei dlăng kơ klei khăp leh anăn klei sĭt suôr jing klei drei tui tiŏ leh anăn djă pioh mơ̆?
Wah lač: Ơ Khua Yang, bi mni kơ Ih kyua brei kâo dưi jing anak Ih leh anăn brei kơ kâo sa knuih mrâo. Akâo kơ Khua Yang đru kâo hdĭp djŏ hŏng knuih mrâo leh anăn gĭr hlăm kdrăn bi lông êran klei hdĭp mngăt grăp hruê čiăng dưi jing msĕ si Khua Yang hĭn. .
Dlăng Klei Aê Diê Blŭ hlăm tlâo thŭn: Y-Yôp 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
