Pajlug 3:3-4
Nqe cim:
“Tsis txhob muab txojkev ua zoo thiab kev ncaj ncees tso tseg. Muab tej ntawd los coj ntawm koj cajdab. Muab tej ntawd sau rau hauv koj lub siab” (Pajlug 3:3).
Lus nug rau sawvdaws xav:
- Vajntxwv Xalumoos qhia nws tus tub tsis txhob muab ob yam dab tsi tso tseg?
- Raws li Vajluskub qhia, ob yam ntawd yog zoo li leejtwg? (nyeem Khiavdim 34:6-7)?
- Yam uas tus tub yuav tau txais yog dab tsi? Peb yuav thov Vajtswv hloov peb yam dab tsi?
Ib tsoom mloog txhua tus,
Tus tub xa Moozoo neeg Mikas Jim Elliot hais ib nqe lus muaj meej tseg li no: “Luag tej tsis yog ruam thaum muab tawm yam yus yuav ceev tsis tau kom ceev yam tsis tseev poob”. Vajntxwv Xalumoos qhia nws cov tub ob yam uas tsis tseev ua poob yog: “kev ua zoo” thiab “kev ua ncaj ncees”.
Vajtswv Txojlus phau Qub hais txog, kev ua zoo thiab ua ncaj ncees yog ob yam uas mus ua ib ke thiab yog Vajtswv tus yamntxwv (Khiavdim 34:6-7; Ntawv Nkauj 108:4). Yog li ntawd, vajntxwv Xalumoos xav qhia nws tej tub kom lawv yuav tsum muaj Vajtswv tus yamntxwv. Yuav ua cas yuam kom tau ib tug neeg ua lub neej muaj Vajtswv tus yamntxwv? Tibneeg yeej ua tsis tau kom muaj tus yamntxwv zoo li Vajtswv, tiamsis Vajtswv muaj peevxwm ua tau yam uas tibneeg ua tsis tau (Mathais 19:26). Hais dua lwm seem, “kev ua zoo thiab kev ua ncaj ncees” yog Vajtswv tes haujlwm uas hloov ib tug neeg lub siab. Thaum ib tug tibneeg tau ntsib tus Tswv tiag tiag lawm, tus ntawd muaj lub neej hloov thiab raug yuam kom nws ua lub neej tshiab zoo li Vajtswv tus yamntxwv uas tau tus Tswv pub. Ib yam muaj tseeb uas muaj ntau tus neeg thaum los ntseeg lawm, yog xav kom tus Tswv ua pub rau lawv yam uas lawv ntshaw, tiamsis tsis xav cia tus Tswv hloov yus kom zoo thooj tus Tswv. Qee tus ntseeg pheej mus pehawm Vajtswv ntau xyoo los lawm tiamsis tsis quav ntsej txog qhov uas yuav ua lub neej zoo li tus Tswv yog yam cheemtsum nrhiav, cheemtsum thov Vajtswv pub kom muaj. Cov ntseeg zoo li ntawd lawv tsis paub hais tias, qhov uas muaj lub neej zoo li tus Tswv yuav ua rau; “Vajtswv thiab tibneeg txaus siab rau lawv”.
“Kev ua zoo” thiab “kev ua ncaj ncees” yog ob yam uas ua tshwm tawm sab nraud yog“ coj ntawm koj cajdab”, khaws tseg sab hauv yog “sau rau hauv koj lub siab”. “kev ua zoo” thiab “kev ua ncaj ncees” thaum ua tshwm tawm sab nraud yuav ua rau“Vajtswv thiab neeg yuav txaus siab rau koj”. Lub homphiaj ntawm tej lus qhia hauv phau Pajlug yog xav kom tej tub muaj lub siab hloov, ua tau lub neej zoo qhia tshwm tawm sab nraud. Peb pheej xav yuam kev uas yuav hloov kom tau lub neej sab nraud tiamsis tsis quav ntsej txog kev hloov peb lub siab uas yog sab hauv. Qhov uas peb yuav tau thov tus Tswv pab hloov peb lub neej yog, khaws Vajtswv Txojlus rau hauv peb lub siab ua ntej, tsis yog pheej nrhiav kev hloov peb lub neej sab nraud xwb. Thov tus Tswv pab kom peb tus kheej tau ntsib tus Tswv, tau saj lub neej uas tau tus Tswv pauv hloov, ua lub neej tshiab ntawd qhia tshwm txhua hnub thiab muab qhov ntawd los ua lub hom phiaj rau kev pab txhim kho tej neeg ib ncig yus kev ua neej.
Thov Vajtswv,
Tus Tswv, nyuam yaus ua Koj tsaug uas Koj pub nyuam yaus tau los ua Koj me nyuam thiab pub nyuam yaus muaj lub neej tshiab zoo li Vajtswv tus yamntxwv. Thov pab nyuam yaus ua tau lub neej phim yog Koj me nyuam kom ua rau Koj thiab tej neeg ib ncig txaus siab. Amees.
Ib tsoom cov mloog uas hmov thiab tshua,
Peb puas muab kev ua zoo thiab ua ncaj ncees los coj thiab khaws tseg lawm?
Nyeem Vajluskub hauv peb lub xyoo: Yauj 10
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
