Pajlug 15:1-4

 Nqe cim:

“Tus nplaig uas hais lus zoo yog tsob tshuaj uas cawm txojsia, tiamsis tus nplaig uas hais lus phem ua rau luag ntsawv siab” (Pajlug 15:4).

Lus nug rau sawvdaws xav:

• Hais lus ntse yog hais cov lus li cas?
• Hais lus ntse muaj qab hau dab tsi?
• Peb kheev tsawg yam kev hais lus twg?
• Yuav ua cas peb thiaj hais tau lus ntse?

Vim kev hais lus tseemceeb heev, yog li ntawd hauv phau Pajlug vajntxwv Xalumoos thiaj qhia txog ntau yam kev hais lus sib txawv. Tus neeg txawj ntse hais tej lus luag totaub (10:13), tus neeg tsis fwm Vajtswv tej lus ua rau koj raug kev puastsuaj (11:9), tus neeg hais lus tseeb yuav muaj sia nyob ntev (12:19), thiab tus neeg txawj ntse tej lus yuav tiv thaiv nws (14:3) v.v… Nyob hauv plaub nqe Vajluskub hnub no, vajntxwv Xalumoos xav ntuas kom peb txhua tus paub hais lus ntse. Xalumoos xav qhia hais tias, hais lus ntse yog cov lus yuav tsum mus kom txog ob sab uas yog; tej uas yuav hais thiab paub hais.

Nyob ntawm sab tej uas yuav hais yog; “hais lus ntse ntsuav”, cov lus hais tawm pab tau cov mloog muaj tswvyim, ua rau cov mloog totaub lub ntsiab thiab coj los siv. Tej uas yuav hais ntawm lus ntse yog tej lus coj tau cov mloog mus rau yam zoo, kev dawb huv thiab kev ncaj ncees ntawm Vajtswv. Cov lus ntse uas muaj ntsiab zoo yog tej lus hais hauv lub siab tuaj, yog hais tseeb, hais tau ua tau thiab ua los ntawm qhia tshwm kev hlub. Tibneeg ib tug yuav ntsia tsis pom ib tug lub siab, tiamsis; “Tus Tswv pom txhua yam xwm txheej uas muaj nyob txhua qhov, nws saib ntsoov peb, thaum peb ua zoo lossis thaum peb ua phem” (nqe 3). Yog li ntawd, peb yuav tsum ua tib zoo xav txog tej uas peb yuav hais tawm.

Nyob ntawm sab paub hais lossis thaum hais; hais lus ntse yog maj mam hais sib sib, hais yog sijhawm, thiab hais yog chaw,“Lo lus mos lus muag ua rau kev chim ploj mus, tiamsis lo lus nruj tsiv ua rau kev chim tawm tuaj” (nqe 1). Yog li ntawd, kev hais lus ntse yog hais tawm tej lus mos muag, lus sib kom txhawb tau cov mloog thiab qaij kom dhau kev sib cav sib ceg uas tsis muaj qab hau. Lo lus zoo tau muab piv rau tsob tshuaj uas cawm tau txojsia (nqe 4), yog tej lus uas pab cov mloog los paub txog lub hauvpaus txojsia, yog tej lus uas pab tau cov mloog muaj kev hloov lub neej kom mus txog ntuj ceebtsheej (mus nyeem Pajlug 3:18; 11:30; Tshwmsim 2:7; 22:2). Nyob hauv lub ntiajteb uas puv nkaus kev txhaum, hais lus kev dag, sib cav sib ceg thiab ua nruj ua tsiv, yog leejtwg los nrhiav tau lub hauvpaus txojsia lawm, yuav muaj lub neej ntse.

Hais lus ntse muaj qab hau heev, vim coj tau kev thajyeeb los hloov kev ua tsov rog, kev sib hlub los hloov kev sib ntxub, kev sib haumxeeb los hloov kev faib pab faib pawg, kev tseeb hloov kev dag, kev txhim kho hloov kev rhuav kom puastsuaj, kev tau txojsia hloov kev ploj tuag ntawm sab ntsujplig. Hauv phau Yakaunpaus sau hais tias: “Tiamsis lub tswvyim uas los saum ntuj los yog lub uas zoo kawg nkaus. Lub tswvyim ntawd tsis ntau ncauj, paub cai, hais lus zoo, nrog luag ua phoojywg, hlub lwm tus, muab siab rau ua haujlwm zoo, tsis xaiv leejtwg ntsejmuag thiab tsis zais siab” (Yakaunpaus 3:17). Thov tus Tswv pab kom peb txhua tus coj tau kev thajyeeb mus rau sawvdaws, kawm nkag siab, paub ua lub neej hais lus ntse txhua lub sijhawm.

Tej lus peb hais puas tseeb yog lus ntse lawm tau?

Thov Vajtswv,

Tus Tswv, nyuam yaus ua Koj tsaug tau kawm txog zaj hais lus ntse. Thov pab nyuam yaus ceev lub qhov ncauj txhua lub sijhawm ntawm tej yam yuav hais thiab paub hais lus yog lus ntse, qhia tshwm kev hlub, kev ncaj ncees los sib txhim kho sawvdaws lub neej haum Koj siab. Amees.

T Nyeem Vajluskub hauv peb lub xyoo: II.Xwmtxheej Vajntxwv  30:1-31:1

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn