Klei Aê Diê Blŭ: Klei Bi Hriêng 15:1-4
Êlan kliăng: “Êlah êdu êun jing sa ƀĕ ana kyâo klei hdĭp, ƀiădah êlah wê bi mčah ai tiê” (Klei Bi Hriêng 15:4)
Klei êmuh ksiêm mĭn: Ya mta bi êdah kơ klei blŭ thâo mĭn? Ya klei tŭ dưn mơ̆ng klei blŭ thâo mĭn? Ya klei drei kñah hlăm klei hdĭp? Ya klei drei ngă čiăng dưi blŭ klei thâo mĭn?
Kyua klei blŭ yuôm bhăn snăk anăn jih hdruôm hră Klei Bi Hriêng, Mtao Y‑Salômôn mñă klă lu blư̆ hlăm lu mta mdê mdê. Ƀăng êgei phung thâo săng mâo klei knhâo (10:13), Sa čô mnuih ƀai čiăng bi rai pô riêng gah ñu hŏng klei ñu blŭ (11:9), Ƀăng êgei blŭ klei sĭt nik dôk kjăp hlŏng lar (12:19), êlah phung thâo mĭn srăng mgang diñu pô (14:3) … Hlăm pă êlan Klei Bi Hriêng hruê anei, sa blư̆ dơ̆ng Mtao Y‑Salômôn mñă brei thâo blŭ klei thâo mĭn. Ñu brei thâo blŭ klei thâo mĭn brei mâo wăt hlăm boh phŭn klei blŭ leh anăn knuih.
Kơ hdră boh phŭn, klei blŭ thâo mĭn brei “ba klei thâo săng” đru kơ phung hmư̆ mâo klei thâo, klei săng čiăng dưi hriê kơ prŏng. Boh phŭn klei blŭ ăt brei mđing kơ mnuih hmư̆, klei thâo săng ênoh yuôm knhuah hdĭp, klei doh jăk, kpă ênô Aê Diê. Klei blŭ brei kbiă mơ̆ng ai tiê kpă ênô, boh phŭn bi êdah klei khăp. Anak mnuih amâo dưi yua ôh ală pô čiăng dưi ƀuh ai tiê mnuih, ƀiădah “Ală Yêhôwa dlăng tar ƀar anôk, kăp dlăng phung ƀai leh anăn phung jăk” (êlan 3). Kyua anăn brei drei răng kơ ya klei drei blŭ.
Kơ knuih, klei blŭ thâo mĭn brei hưn mdah hŏng klei jăk. Amâo djŏ klei blŭ brei jing djŏ, kpă ênô djăp leh ôh, ƀiădah brei blŭ djŏ mmông, djŏ mnuih, leh anăn djŏ hdră. “Klei lŏ wĭt lač êdu bi hlai klei ngêñ, ƀiădah klei blŭ khăng bi mčhur klei ăl” (êlan 1). Klei blŭ thâo mĭn jing klei blŭ êdu êun ba klei mđĭ ai kơ mnuih hmư̆, leh anăn đăm bi tăng mgăl hơaĭ mang ôh. Klei blŭ êđăp ênang tinei dưi bi hmô hŏng “sa ƀĕ ana kyâo hdĭp”(êlan 4), jing klei blŭ bi hriăm mnuih hmư̆ thâo săng Phŭn kơ klei hdĭp, đru diñu mđing truh kơ klei bi mrâo lă lar hlăm ƀuôn jăk (dlăng hlăm Klei Bi Hriêng 3:18; 11:30; Klei Bi Êdah 2:7; 22:2. Ti krah dlông rŏng lăn rŭng răng hlăm klei soh kyua mâo lu klei blŭ luar, klei mgao, tơdah duah êlan nao kơ Phŭn Klei Hdĭp srăng dưi hdĭp thâo mĭn.
Klei blŭ thâo mĭn tŭ dưn kyua ba klei êđăp ênang hrô kơ klei blah ngă, klei khăp hrô kơ klei bi êmut, klei bi grăng hrô kơ klei amâo thâo bi djŏ, kpă ênô hrô kơ klei blŭ luar, bi mđĭ ai hrô kơ klei bi mldưh, leh anăn klei hdĭp lă lar hrô kơ klei dlưh rai hlăm mngăt. Pô čih Y‑Yakơ čih snei: “Ƀiădah klei thâo mĭn kbiă hriê mơ̆ng dlông êlâo hĭn jing êngeh, leh anăn êđăp ênang, êdu êun, thâo guôp, bŏ hŏng klei pap mñai leh anăn boh jăk, amâo mâo dlăng ti êngao amâodah ai ngăm ôh” (Y‑Yakơ 3:17). Akâo kơ Khua Yang brei kơ grăp čô drei jing sa čô bi ala kơ klei êđăp ênang, tui hriăm, thâo săng leh anăn blŭ nanao klei blŭ thâo mĭn.
Ya klei drei blŭ klă sĭt thâo mĭn mơ̆?
Wah lač: Ơ Khua Yang, Kâo bi mni lač jăk kơ Ih kơ klei hriăm Blŭ Klei Thâo Mĭn. Akâo kơ Khua Yang đru kâo thâo răng mơ̆ng boh phŭn truh kơ hdră blŭ čiăng blŭ nanao klei thâo mĭn, bi êdah klei khăp, klei kpă ênô Aê Diê čiăng mđĭ ai, bi đru hdĭp bi mơak kơ Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 30:1 – 31:1
Kênh Youtube BHKTHN:
