I-Kauleethaus 16:15-18
Nqe cim:
“Cov kwvtij, kuv thov ntuas nej kom nej mloog cov neeg ntawd thiab lwm tus uas nrog lawv ua haujlwm ua ke ntawd lus” (I-Kauleethaus 16:16).
Lus nug rau sawvdaws xav:
- Xatefanas yog tus neeg zoo li cas?
- Tej haujlwm uas Xatefanas tsev neeg tau ua los lawm yog dabtsi?
- Timthawj Paulus ntuas cov ntseeg yuav tsum ua li cas rau Xatefanas tsev neeg thiab cov neeg uas nrog Xatefanas ua haujlwm ua ke?
- Peb ua raws li Paulus tej lus ntuas zoo li cas lawm?
Xatefanas thiab nws tsev neeg tau timthawj Paulus hais txog vim lawv yog cov “xub los ntseeg hauv xeev Akhayas”. Akhayas yog ib thaj tsam me hauv tebchaws Kilis, thiab yog lub npe siv hu rau lub tebchaws ntawd. Vim yog tsev neeg ntseeg xub thawj nyob hauv ib cheebtsam, Xatefanas tsev neeg thiaj tau timthawj Paulus muab lawv ua kevcai raus dej (I-Kauleethaus 1:16), thiab lawv tsev neeg kuj tau nrog Paulus khwv ua tes haujlwm qhia Txoj Moozoo uas yog Tswv Yexus zaj rau tej neeg ib cheebtsam ntawd (nqe 15). Dhau ntawd, lub caij nyoog uas Paulus raug kaw hauv tsev lojcuj, Xatefanas nrog rau Fautunatus thiab Akhayikus lawv tau mus xyuas Paulus. Qhov uas lawv mus xyuas Paulus ntawd txhawb tau Paulus lub zog heev (nqe 17a). Paulus ntuas cov ntseeg hauv nroog Kauleethaus yuav tsum fwm cov neeg uas muaj lub siab kub lug ua Vajtswv haujlwm thiab ua haujlwm khwv zoo li ntawd.
Xatefanas tsev neeg thiab cov neeg uas nrog lawv ua haujlwm ua ke hauv pawg ntseeg xub thawj ntawm cheebtsam Akhayas, lawv yog cov thawj coj chiv thawj thaum pib txhim muaj pawg ntseeg. Timthawj Paulus tej lus qhuab ntuas txog tus cai ua Vajtswv haujlwm ntawm cov ntseeg ntsigtxog cov ntseeg thiab cov ntseeg ntsigtxog tus thawjcoj hauv pawg ntseeg. Ntawm kev ua Vajtswv haujlwm, cheemtsum muaj lub siab txo fwjchim ua haujlwm pab cov ntseeg, tas siab tiv kev txomnyem nrog Vajtswv cov neeg. Cov ntseeg yuav tsum muaj nplooj siab ib tug txhawj txog ib tug “ua rau kuv zoo siab”, txhais hais tias txawj ua rau lwm tus muaj kev kaj siab, ib tug saib xyuas tug los ntawm kev sib hlub. Dua li ntawm cov ntseeg ntsigtxog tus saib xyuas lossis cov coj, ces yuav tau saib taus thiab fwm lawv thiab “lwm tus uas nrog lawv ua haujlwm ua ke”. Tej yam hais los no yog tus cai uas yuav ua rau Vajtswv tsev neeg nyob muaj quas, yog cai rau sawvdaws tau ua Vajtswv tes haujlwm kom pawg ntseeg fuam vam.
Ib yam li pawg ntseeg hauv nroog Kauleethaus hnub thaud, pawg ntseeg niaj hnub nimno yeej muaj ntau tsawg kev nyuaj siab, ntawm tug ua rau tug tu siab, ntawm sib khib, sib chim… ua rau qee leej tsis xav ua tes haujlwm uas tus Tswv muab tso rau ua. Vajtswv Txojlus hnub no txhawb peb cov uas tab tom ua rog ntawm sab ntsujplig lub zog, kom ib tug ua zoo rau tug, ib tug cheemtsum ib tug, ib tug txhawb tug lub zog thiab ua rau sawvdaws zoo siab kom hla dhau tej kev nyuaj siab tuaj raug, thaum sawvdaws koom ua Vajtswv haujlwm ua ke.
Peb puas yog ib tug ntseeg uas ua rau lwm tus ntseeg txais kev zoo siab?
Thov Vajtswv,
Vajtswv! Nyuam yaus ua Koj tsaug uas tau Koj ntuas nyuam yaus yuav tsum fwm cov uas ua Koj tes haujlwm. Thov Koj pab nyuam yaus yog tus txhawb tau sawvdaws lub zog ntawm kev ua Koj tes haujlwm, kom nrog tau sawvdaws ua Vajtswv tes haujlwm. Amees.
Nyeem Vajluskub hauv peb lub xyoo: II.Xwmtxheej Vajntxwv 31:2-21
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
