Klei Aê Diê Blŭ: I Y‑Timôthê 2:1-4
Êlan kliăng: “Iêu wah lač bĕ kơ kâo, leh anăn kâo srăng lŏ wĭt lač kơ ih, leh anăn srăng hưn kơ ih mnơ̆ng prŏng leh anăn hgăm, mnơ̆ng ih amâo tuôm thâo ôh.” (Y‑Yêrêmi 33:3).
Klei êmuh ksiêm mĭn: Ya mta klei khua ƀĭng kna Y‑Pôl mtă brei Y‑Timôthê ngă êlâo hĭn? Ñu brei thâo si klei mblang kơ klei anăn? Drei khăng myơr klei kwưh akâo kơ hlei pô?
Khua ƀĭng kna Y‑Pôl mtă mtăn kơ khua pô mtô êdam Y‑Timôthê bruă yuôm brei ngă êlâo hĭn jing “kwưh, akâo, wah lač brei kơ arăng leh anăn bi mni kơ Aê Diê kyua jih jang mnuih” (êlan 1). Ñu yua boh blŭ “êlâo kơ jih jang klei” čiăng lač klei yuôm leh anăn jêč ruăt kơ klei wah lač. Arăng khăng bi msĕ klei wah lač hŏng “klei bi êwa klei hdĭp mngăt” kyuanăn tơdah phung đăo amâo dưm ôh klei wah lač êlâo hĭn kơ jih jang klei, snăn klei hdĭp mngăt srăng jing êdu awăt leh anăn srăng “mjưh êwa” amâo hmao thâo ôh.
Khua ƀĭng kna Y‑Pôl amâo mñă knŏng kơ klei wah lač ôh, ƀiădah ñu kñăm ktang kơ pă boh blŭ brei ngă, čiăng lač klei yuôm hlăm klei wah lač, anăn jing “kwưh”, “akâo”, “wah lač brei” leh anăn “bi mni kơ Aê Diê”. “Kwưh” bi êdah hŏng jih ai tiê iêô akâo klei đru mtlaih mơ̆ng Khua Yang. “Akâo” bi êdah knhuah bi ti gŭ pô čiăng akâo kơ Khua Yang mđing hmư̆ klei drei wah lač. “Wah lač brei” hŏng jih ai tiê hưn mdah kơ Pô Ti Dlông Hĭn klei drei akâo brei kơ arăng hŏng klei hmăng hmưi mâo klei pap brei ti anăp Aê Diê. “Bi mni kơ Aê Diê” jing mta klei amâo dưi kƀah ôh hlăm klei wah lač, brei drei myơr nanao klei blŭ hơêč hmưi leh anăn bi mni kơ Aê Diê hlăm djăp mta klei truh.
Tui tluôn anăn, khua ƀĭng kna Y‑Pôl brei thâo, pô brei Y‑Timôthê hdơr mĭn hlăm klei wah lač, anăn jing “jih jang mnuih”, “phung mtao”, “phung khua kiă kriê” (êlan 2). Wah lač brei kơ jih jang mnuih jing klei iêô mthưr pioh kơ grăp čô phung anak ƀuôn sang Aê Diê. Jing kdrêč hlăm asei mlei Krist, bruă čuăn kơ drei brei uêñ mĭn kơ klei kƀah hdơ̆ng găp čiăng hdơr wah lač brei. Anei jing mta klei amâo dưi kƀah ôh hlăm knhuah hdĭp wah lač grăp čô phung đăo. Êdei anăn, brei drei hdơr wah lač brei kơ “phung mtao”, phung khua kiă kriê lăn čar. Hlăk khua ƀĭng kna Y‑Pôl čih hră mơĭt anei, mtao Nêrô, sa čô mtao hing ang jhat ƀai dôk kiă kriê. Phung đăo ti čar Rôm arăng dôk ngă jhat ktang tĭt. Kyuanăn, bruă wah lač brei kơ phung khua kiă kriê jing yuôm snăk “čiăng kơ drei dưi dôk hdĭp êđăp ênang leh anăn amâo mâo klei rŭng răng ôh tui si klei đăo kơ Aê Diê leh anăn tui si klei arăng mpŭ” (êlan 2b). Ñu lŏ lač thiăm mơh: “Klei anăn jăk leh anăn bi mơak kơ Aê Diê, Pô Bi Mtlaih drei” (êlan 3). Bruă wah lač brei kơ jih jang mnuih leh anăn kơ phung khua kiă kriê klă mngač jing bruă jăk leh anăn bi mơak kơ Aê Diê yơh, kyuadah Ñu čiăng kơ jih jang mnuih dưi tlaih leh anăn thâo săng klei sĭt nik (êlan 4).
Hruê anei, drei dôk hdĭp ti krah ƀuôn sang lu mnuih amâo thâo săng klei sĭt nik ôh, ngă jhat kơ Phung Sang Aê Diê. Kyuanăn, bruă klam kơ grăp čô anak Aê Diê brei hŏng jih ai tiê wah lač brei kơ phung khua kiă kriê leh anăn kơ phung ka thâo kral Khua Yang ôh. Brei drei mâo klei đăo, hŏng klei drei kwưh akâo, Khua Yang srăng ngă bruă prŏng leh anăn dleh, jing bruă drei ka tuôm thâo ôh.
Si ngă êlâo hĭn kơ jih jang klei, drei myơr klei wah lač brei kơ jih jang mnuih mơ̆?
Wah lač: Ơ Khua Yang, akâo kơ Ih mñă kâo hdơr nanao êlâo hĭn kơ jih jang klei, brei myơr klei kwưh akâo, wah lač brei leh anăn bi mni kơ Aê Diê kyua jih jang mnuih leh anăn kơ phung khua kiă kriê lăn čar kyuadah klei anei bi mơak kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 18:28 – 19:11
Kênh Youtube BHKTHN:
