Klei Aê Diê Blŭ: Y‑Yêrêmi 30:1-10.
Êlan kliăng: “Tơdah diih êbat tui hlue klei bhiăn kâo, tơdah diih djă pioh leh anăn ngă tui si klei kâo mtă…Kâo srăng brei klei êđăp ênang hlăm čar diih, diih srăng pĭt mdei, amâo mâo pô bi huĭ diih ôh. Kâo srăng suôt hĕ hlô jhŏng mơ̆ng čar diih, leh anăn đao gưm amâo srăng găn ôh ti čar diih.” (Bruă Lêwi 26:3, 6).
Klei êmuh ksiêm mĭn: Ya boh blŭ arăng yua čiăng lač kơ gưl klei jŭ jhat dôk truh kơ phung ƀuôn sang Yuđa leh anăn phung ƀuôn sang Israel? Si ngă klei Yêhôwa ƀuăn brei kơ phung ƀuôn sang Ñu? Ya klei rơ̆ng drei mâo mơ̆ng Aê Diê čiăng bi knal klei hdĭp amâo huĭ hyưt?
Khua pô hưn êlâo Y‑Yêrêmi tŭ mă Klei Blŭ mơ̆ng Yêhôwa lač kơ phung ƀuôn sang Israel leh anăn phung ƀuôn sang Yuđa jing Aê Diê srăng bi mtlaih diñu, Ñu srăng ba phung hlŭn lŏ wĭt ti lăn Aê Diê brei leh kơ phung aê diñu (êlan 3-4). “Asăp ur kyua klei rŭng răng” hlăm êlan 5 jing boh blŭ lač kơ klei huĭ hyưt, jŭ jhat tơdah tlă anăp hŏng klei bi mdjiê tuč hlăm klei blah ngă, leh anăn boh blŭ “sa čô êkei kkiêng kơ sa čô anak” hlăm êlan 6 lač kơ klei rŭng răng, amâo hơĭt ai tiê hŏng klei ruă phung êkei dôk tlă anăn msĕ si klei ruă kkiêng… Jih jang klei anăn dưi yua čiăng lač kơ klei mĭn hŏng klei dleh dlan phung Israel leh anăn phung Yuđa dôk tlă anăp hlăm klei jing hlŭn.
Khădah snăn, hlăm hruê rŭng răng, hlăm gưl klei truh anăn Yêhôwa srăng bi mtlaih diñu, anăn jing mta phŭn diñu srăng amâo lŏ huĭ hyưt ôh. Yêhôwa sĭt suôr srăng bi sĭt klei Ñu ƀuăn čiăng “srăng bi joh hĕ knông ti kkuê diñu, leh anăn kâo srăng bi tloh hĕ klei kă diñu, leh anăn phung tue amâo srăng lŏ mjing diñu hlŭn ôh.” (êlan 8). Phung ƀuôn sang Aê Diê găn leh klei dleh dlan ti čar tue, diñu amâo dưi kkuh mpŭ ôh kơ Aê Diê ƀiădah arăng mgô̆ diñu kkuh mpŭ kơ rup yang amâo mâo sĭt. Diñu ur hia, êpa hmao lŏ dưi kưt mmuñ bi mni kơ Aê Diê (Klei Mmuñ Hđăp 137:1,4). Kyua anăn, klei Yêhôwa Aê Diê ƀuăn jing diñu srăng dưi wĭt, lŏ dưi mă bruă kơ Aê Diê, leh anăn mă bruă kơ Mtao pô, Mtao mơ̆ng Aê Diê srăng bi kbiă hlăm djuê ana Mtao Y‑Đawit mơ̆ng djuê ana diñu pô (êlan 9).
Yêhôwa Aê Diê amâo srăng wơr bĭt ôh klei Ñu ƀuăn leh hŏng phung Israel leh anăn phung Yuđa, Ñu lač tơdah phung ƀuôn sang Aê Diê “tui hlue klei bhiăn kâo, tơdah diih djă pioh leh anăn ngă tui si klei kâo mtă” (Bruă Lêwi 26:3) snăn diñu srăng amâo huĭ kơ ya mta klei ôh kyua Yêhôwa Aê Diê srăng ba klei êđăp ênang hlăm krĭng lăn diñu. Grăp čô drei năng ai dôk hlăm klei truh jhat prŏng, năng ai dôk găn klei rŭng răng, ruă ai tiê, amâo êđăp ênang. Ƀiădah, klă sĭt truh mmông Aê Diê kčah, drei srăng mâo klei bi mtlaih yuôm bhăn mơ̆ng Ñu leh anăn drei lŏ dưi rơ̆ng amâo srăng hdĭp hlăm klei huĭ hyưt ôh. Êbat bĕ hlăm klei đaŏ hŏng Aê Diê sĭt suôr leh anăn bŏ hŏng klei khăp.
Drei tuôm bi knal lĕ mơ̆ klei Aê Diê bi mtlaih mơ̆ng klei ruă knap pô?
Wah lač: Ơ Khua Yang Aê Diê Pô Sĭt Suôr! Kâo thâo klei Ih kriê dlăng hlăm phung ƀuôn sang Aê Diê ruah Israel leh anăn Yuđa, kâo ƀuh klei khăp, klei pap leh anăn klei Ih sĭt suôr prŏng êdi. Akâo kơ Ih đru kâo răng kriê klei bhiăn Aê Diê leh anăn hlue ngă čiăng jih klei hdĭp kâo dưi mâo klei êđăp ênang Ih brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 14
Kênh Youtube BHKTHN:
