Klei Aê Diê Blŭ: I Kôrantô 15: 1-2.
Êlan kliăng: “Kyuadah drei mâo kdrêč mbĭt hŏng Krist knŏng tơdah drei dôk kjăp hlăm klei drei knang êlâo tơl knhal tuč” (Hêbrơ 3:14).
Klei êmuh ksiêm mĭn: Si ngă phung đaŏ Kôrantô bi êdah hŏng Klei Mrâo Mrang Jăk Khua ƀĭng kna Y-Pôl hưn? Ñu yua boh blŭ bi êdah bruă ngă “mă tŭ”, “dôk kjăp”, “djă pioh” čiăng mñă kơ ya mta kơ klei đaŏ sĭt? Ya klei hriăm drei mâo kơ klei đaŏ sĭt hlăm Khua Yang Yêsu?
Khua ƀĭng kna Y-Pôl mñă kơ phung đaŏ hlăm Sang Aê Diê Kôrantô lŏ hdơr Klei Mrâo Mrang Jăk ñu hưn leh, jing Klei Mrâo Mrang Jăk ba klei bi mtlaih mơ̆ng bruă dưm klei đaŏ hlăm ênoh yuôm bi mtlaih mơ̆ng Khua Yang Yêsu Krist. Dŭm boh blŭ bi êdah bruă ngă “tŭ mă”, “dôk kjăp”, “djă pioh” mâo Khua ƀĭng kna Y-Pôl yua tinei čiăng lač kơ bruă ngă mơ̆ng phung đaŏ Kôrantô hŏng Klei Mrâo Mrang Jăk ñu hưn leh. Boh phŭn Y-Pôl čiăng mñă hŏng diñu jing amâo djŏ ôh sa čô lač pô đaŏ kơ Aê Diê, đaŏ Klei Mrâo Mrang Jăk, djă pioh klei bhiăn kkuh mpŭ srăng dưi mâo klei bi mtlaih, ƀiădah knŏng tơdah mnuih mâo klei đaŏ sĭt, jing phung mă tŭ Khua Yang Yêsu jing pô bi mtlaih pô, dôk kjăp hlăm klei đaŏ, jing hlăm Klei Aê Diê Blŭ leh anăn hlăm Aê Diê, mbĭt anăn ăt brei krơ̆ng kjăp klei đaŏ truh knhal tuč. Tơdah amâo ngă ôh snăn, wăt tơdah diñu lač pô đaŏ dưn mơh ăt ka ba klei tŭ dưn kơ mngăt diñu rei.
Dua êlan Klei Aê Diê Blŭ anei amâo djŏ čiăng lač kơ klei amâo kjăp tơdah drei dưm klei đaŏ hlăm Klei Mrâo Mrang Jăk ôh, amâodah lač phung mă tŭ Aê Diê amâo klă sĭt dưi mâo klei bi mtlaih ôh, ƀiădah čiăng čiăng lač kơ sa boh sĭt, tơdah sa čô lač pô đaŏ Klei Mrâo Mrang Jăk ƀiădah amâo kjăp ai tiê djă pioh klei đaŏ truh knhal tuič, snăn mđrĭng hŏng bruă pô anăn ka jing klă sĭt mâo klei đaŏ čiăng dưi mtlaih ôh. Gru rup klă mngač hĭn kơ klei sĭt nik anei jing Y-Yuđas Iskariôt, ñu tuôm mă tŭ Klei Mrâo Mrang Jăk, mă klei iêu mthưr mơ̆ng Khua Yang Yêsu čiăng hiu hưn Klei Mrâo Mrang Jăk kơ pô mkăn, tuôm ngă jing ƀĭng kna yuôm bhăn kơ Aê Diê, ngă pô djă prăk Êpul Pluh dua čô ƀĭng kna ƀiădah klă sĭt ñu amâo mâo klei đaŏ ôh, giăm Khua Yang ƀiădah ñu amâo mă tŭ Khua Yang ôh, hmư̆ Klei Khua Yang bi hriăm ƀiădah amâo dưm Klei Aê Diê Blŭ hlăm ai tiê ôh, kyua anăn, klei hưp kơ prăk gai ñu, truh knhal tuč bi luč klei bi mtlaih kơ mngăt pô leh anăn jing “anak kơ klei luč” (Y-Yôhan 17:12).
Tơdah hiu hưn Klei Mrâo Mrang Jăk, mâo lu snăk mnuih čuôn kơŭt tŭ mă Aê Diê ƀiădah êkei kơnăn amâo nao kkuh mpŭ hlăm Sang Aê Diê ôh, amâo lŏ dơ̆ng dôk kjăp hlăm klei đaŏ. Amâodah mâo mnuih đaŏ kơ Aê Diê sa wưng ƀiădah leh anăn tuôm hŏng klei dleh dlan, arăng ngă jhat snăn diñu amâo “dôk kjăp hlăm klei đaŏ anăn.” Wăt phung lu dôk hlăm sang Aê Diê ƀiădah ăt ka klă sĭt mă tŭ Khua Yang Yêsu. Kyua anăn grăp čô drei brei lŏ ksiêm dlăng klei đaŏ pô msĕ si Khua ƀĭng kna Y-Pôl lač leh: “Ksiêm bĕ kơ diih pô čiăng thâo thâodah diih dôk hlăm klei đăo” (II Kôrantô 13:5).
Drei ksiêm dlăng pô mâo klei đaŏ sĭt hlăm Khua Yang leh mơ̆ amâodah ka?
Ơ Khua Yang Yêsu Krist Pô bi mtlaih! Kâo bi mni lač kơ Ih kyua klei đaŏ Ih brei kơ kâo čiăng kâo dưi mâo klei bi mtlaih hlăm Anăn Ih, akâo kơ Ih đru kâo dôk kjăp leh anăn djă pioh klei đaŏ kjăp êla dưi bi tuôm hŏng Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 7
Kênh Youtube BHKTHN:
