Klei Aê Diê Blŭ: Y-Yêrêmi 27:1-6
Êlan kliăng: “Kâo yơh hŏng klei myang prŏng kâo leh anăn hŏng kngan kâo yơr leh mjing leh lăn ala mbĭt hŏng phung mnuih leh anăn hlô mnơ̆ng dôk ti rŏng lăn ala, leh anăn kâo jao lăn ala kơ hlei pô kâo mĭn djŏ” (Y-Yêrêmi 27:5).
Klei êmuh ksiêm mĭn: Klei hưn êlâo čih hlăm trăn Klei Aê Diê Blŭ anei pioh brei kơ hlei pô? Yêhôwa hưn kơ Khua pô hưn êlâo Y-Yêrêmi ya klei brei gơ᷃ ngă? Si klei yuôm lač kơ dŭm bruă ñu hluê ngă? Ya klei thâo săng kơ Aê Diê jing Pô kiă kriê hlăm klei hưn êlâo anei?
Leh Mtao Y-Sêđêkia đi ngă mtao kiă kriê Yêrusalem, snăn hlăk mmông anăn Khua pô hưn êlâo Y-Yêrêmi hmư̆ klei Yêhôwa blŭ snei, “Mkra bĕ kơ ih pô klei klĭt leh anăn giê knông, leh anăn bi mđua kă ti kkuê ih pô” (êlan 2). Leh anăn, mơ̆ng phung khua nao kkuh kơ mtao Y-Sêđêkia ti Yêrusalem mơĭt “klei klĭt leh anăn giê knông” anei kơ mtao Êdôm, mtao Môap, mtao phung anak êkei Y-Amôn, mtao čar Tir, leh anăn mtao čar Sidôn. Klei klĭt jing sa mta pioh kă phung ngă soh. Bi giê knông jing sa ƀĕ kyâo prŏng ƀư̆ dưi dưm ti mra kbao amâodah êmô čiăng gĭt gai ñu kai lŏ hma, ktŭng êdeh tui si asăp pô gai. Pô gui giê knông leh anăn kă hŏng klei klĭt snăn amâo lŏ êngiê ôh. Jih dua rup anei dưi yua tinei čiăng lač kơ klei hluê gưt kđi čar. Amâodah klă mngač hĭn jing phung mtao phung ƀuôn sang dưi lač hlăm trăn Klei Aê Diê Blŭ anei brei gưt asăp Yêhôwa čiăng hluê ngă ti gŭ klei gĭt gai mơ̆ng mtao Ƀaƀilôn, kyua klă sĭt Yêhôwa “…mjing leh lăn ala mbĭt hŏng phung mnuih leh anăn hlô mnơ̆ng dôk ti rŏng lăn ala, leh anăn kâo jao lăn ala kơ hlei pô kâo mĭn djŏ” (êlan 5).
Năng ai mâo pô mĭn Yêhôwa kơ phung ƀuôn sang Aê Diê ruah Israel knŏng brei klei hưn êlâo leh anăn knŏng mâo klei dưi gĭt gai mnuih ƀuôn sang leh anăn ala čar anei đuč, ƀiădah mơ̆ng klei blŭ bŏ hŏng klei myang Aê Diê bi êdah leh anăn bi mklă hŏng jih jang mnuih ƀuôn sang, jih lăn čar kơ klei Ñu kiă kriê hlăm jih lăn ala. Ñu jing Pô hrih mjing lăn ala leh anăn jih jang mnơ̆ng anăn Ñu mâo klei dưi “jao lăn ala kơ hlei pô kâo mĭn djŏ.” Wăt Y-Nebukatnetsar, Mtao čar Ƀaƀilôn jhŏng ktang hlăk ênuk anăn, ăt jing “dĭng buăl” Yêhôwa (êlan 6). Djăp klei dưi jih jang phung mtao ti lăn ala dôk hlăm kngan Yêhôwa Pô myang hĭn sơaĭ, Ñu mâo klei dui ba yua tui si klei čiăng jăk mơ̆ng Ñu (Klei Bi Hriêng 21:1).
Ƀiădah khă gơ̆ dưi brei jing anak Mtao Pô myang hĭn, Pô kiă kriê jih jang mnơ̆ng ƀiădah lu mnuih hlăm phung drei ăt dôk huĭ kơ klei dưi anei, huĭ kơ phung mâo klei dưi mkăn hlăm lăn ala anei ƀiădah amâo đaŏ knang kluôm ênŭm ôh, amâo mâo hluê gưt klei dưi Aê Diê hlăm klei hdĭp. Kyua anăn leh tlă anăp hŏng dŭm klei dleh dlan, drei khăng bi mĭn srăng jưh knang kơ prăk mah, klei thâo kral…čiăng msir mgah, amâo jao ôh klei dưi bi mklă djăp mta bruă kơ Aê Diê Pô Myang hĭn leh anăn hluê gưt klei Ñu čiăng. Brei drei knang kơ Aê Diê pô kiă kriê jih jang mnơ̆ng ăt jing Ama drei.
Drei bi êdah mơ̆ klei đaŏ knang leh anăn hluê gưt klei dưi Aê Diê hlăm klei hdĭp pô?
Ơ Aê Diê pô myang hĭn jing Pô kiă kriê lăn adiê! Akâo kơ Ih đru kâo thâo klei dưi Ih hlăm jih jang mnơ̆ng dhơ̆ng, čiăng kâo jih ai tiê đaŏ knang leh anăn hluê ngă klei dưi Ih hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 5:6-31
Kênh Youtube BHKTHN:
