Klei Aê Diê Blŭ: Klei Bi Hriêng 4:4-9
Êlan kliăng: “Ñu srăng mđua ti boh kŏ ih sa boh kwang mnga klei pap, ñu srăng mprăp ih hŏng đuôn mtao guh kơang” (Klei Bi Hriêng 4:9).
Klei êmuh ksiêm mĭn: Ya mta klei mtao Y-Đawit leh anăn mtao Y-Salômôn sĭt suôr tui duah? Ya ênoh tla čiăng dưi mâo klei knhâo mơ̆ng Khua Yang? Ya ngă brei tla ênoh? Si drei dôk tui duah klei yuôm hĭn jing klei knhâo mơ̆ng Aê Diê?
Hdră mĭn kơ ênoh mơ̆ng sa cô mnuih jing yuôm bhăn snăk kyuadah klei anăn kñăm čuăn êlan êbat leh anăn knhuah hdĭp pô anăn. Khua Yang Yêsu mtô: “Kyuadah ti anôk mâo ngăn drăp yuôm ih, tinăn mơh ai tiê ih srăng dôk.” (Y-Mathiơ 6:21). Arăng khăng pioh jih klei hdĭp čiăng kñăm tui duah “ngăn drăp” amâodah ya mta klei drei yap mâo ênoh. Ƀiădah mtao Y-Đawit thâo kral leh ênoh yuôm bhăn jing klei knhâo mơ̆ng Aê Diê snăn ñu lač: “Sa mta klei kâo akâo leh kơ Yêhôwa, klei anăn kâo srăng duah; jing klei dôk hlăm sang Yêhôwa jih jang hruê kâo dôk hdĭp, čiăng dlăng klei siam Yêhôwa, leh anăn čiăng duah ñu hlăm sang yang ñu.” (Klei Mmuñ Hđăp 27:4). Mtao Y-Salômôn ăt hriăm mơ̆ng klei bi hmô ama ñu, knŏng akâo kơ Aê Diê sa mta klei yuôm hĭn kơ jih jang, anăn jing klei knhâo. Aê Diê mơak kơ klei ñu akâo anăn snăn lŏ brei thiăm kơ ñu klei mdrŏng sah leh anăn klei guh kơang (I Bruă Mtao 3:4-15).
Hlăm Klei Bi Hriêng kdrêč 4, mtao Y-Đawit mtô leh Y-Salômôn leh anăn phung cô čĕ ñu: “Klei knhâo jing klei yuôm hĭn; snăn, mă bĕ klei knhâo” (êlan 7a). Tơdah thâo săng leh ênoh klei knhâo snăn “hlăm jih mnơ̆ng ih mâo, mă bĕ klei thâo săng” (êlan 7b). Blŭ mdê hĭn, brei tla ênoh yuôm čiăng dưi mâo klei knhâo Aê Diê. Ya jing ênoh anăn? Ênoh prŏng hĭn brei tla jing tŭ ư drei pô hlăm hruê êgao ti tluôn leh anăn ară anei dôk hdĭp hlăm klei soh wê, amâo mâo ênoh ôh, leh anăn brei lui hĕ jih mnơ̆ng ti tluôn čiăng ksŭng nao kơ ênoh mrâo, kơ sa hdră mĭn mrâo mơ̆ng Pô Knhâo brei. Anăn ăt jing ênoh khua ƀĭng kna YPôl tla leh tơdah ñu lač kơ ênoh ñu tui tiŏ, tui duah hlăk êlâo adih jing msĕ si djah (Philip 3:7-8). Anei jing klei bi knal ruă knap kjham kjhue ̆ amâo mâo pô čiăng găn ôh, ƀiădah anăn jing ênoh brei grăp čô drei tla!
Ya ngă brei tla hĕ ênoh čiăng dưi mâo klei knhâo mơ̆ng Aê Diê? Kyuadah hŏng klei anăn kơh drei dưi hdĭp (êlan 4), leh anăn dưi mâo klei “kiă kriê” leh anăn klei “mgang” (êlan 6). Boh blŭ “djă pioh” hlăm êlan 4 mblang jing “păn kjăp”, boh blŭ anei ăt ƀuh yua mơh hlăm Y-Êsai 41:10. Tơdah drei păn kjăp leh anăn djă pioh Klei Aê Diê Blŭ snăn Ñu srăng păn kjăp, djă pioh drei. Kdlưn hĭn dơ̆ng, klei knhâo Aê Diê srăng brei drei mâo klei guh kơang kyua knhuah hdĭp thâo mĭn, bi mơak kơ Aê Diê (êlan 8-9). Tui duah klei knhâo mơ̆ng Aê Diê jing sa knhuang hlŏng kơ jih klei hdĭp, sa klei rơ̆ng brei drei sĭt suôr tui tiŏ.
Si ngă drei tŭ ư tla ênoh yuôm čiăng dưi mâo klei yuôm hĭn jing klei knhâo mơ̆ng Aê Diê mơ̆?
Ơ Khua Yang, akâo kơ Ih brei kâo thâo kral Klei Ih Blŭ jing Klei Sĭk Nik ti krah lăn ala bŏ hŏng klei mtŭk mtŭl anei. Akâo kơ Khua Yang brei kâo sĭt suôr tui hluê Ih, hriăm leh anăn gưt ngă tui si Klei Ih Blŭ čiăng kơ kâo dưi hdĭp bi mơak kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 18
Kênh Youtube BHKTHN:
