Klei Aê Diê Blŭ: Klei Mphŭn Dơ̆ng 4:8-16
Êlan kliăng: “Yêhôwa jing kpă ênô hlăm jih êlan ñu, leh anăn khăp kơ jih bruă ñu ngă.” (Klei Mmuñ Hđăp 145:17).
Klei êmuh ksiêm mĭn: Ya klei soh jhat ƀai Y-Kain ngă leh? Si klei Aê Diê bi kmhal ñu? Ya klei Y-Kain kwưh akâo? Si klei Aê Diê lŏ wĭt lač kơ ñu? Ya klei drei hriăm čiăng thâo kơ Aê Diê mă mơ̆ng klei yăl dliê anei?
Klei Mphŭn Dơ̆ng kdrêč 4 kčưm dơ̆ng hŏng sa klei yăl dliê ênguôt kơ phung mnuih hlăk leh lĕ hlăm klei soh. Hlăk anăn, Y-Ađam leh anăn H’Êwơ mâo knŏng dua čô anak êkei anăn Y-Kain leh anăn Y-Aƀel. Amâo djŏ tăm ƀri hĕ ôh 16 êlan tal êlâo hlăm kdrêč 4 mâo leh 7 bliư̆ hưn kơ Y-Aƀel jing “adei Y-Kain”. Klei anei brei ƀuh mâo klei bi mguôp sĭt suôr ti krah dua čô ayŏng adei. Ƀiădah lĕ, sĭt klei soh kma mŭt, snăn djăp mta klei bi mguôp suôr tliêr dưn ăt dưi mčah rai jih mơh. Leh anăn klei mčah rai tinei ktrŏ kjham êdimima – Y-Kain bi mdjiê leh adei ñu pô (êlan 8). Drei thâo kral klei huĭ mduĭ mơ̆ng klei soh jhat tơdah ñu kma lar pral hmăr mơ̆ng wưng ênuk anei truh kơ wưng ênuk êdei, leh anăn ƀrư̆ hruê hnơ̆ng ktrŏ kjham klei soh jhat ƀrư̆ đĭ hĭn êjai.
Khua Yang doh jăk, kpă ênô bi kmhal leh Y-Kain brei ñu mă bruă hŏng klei suăi ƀiădah amâo dưi mă tŭ mboh lu ôh, leh anăn klei rŭng ênguôt, klei huĭ hyưt srăng hrô kơ klei êđăp ênang (êlan 12). Lŏ sa bliư̆ dơ̆ng, klei Y-Kain lŏ bi kdơ̆ng wĭt hŏng klei Khua Yang phat kđi ñu, drei ƀuh nik yơh klei khăng ai tiê dôk hlăm klei jing Y-Kain leh anăn wăt klei jing phung mnuih mơh. Y-Kain lač kơ Khua Yang: “Klei bi kmhal kâo jing prŏng hĭn kơ kâo dưi tŭ” (êlan 13). Ênô năng djŏ, ñu lač “KLEI SOH kâo prŏng snăk”, ƀiădah lĕ klei ñu uêñ mĭn jing “KLEI BI KMHAL kâo prŏng đei”. Ñu knŏng uêñ kơ boh ñu tŭ mơ̆ng klei ngă soh ƀiădah hlŏng amâo mâo uêñ kơ klei soh anăn ôh! Hrô kơ klei thâo kmhal kơ klei soh, Y-Kain knŏng uêñ mă kơ klei hdĭp ñu pô. Lu mnuih ênuk anei msĕ mơh ăt dôk hdĭp hlăm ai mĭn huĭ kơ boh srăng tŭ mơ̆ng klei soh hĭn kơ huĭ kơ klei ngă soh. Sitôhmô sa čô ngă soh blŭ luar, ñu knŏng huĭ kơ arăng hmao thâo hĕ klei ñu blŭ luar, leh anăn tơdah amâo mâo ôh pô thâo ñu ăt srăng blŭ luar nanao đrông.
Khua Yang hmư̆ klei Y-Kain kwưh akâo leh anăn đru răng mgang brei klei hdĭp ñu (êlan 15), sa čô bi mdjiê mnuih leh anăn amâo mâo thâo kmhal kơ klei soh ôh. Wăt tơdah Y-Kain amâo mâo djŏ sa mta phŭn knhal năng kơ klei dưi tŭ klei pap brei, ƀiădah Khua Yang ăt pŏk brei kơ ñu sa êlan hdĭp. Ya ngă Khua Yang amâo mâo bi mdjiê ôh bi kmhal Y-Kain ƀiădah lŏ đru răng mgang brei kơ klei hdĭp ñu hĭn êjai? Knŏng mâo hjăn sa klei wĭt lač anăn yơh jing knuih klei khăp leh anăn klei jăk Aê Diê. Djŏ msĕ si Klei Mmuñ Hđăp 145:17 hưn mdah leh knuih Aê Diê jing “kpă ênô hlăm jih êlan ñu”, ƀiădah Ñu jing Aê Diê bŏ hŏng klei jăk leh anăn “khăp kơ jih bruă Ñu ngă”.
Si drei ƀuăn rơ̆ng dôk hdĭp, tơdah leh hriăm thâo săng kơ klei jăk Khua Yang amâo mâo knhal ôh?
Ơ Khua Yang, bi mni kơ Ih kyua klei jăk Ih dôk nanao hlŏng lar leh anăn êbeh dlai kơ klei hdĭp kâo. Akâo kơ Ih brei kâo thâo kral Ih yơh jing Pô kpă ênô leh anăn Pô jăk čiăng kơ kâo dôk hdĭp doh jăk nanao hŏng ai tiê klei mĭn thâo hdơr knga kơ klei jăk Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 21:21-35
Kênh Youtube BHKTHN:
