Klei Aê Diê Blŭ: Philip 4:6-7
Êlan kliăng:
“Ih srăng brei klei êđăp ênang kơ hlei pô bi kjăp klei mĭn ñu, kyuadah ñu knang kơ ih.” (Y-Êsai 26:3).
Klei êmuh ksiêm mĭn: Khua ƀĭng kna Y-Pôl mtă mtăn kơ phung đăo đăm êguôt hnĭng ôh kơ ya mta klei? Hŏng si hdră êlan? Ya gru knăl kơ klei êđăp ênang mơ̆ng Aê Diê? Ya mta klei dưi dưn kơ ai tiê leh anăn klei mĭn drei? Si ngă čiăng kơ drei dưi mă tŭ klei êđăp ênang kluôm ênŭm?
Khua ƀĭng kna Y-Pôl tuôm găn lu snăk klei jhat truh êjai klam bruă hiu hưn klei mrâo mrang jăk: “Arăng krư̆ kâo lu bliư̆ hĭn. Arăng čăm kâo amâo thâo yap ôh, leh anăn jêñ jêñ kâo dôk giăm klei djiê. Êma bliư̆ phung Yuđa čăm kâo tlâo pluh dua păn smăt grăp bliư̆. Tlâo bliư̆ arăng čăm kâo hŏng giê, sa bliư̆ arăng bhĭr boh tâo ti kâo. Tlâo bliư̆ kâo tuôm hŏng klei kŭmpăn kram; kâo dôk leh sa hruê sa mlam hlăm êa ksĭ kpuh mđung…” (II Kôrantô 11:23-25). Hŏng lu mta klei bi knal kơ klei myang yuôm bhăn Aê Diê bi mtlaih ñu, êjai arăng krư̆ hlăm war mnă ñu čih hră kơ Phung Sang Aê Diê Philip dôk tuôm hŏng klei dleh dlan leh anăn mtă mtăn kơ diñu “Đăm ênguôt hnĭng kơ sa mta klei ôh…” wăt tơdah bruă điêt amâodah bruă prŏng dưn, leh anăn hlăm “djăp mta klei”, djăp mta klei hlăm klei hdĭp! “Hdră êlan mdrao” hŏng klei wah lač, klei kwưh, leh anăn klei bi mni (Philip 4:6-7).
Mâo lu mta klei brei ngă hĕ tơdah tuôm hŏng klei truh, ƀiădah mta klei tal êlâo hĭn leh anăn yuôm hĭn jing nao bi tuôm tlă anăp Khua Yang hŏng klei wah lač, msĕ si sa čô anak blŭ yăl dliê hŏng Ama kơ klei dleh dlan ñu dôk tuôm. Hră I Y-Pêtrôs 3:12 brei thâo: “Kyuadah ală Khua Yang dôk dlăng kơ phung kpă ênô, leh anăn knga ñu kăp hmư̆ klei digơ̆ wah lač. Ƀiădah ƀô̆ mta Khua Yang kăp bi kdơ̆ng hŏng phung ngă jhat.” Khua Yang jing Pô khăp, Ñu kăp hmư̆ klei kwưh akâo mơ̆ng pô tuôm hŏng klei jhat. Ƀiădah knuih doh jăk snăn ală Khua Yang knŏng dôk dlăng kơ phung yap kpă, jing phung kmhal kơ klei soh leh anăn mâo klei pap brei leh klei soh. Êjai dôk wah lač brei drei hưn mdah bi klă klơ̆ng klei drei kƀah thâodah prŏng amâodah điêt, kyuadah Klei Aê Diê Blŭ mtô, “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih.” (I Y-Pêtrôs 5:7). Khua Yang Yêsu ăt lač msĕ mơh: “Hriê bĕ kơ kâo, Ơ jih jang mnuih êmăn leh anăn gui ktrŏ, leh anăn kâo srăng brei diih mdei” (Y-Mathiơ 11:28). Khua ƀĭng kna Y-Pôl ăt lŏ mtă mtăn kơ drei brei thiăm mbĭt hŏng klei kwưh akâo anăn jing klei bi mni, amâo djŏ knŏng kơ dŭm mta klei Khua Yang đru êgao leh ôh, ƀiădah wăt hŏng klei đăo sĭt nik Ama bŏ hŏng klei khăp srăng ngă ya klei jing jăk hĭn kơ drei mơh. Yêhôwa lač, “kyuadah kâo thâo ya jing hdră kâo mkra leh kơ diih, … hdră brei klei jăk amâo djŏ ôh klei jhat kơ diih…” (Y-Yêrêmi 29:11).
Tơdah drei tui duah Khua Yang hŏng jih ai tiê, dưm ai tiê klei mĭn drei knang kơ Khua Yang, snăn Ñu ƀuăn srăng răng kriê drei hlăm klei êđăp ênang kluôm ênŭm. Ñu jing boh tâo kjăp, anôk đuĕ dăp hơĭt ênang wăt ti êngao dôk mâo angĭn êbŭ poh yă (Y-Êsai 26:3-4). Klei êđăp ênang lăn ala tơdah amâo mâo ôh klei bi roh amâodah klei dleh dlan mơ̆ng êngao, bi klei êđăp ênang Aê Diê brei msĕ si kahan gak klei mĭn wăt ai tiê mâo klei êđăp ênang kluôm dhuôm mơ̆ng hlăm lam, jing yuôm bhăn êgao hĭn kơ klei mnuih dưi thâo săng. Anăn yơh jing mnơ̆ng myơr êđăp ênang kluôm ênŭm Aê Diê brei kơ jih jang phung đăo dôk kjăp ai tiê kwưh akâo.
Si ngă drei tuôm bi knal leh mơ̆ klei êđăp ênang kluôm ênŭm amâodah ka?
Ơ Khua Yang, bi mni kơ Ama bŏ hŏng klei khăp leh anăn klei myang kyuadah Ih đru leh, dôk đru leh anăn kăp đru kâo êjai tuôm hŏng klei jhat truh. Akâo kơ Khua Yang brei kâo knang kơ Ih čiăng dưi mâo klei êđăp ênang kluôm ênŭm.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
