Klei Aê Diê Blŭ: Y-Yôhan 6: 15-21
Êlan kliăng: “Ƀiădah Yêsu lač kơ digơ̆, “Kâo gơ̆ yơh; đăm huĭ ôh” (Y-Yôhan 6:20)
Klei êmuh ksiêm mĭn: Ya klei truh kơ phung ƀĭng kna leh diñu gưt klei Khua Yang mtă brei wah čhŏng găn ênao êa Galilê êlâo? Ya klei truh hlăk êjai phung ƀĭng kna gĭr bi kdơ̆ng hŏng angĭn êbŭ, êa poh yă? Mŭt hlăm thŭn bhang mrâo, ya klei hriăm drei mâo mơ̆ng klei yăl dliê anei?
Kdrêč tal êlâo hră Klei Mrâo Mrang Jăk Y-Yôhan kdrêč tal 6 yăl dliê kơ klei Khua Yang Yêsu mbliư̆ kpŭng kơ phung ƀuôn sang lu êbeh 5 êbâo čô tui hluê Ñu dưi ƀơ̆ng trei, leh anăn Khua Yang lač kơ phung ƀĭng kna nao đĭ čhŏng găn ênao Galilê êlâo (Y-Mathiơ 14:22), bi Ñu đĭ ti čư̆ čiăng ñĕ đuê̆ kơ phung lu kyua Khua Yang thâo digơ̆ čiăng brei Ñu jing Mtao. Phung ƀĭng kna đĭ čhŏng hlăk adiê mmăt leh. Leh čhŏng digơ̆ kbưi mơ̆ng hang, bhiâo riâo rit mâo êa poh yă, angĭn êbŭ “Êa ksĭ dơ̆ng poh yă kyuadah mâo angĭn ktang thut” (Êlan 18). Hlăk êjai digơ̆ gĭr bi kdơ̆ng hŏng angĭn êbŭ čiăng dưi ba čhŏng truh ti hang, diñu ƀuh Khua Yang êbat ti dlông êlah êa nao kơ diñu. Diñu huĭ yơ̆ng, ƀiădah Khua Yang lač “Kâo gơ̆ yơh, đăm huĭ ôh!” Khua Yang mŭt hlăm čhŏng, čhŏng truh ti hang anôk diñu mĭn čiăng.
Mŭt hlăm thŭn bhang mrâo, grăp čô drei čiăng sơaĭ srăng truh ti hang hŏng klei êđăp ênang. Drei čiăng mâo sa thŭn jăk mơak, djăp bruă găl ênưih, amâo mâo klei rŭng răng hlăm klei hdĭp. Ƀiădah, klei bi knăl drei ƀuh jih jang drei găn leh, leh anăn ăt srăng tuôm hŏng lu angĭn êbŭ êa poh yă, amâo thâo êlâo ôh hlăm klei hdĭp drei. Amâo mâo ôh pô hdĭp amâo tuôm găn klei rŭng răng, klei dleh dlan, klei ruă duam… Hlăm mmông anei amâodah mmông mkăn, adiê srăng jing mmăt, angĭn ktang, ƀuh pô dôk ti krah angĭn êbŭ. Diih tuôm ƀuh mơ̆ hlăm klei hdĭp pô msĕ si amâo mâo Khua Yang kiă kriê, ƀiădah knŏng hjăn pô ti krah angĭn êbŭ, êa poh yă hlăm klei hdĭp? Drei dôk kbưi snăk hŏng hang dleh snăk dưi mâo sa hdră msir, sui leh amâo mâo bruă mă, êdu awăt ti anăp klei ruă duam sui thŭn mlan leh… Dŭm klei rŭng răng kơ mnơ̆ng dhơ̆ng leh anăn ai mĭn truh bhiâo riâo rit kơ drei tơl drei ƀuh pô amâo dưi truh ti hang êa êđăp ênang ôh.
Msĕ Khua Yang truh leh hŏng phung ƀĭng kna Ñu êjai čhŏng diñu tuôm hŏng angĭn êbŭ leh anăn lač “Kâo yơh anei, đăm huĭ ôh!”, Khua Yang ăt srăng truh hŏng phung đaŏ kơ Ñu êjai tuôm hŏng lu mta angĭn êbŭ hlăm klei hdĭp leh anăn lač kơ drei, “Kâo yơh anei, đăm huĭ ôh!” Sĭt angĭn êbŭ, klei dleh dlan truh, phung drei čiăng pral mjưh ruê̆, čiăng hdĭp êđăp ênang. Ƀiădah klei brei mñă hdơr, leh anăn brei thâo jing Khua Yang dôk hriê hŏng mnuih drei. Drei mâo srăng tuôm dôk hjăn păn ôh hlăm klei rŭng răng. “Yêsu Krist ăt jing msĕ mbruê, hruê anei, leh anăn hlŏng lar” (Hêbrơ 13:8). Wăt tơdah ya mta angĭn êbŭ drei tuôm, brei đaŏ knang kjăp kơ Khua Yang dôk hriê đru bi mtlaih kơ phung drei.
Drei mâo ai tiê êđăp ênang mơ̆ hlăm thŭn bhang mrâo anei leh drei thâo mâo nanao Khua Yang kiă kriê hlăm djăp klei dleh dlan?
Ơ Khua Yang, kâo bi mni kơ Ih kyua Ih kiă kriê kâo nanao hlăm klei hdĭp kâo, akâo kơ klei êđăp ênang mơ̆ng Khua Yang dôk mbĭt hlăm klei hdĭp kâo hlăm jih thŭn bhang mrâo anei, kyua kâo đaŏ sĭt Ih hmao truh mbĭt hŏng kâo hlăm ya klei dleh dlan truh.
Klei hriăm dưi mblang mơ̆ng klei hriăm Klei Aê Diê Blŭ grăp hruê mơ̆ng
Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ di ih mơĭt hră hlăm gmail: radioelansitnik@gmail.com
