Blŭng a 15:7-21
“Lăm năr noh đei nơ̆r pơkă pơgơ̆p pơkăm hăm Abram, na khan thoi âu: Inh gô ăn kơ adrĕch adrung ih dêh char âu, đơ̆ng glung Êyiptơb dĭng truh tơ glung tih noh, wă khan glung Ơphrat.”
(Blŭng a 15:18)
Nơ̆r jet tơchĕng pơwao:
– Kră Yang pơkă tơdrong kiơ hăm Abram păng Sư pơsĭt nơ̆r pơkă noh hăm tơdrong kiơ?
– Kră Yang pơjing pơgơ̆p pơkăm hăm ‘bok Abram đei tơdrong gĭt kăl kiơ?
– Lu bơ̆n đĭ jơhngơ̆m lui gơnang păng yak năm lăm tơdrong chu yom Kră Yang thoi yơ?
Đơ̆ng rŏng kơ pơkă pơkăm hăm ‘bok Abram na khan sư gô đei kon sâu lơ, Kră Yang oei tơ’blŏk nơ̆r pơkă adrol sơ̆, Sư gô ăn dêh Kanaan kơ Abram đei teh jang sa (trong 7). Kơplah ‘bok Abram apĭnh tơdrong pơkă pơsĭt đơ̆ng Kră Yang. Sư athei Abram rôp đĭ lu kon sem noh “ blah phơ̆t tŏk-bŏk rĭ lê̆ tơklă băl; mă-lei sem păr sư ưh kơ đei blah asong ôh” (trong 10). ‘nâu tơdrong pơgơ̆p pơkăm chăl sơ̆ (lăng Jêrêmi 34:18) hăm tơdrong pơtih gia pah ayơ glăi gô pŭ iŏk nhen thoi minh pôm kon sem. ‘Bok Kei-Dei tơ’ngla kơ đĭ đăng lăm plĕnh teh đei rơih iŏk bơih lăm tơdrong pơgơ̆p pơkăm hăm kon bơngai: “Kơplah măt ‘năr mơ̆t boih, glĭp kơmăng mu truh na đei minh pôm tơnuh ŭnh tih lĕch ‘nhui păng đei pla ŭnh soh dơhlông tơ lu kon sem mă đei blah noh hei” (trong 17). Mă tơpă noh Kră Yang bơih thoi ŭnh soh dơhlông tơ lu kon sem mă dei blah noh hei. Minh tơdrong tơ’bôh đei tơiung wă kơ ‘bok Abram băt sĭt topă Kră Yang gô trŏ thoi nơ̆r Sư pơkă.
Nơ̆r pơkă jơ̆ pơkăm gơ̆ng gah minh pah pơrơ̆ng wă pơm, na tơdrong pơgơ̆p pơkăm jơ̆ nơ̆r pơkăm đơ̆ng gah ‘bar pah, đei dan tơdrong păng pŭ iŏk athei khŏm pơm đơ̆ng ‘bar pah. Kră Yang ưh kơ kăl pơjing pơgơ̆p pơkăm yua kơ Sư bơih Tơ’ngla pơm trŏ thoi pơkă. Mă-lei wă kơ pơsĭt hăm Abram, Kră Yang yua tơdrong juăt kon bơngai wă pơgơ̆p pơkăm hăm Abram. Lăm tơdrong juăt pơgơ̆p pơkăm. minh Kră Yang đĕch năm brih lu kon sem đei blah noh. Tơdrong âu wă tơ’bôh pơgơ̆p pơkăm hăm Abram noh lăm tơdrong pơm trŏ thoi nơ̆r Kră Yang pơkă ưh kơ sĭ druh kiơ̆ kơ tơdrong kiơ mă pơsĭt đơ̆ng Abram, mă khan sư thoi yơ hĭ mă-lei Kră Yang oei pơm trŏ tơdrong thoi Sư pơkă bơih. “Lăm năr noh Yêhôwa đei nơ̆r pơkă pơgơ̆p pơkăm hăm Abram, na khan thoi âu: “Inh gô ăn kơ adrĕch adrung ih dêh char âu, đơ̆ng glung Êyiptơ dĭng truh tơ glung tih noh, wă khan glung Ơphrat” (trong 18). Kră Yang hơgăt sơlam hơdral anih teh păng khan lê̆ adrol thoi âu adrĕch adrung ‘bok Abram gô pơm đĭch lăm dêh sư oei, mă-lei gô dŏng tơgŭm lu sư, mă khan lăm tơdrong arih thoi yơ mă jơ năr thoi yơ dơ̆ng, Kră Yang oei pơm trŏ kơ pơgơ̆p pơkăm.
Chăl dang ei rơih krao iŏk bơih lu bơ̆n lăm tơdrong pơgơ̆p ‘nao đơ̆ng Kră Yang Yêsu. Apĭnh Kră Yang ăn kơ lu bơ̆n đĭ jơhngơ̆m lui gơnang păng chu yom, yua kơ Tơ’ngla pơjing pơgơ̆p pơkăm hăm lu bơ̆n noh pơm trŏ thoi pơkă păng ‘bĕnh kơ tơdrong ‘mêm mơnat.
Kơkuh kơ Ih ơ Kră Yang inh bơnê kơ Ih yua kơ tơdrong’mêm mơnat đĕch păng Ih pơm trŏ thoi pơkă bơnê kơ Kră Yang yua kơ tơdrong pơgơ̆p ‘nao đơ̆ng Ih lăm Kră Yang Yêsu wă kơ inh gơh klaih, jing ‘lơ̆ng rơgoh păng gô oei hơdai Ih ling lang ‘bĕnh blai pŭn hiôk mă khan tơdrong arih đei thoi yơ apĭnh tơgŭm inh dơ̆ng kơjăp lui gơnang păng arih rim năr pơm kơ Kră Yang lăp đon, krao khan yua anăn Kră Yang Yêsu Krist, Amen.
Lu bơ̆n hăm oei đĭ jơhngơ̆m lui gơnang lăm tơdrong Sư pơkă dah mă adrin pơgơ̆r kơdih chăl arih hăm tơdrong adrin kiơ̆ kơdih wă?
Đŏk sơ̆p hla bơar nơ̆r ‘Bok Kei-Dei lăm pêng sơnăm: I Têsalônik 2
Kênh Youtube BHKTHN:
































