Chivkeeb 15:7-21
Nqe cim:
“Hnub ntawd tus Tswv txawm coglus tseg rau Anplas hais tias, Kuv yuav muab tagnrho lub tebchaws no pub rau koj cov xeebntxwv, txij ntua ntawm Iziv tus ciamteb los mus txog ntua rau ntawm tus Dej Efalates” (Chivkeeb 15:18)
Lus nug xav:
– Tus Tswv coglus yam dabtsi rau Anplas thiab Nws ua tabpov cov lus ntawd li cas?
– Qhov uas tus Tswv Coglus rau Anplas muaj yam dabtsi tshwjxeeb?
– Peb tas siab ntseeg thiab mus raws li Vajtswv hais li cas?
Tom qab uas tabpov rau Anplas hais tias yuav muaj xeebntxwv coob heev, tus Tswv rov hais txog Nws tej lus cog tseg ua ntej thaud, Nws yuav pub lub tebchaws Kana-as rau Anplas (nqe 7). Thaum Anplas hais kom tus Tswv ua tabpov cov lus cog tseg, Nws hais kom Anplas coj tej tsiaj tua fij rau Vajtswv mus “phua ua ob sab, muab ib sab tso rau ib qho ua ob leej sib ncag zos” (nqe 10). Qhov no yog kev sib coglus hnub thaud (saib Yelemis 34:18) muaj lub ntsiab tias yog tus twg tsis ua raws ces yuav raug zoo li tus tsiaj ntawd. Vajtswv tus uas kav lub ntuj lub ntiajteb kam muab Nws los nrog tibneeg sib coglus ua ke, Vajtswv Txojlus hais tias;“Thaum hnubpoob qho thiab tsaus ntuj kiag lawm, tamsim ntawd txawm muaj ib cub tawg ncho pa auv niab thiab ib teg tsau cig lam lug tshwm los phua plhawv kis nruab nrab ntawm cov nqaij tsiaj ntawd mus lawm” (nqe 17). Tus Tswv uas ua tus duab cub tawg ncho pa auv niab yog tus mus phua plhawv kis nruab nrab ntawm cov nqaij tsiaj. Ib tug duab qhia meej heev, ua rau Anplas pom tias tus Tswv qhov kev tabpov muaj tseeb, Nws yuav tiav Nws tej lus cog tseg.
Lo lus cog tseg yog ib tug txaus siab cog cia thiab ua. Hos kev sib coglus ces yog ob leeg cog, muaj kev ua thiab feem khi ntawm ob leeg ua ke. Tus Tswv tsis cheemtsum kev sib coglus, vim Nws yog tus uas ua li Nws hais. Tiamsis cia kom tabpov rau Anplas, tus Tswv xub muab lub tswvyim ua neeg pheej ua thaum coglus los nrog Anplas coglus ua ke. Hauv txoj cai sib coglus, tsuas yog tus Tswv tib leeg tau mus phua plhawv kis nruab nrab ntawm cov nqaij tsiaj. Qhov no qhia paub qhov kev coglus nrog Anplas no muab tus Tswv qhov kev ua tiav coglus tsis yog ua li Anplas coglus. Txawm yog Anplas yuav zoo li cas los tus Tswv yeej yuav ua tiav yam uas Nws tau coglus tseg. “Hnub ntawd tus Tswv txawm coglus tseg rau Anplas hais tias, “Kuv yuav muab tagnrho lub tebchaws no pub rau koj cov xeebntxwv, txij ntua ntawm Iziv tus ciamteb los mus txog ntua rau ntawm tus Dej Efalates” (nqe 18). Tus Tswv cais meej tus nrim av thiab kuj hais ua ntej tias Anplas cajces yuav raug ua qhev rau lwm haivneeg, tiamsis nws yuav cawm lawv. Txawm yog lub tsamthawj, sijhawm lossis caijnyoog yuav zoo li cas los xij, tus Tswv yeej yuav ua tiav Nws tej lus cog.
Nimno peb tau hu los nyob hauv Tswv Yexus txoj kevcai tshiab, thov tus Tswv pub rau peb muaj kev cia siab thiab ua neeg mloog lus, vim tus Tswv uas coglus rau peb yog tus uas ua kom tiav thiab ua siab ntev.
Thov Vajtswv,
Vajtswv, ua tsaug Koj txojkev koob hmoov pub dawb thiab kev ua tiav li Koj hais. Nyuam yaus ua tsaug qhov tau los nyob hauv Tswv Yexus txoj kevcai tshiab cawm dim, dawbhuv thiab yuav tau nrog Nws nyob mus ibtxhis kaj siab. Txawm yog lub neej yuav zoo li cas los xij, thov Koj pab kom nyuam yaus cia siab thiab ua neej haum Vajtswv siab txhua hnub. Nyuam yaus tuav Tswv Yexus Khetos lub npe thov, Amees.
Peb tabtom ntseeg tas siab rau tus Tswv txojkev ua tiav los yog tus kheej tseem tabtom siv zog ua raws li yus siab nyiam?
Nyeem Vajluskub hauv peb lub xyoo: I Thexalaunikes 2
Kênh Youtube BHKTHN:
































