Filipis 2:14-18
Nqe cim:
“Kom nej thiaj tsis muaj chaw thuam thiab tsis muaj qhov txhaum, ua Vajtswv cov menyuam uas tsis muaj ib qhov phem rau hauv nruab nrab tiam neeg phem thiab nkhaus no, thiab ci rau hauv lawv ib yam li tej hnub qub ci rau lub ntiajteb.” (Filipis 2:15 HMOWSV)
Lus nug xav:
– Sib yws thiab sib cav sib ceg txhais licas?
– Timthawj Paulus muab neeg ntiajteb piv rau dabtsi, thiab nws ntuas Vajtswv cov menyuam yuav tsum ua neej li cas?
– Peb yuav ua neej li cas thiaj ci kaj ib yam li lub teeb nyob hauv ntiajteb?
Timthawj Paulus nqua hu hais tias: “Ib puas tsav yam uas nej ua, nej tsis txhob yws thiab tsis txhob sib cav sib ceg” (nqe 14). Qhov no tsis yog lus ntuas ntsigtxog tus cwjpwm xwb, tiamsis tseem yog lub plag rau lub neej uas ncaj ncees thiab dawb huv. “Yws” yog hais txog kev nroo thiab tsis txaus siab; “Sib cav sib ceg” txhais hais tias sib cam thiab tsis sib haum xeeb. Tej no yeej tshwm sim hauv Pawg Ntseeg txij thaum ub los rau niaj hnub nimno. Qhov ntawd tsis yog teeb meem ntawm kev sib txuas lus xwb, tiamsis qhia tshwm txog lub siab uas tsis muaj kev ntseeg thiab pheej cia tus kheej ua tus tswj txhua yam. Thaum yws, peb poob txojkev xyiv fab thiab tej koob hmoov hauv kev ua haujlwm rau tus Tswv. Tiamsis thaum peb xaiv lub siab ua Vajtswv tsaug thiab mloog lus, ces peb qhia tshwm lub neej uas muaj tus Tswv ua tus nyob nruab nrab.
Timthawj Paulus muab neeg ntiajteb piv rau “cov neeg tsis ncaj thiab muaj txim” lossis “tiam neeg phem thiab nkhaus” yog tiam uas kev txhaum raug suav hais tias tsis ua cas. Nyob qhov ntawd, homphiaj ntawm kev ceev txuag tus kheej tsis txhob yws yog pab kom peb “ua tau neeg zoo uas tsis muaj leejtwg yuav thuam tau, thiab ua tau Vajtswv cov menyuam uas zoo kawg nkaus uas nrog cov neeg tsis ncaj thiab muaj txim nyob ua ke hauv ntiajteb no” (nqe 15). Qhov no qhia meej tias kev ua neej dawb huv tsis yog cais yus tawm hauv ntiajteb mus, tiamsis yog ua neej txawv neeg ntiajteb. Peb tseem nyob hauv qhov chaw kev txhaum puagncig, tiamsis peb yeej ua neej qhia tshwm txog Vajtswv txojkev ncaj ncees. Lub neej ncaj ncees tiag tiag tsuas muaj nqis thaum peb sawv ruaj khov tiv dhau tej kev ntxias thiab tej kev phem kev qias hauv ntiajteb no.
Txawm peb nyob hauv “tiam neeg phem thiab nkhaus” ntawd, los Vajtswv cov menyuam yuav tsum “qhia Vajtswv txojlus uas cawm neeg txojsia” thiab “ci kaj ib yam li tej hnub qub hauv ntiajteb” (nqe 15b HMOWSV). Thaum peb lub neej tau Tswv Yexus Khetos pauv hloov lawm, qhov kaj yuav cim civ ci tawm dhau ntawm peb txojkev ua neej, tej lus peb hais thiab tej uas peb ua rau lwm tus. Thiab tus yuamsij pab kom peb tuav tau lub neej dawb huv yog “qhia Vajtswv txojlus uas cawm neeg txojsia.” Yog peb tsis tuav ruaj Vajtswv Txojlus, peb yuav yooj yim qaug rau lub ntiajteb txojkev dag ntxias. Tiamsis thaum Vajtswv Txojlus nyob hauv peb lub siab, Nws Txojlus yuav coj peb tej kev xav, tej lus hais thiab tej haujlwm uas peb ua. Qhov tseemceeb, Timthawj Paulus tsis suav lub neej no yog ib lub nra hnyav, tiamsis yog ib txojkev xyiv fab. Nws muab nws tus kheej piv zoo li ib qho khoom fij, thiab nws zoo siab rau qhov ntawd (nqe 17-18).
Ib lub neej dawbhuv tsis yog ua neej txomnyem, tiamsis yog ua neej muaj nqis, fij tus kheej rau tus Tswv thiab coj txiaj ntsig zoo mus rau lwm tus. Qhov tseeb, ua neej dawbhuv hauv ntiajteb yeej tsis yooj yim. Peb yuav ntsib tej kev nyuaj siab, kev dag ntxias thiab kev ua neej txawv peb txojkev ntseeg. Tiamsis thaum nyob hauv tej tsamthawj zoo li ntawd, peb lub teeb haj yam ci pom kev tseeb. Thaum peb xaiv ua ncaj hauv kev dag nxtias, xaiv sib hlub hauv kev qia dub, thiab xaiv txo hwjchim hauv kev khavtheeb, ces yog peb twb ci kaj rau neeg ntiajteb pom lawm ntag.
Thov Vajtswv,
Tus Tswv, thov pab nyuam yaus tso kev yws thiab kev sib cav tseg, tuav rawv Koj Txojlus thiab ua neej ncaj ncees txhua hnub. Thov hloov nyuam yaus lub neej ua tau teeb ci kaj hauv ntiajteb, kom Koj lub npe tau koob meej. Nyuam yaus tuav Tswv Yexus Khetos lub npe thov, Amees.
Peb lub neej tabtom qhia tshwm Yexus Khetos lub teeb ci kaj hauv ntiajteb no li cas?
Nyeem Vajluskub hauv peb lub xyoos: Yauj 34
Kênh Youtube BHKTHN:
