II Timôthê 2:3-13
“Mă ih truh tơdrong pơmat, ih kư̆ adrin bơtho đĕch thoi inh dang ei mơ̆n. Thoi noh na ih jing linh ‘lơ̆ng Kră Yang Yêsu Krist.” (II Timôthê 2:3)
Nơ̆r jet tơchĕng pơwao:
– Lu rup ayơ mă ‘Bok Pôl đei tơlĕch wă tơ’bôh tơdrong jang pơmat tat?
– Sư đei tơ’bôh ‘bar kơmĭl ayơ wă pơtrŭt ‘Bok bơtho oei tơdăm Timôthê păng lu bơ̆n chu iŏk pơmat tat yua kơ Tơdrong ‘Nao ‘Lơ̆ng?
Chĭt ming tơdrong hiôk ‘lơ̆ng đơ̆ng Kră Yang ăn, pran kơtang năm chă ră roi păng wă chu iŏk pơmat tat yua kơ Tơdrong ‘Nao ‘Lơ̆ng jơ̆ lu kơ̆l ‘bai mă ‘Bok Pôl đei chih lăm chăl 1. Yak năm lăm chăl 2, ‘bok Pôl bơtho ‘bok Timôthê athei mă nuih pran kơtang mă loi lăm tơdrong bơtho pơhrăm păng chu iŏk pơmat tat. Sư yua pêng tơdrong rup wă krao pơtơm bơngai jang hơdai mă oei tơdăm jang hăm sư “chu pơmat” (trong 3). Mă mônh, sư krao pơtơm bơngai kon lăm tơdrong lui noh chu iŏk pơmat tat thoi bơngai pơm linh, minh jơhngơ̆m đon wă pơhiôk Kră Yang ‘Bok Kei-Dei (trong 4). Tơdrong “ưh kơ wă pơ yua kơ bơ̆n kơdih” ‘nâu ưh kơsĭ kơ wă tơklah lê̆ tơdrong arih bơngai lui jing ‘bar trong: gah bơhngol păng gah sĕch akar. Mă-lei ‘Bok Pôl đei khan tơbăt mă tơdrong kiơ kiơ ‘nĕ kơ pơm rok, mă khan nhen lăm “tơdrong lui ră”, noh wă pơgăn lu bơ̆n lăm tơdrong jang kăl tơm ưh kơ pơm kơ Kră Yang lăp đon, thoi kơ jơhngơ̆m đon bơngai linh pơm kơ yŏng sư lăp đon. Lăm tơdrong jang awih awăn, lu bơ̆n kăl kơ lăng lăng bơ̆n kơdih, hăm bơngai mă bơ̆n jang noh hăm lăp đon kơ bơ̆n jang ‘bok bơtho, jing bơngai wei-lăng, lu ‘nhŏng mai oh bơ̆n lăm Hnam Akŭm, dah hăm Kră Yang?
Mă ‘bar, bơngai bơ̆jang athei đei jơhngơ̆m đon “pơthi băl kiơ̆ kơ tơdrong juăt”. Bơngai bu ưh kơ kĕ na khô̆i jơ̆ng buăl juăt sư dah tơlơ̆ buăl sư (trong 5).
‘Nâu bơih jơhngơ̆m đon wă chu yom pơm kiơ̆ mă tơpă tơdrong kiơ mă đei bơtho tơ’bôh hăm lu bơngai bơ̆jang kơ kră Yang, ‘nâu bơih đei bơtho tơ’bôh đơ̆ng Nơ̆r kră Yang ưh kơsĭ đơ̆ng kon bơngai ôh kư̆m ưh kơsĭ đơ̆ng bơ̆n kơdih khan trŏ, khan ‘lơ̆ng. Bơngai kơdâu pơjei trŏ tơdrong juăt gô đei apah agăl pơkao; thoi yơ na lu bơngai bơ̆jang kơ Kră Yang kư̆m athei chu kiơ̆ Kră Yang bơtho tơ’bôh thoi noh mơ̆n, na gơh đei kĕch iŏk ‘ba thoi ei mơ̆n.
Mă pêng, bơngai bơ̆jang kăl kơ chơ̆n jơhngơ̆m thoi bơngai jang mir ‘ba “hơdrol hloh đei kĕch yuă iŏk” (trong 6), ‘Bok Pôl đei pơtrŭt bơngai bơ̆jang chu iŏk pơmat na gơh đei kĕch yuă iŏk lĕch đơ̆ng adrin păng chu iŏk pơmat tat đơ̆ng bơ̆n kơdih.
Trong 8-13, ‘Bok Pôl đei tơlĕch ‘bar kơmĭl kăl kơ rok gah đei jơhngơ̆m chu iŏk pơmat; Kră Yang Yêsu păng sư kơdih. Đei tŏ rup đei tơ’bôh âu sư wă bơtho ‘Bok bơtho oei tơdăm âu păng lu bơ̆n dang ei mơ̆n, wă kơ đĭ jơhngơ̆m bơ̆jang wă chu iŏk pơmat, athei lăng tơ Kră yang Yêsu, ‘Bok mă chu iŏk pơmat yua kơ lu bơ̆n, păng lăng tơ kơmĭl đơ̆ng ‘Bok Pôl jơ̆ bơngai mă kĕ chu iŏk pơmat tat yua kơ đơ̆ng Kră Yang rơih iŏk păng sư pơtrŭt lu bơ̆n hăm nơ̆r sĭt tơpă: “Tơdrong âu sĭt tơpă: Dah bơ̆n chu lôch kiơ̆ Yêsu, lei bơ̆n gô iung arih oei hơdai hăm Sư. Dah bơ̆n đei tơdrong gleh pơmat tat, bơ̆n oei adrin kiơ̆ Sư khŏm khŏm, lei bơ̆n kư̆m pơgơ̆r hơdai hăm Sư ning mônh mơ̆n. Dah bơ̆n achăng Sư dang ei, lei pă jor Sư kư̆m achăng bơ̆n ning mônh (trong 11-12). Apinh KrăYang ăn kơ lu bơ̆n ling-lang wă chu iŏk pơmat tat yua kơ anăn Sư păng yua kơ lu bơhngol mă oei hiong răm.
Ơ Kră Yang, inh bơnê kơ Kră Yang Yêsu yua kơ Sư jơ̆ kơmĭl ‘lơ̆ng tôm tơdrong ăn kơ inh kĕ chu iŏk pơmat tat. Apinh tơgŭm inh bơ̆jang hăm tơdrong jang pơm kơ Ih lăp đon, păng chu yom kiơ̆ thoi Ih bơtho tơ’bôh. Yua anăn Kră Yang Yêsu Krist, Amen.
Pơm thoi yơ wă kơ lu bơ̆n kư̆m arih hăm đei jơhngơ̆m kĕ chu iŏk pơmat lăm tơdrong jang kơ Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Jop 28
Kênh Youtube BHKTHN:
