Klei Aê Diê Blŭ: II Y-Timôthê 2:1-2
Êlan kliăng: “Ya klei ih hmư̆ leh mơ̆ng kâo ti anăp lu phung hưn bi sĭt, brei ih jao klei anăn kơ phung mnuih sĭt suôr srăng dưi mtô kơ phung mkăn msĕ mơh.” (II Y-Timôthê 2:2)
Klei êmuh ksiêm mĭn: Ya klei Khua ƀĭng kna Y-Pôl iêô mthưr Khua pô mtô hlăk ai Y-Timôthê? Si klei ñu mtô hdră hriăm mjuăt,mjing phung đăo? Si klei Grăp čô phung đăo mâo bruă klam đru mtô phung drei pô kriê dlăng ?
Leh mđĭ ai tiê mâo klei jhŏng hưn bi sĭt kơ Khua Yang (II Y-Timôthê 1:8), Khua ƀĭng kna Y-Pôl lŏ dơ̆ng iêô mthưr Khua pô mtô hlăk ai Y-Timôthê brei “jing ktang bĕ hŏng klei pap hlăm Krist Yêsu” (êlan 1). Jing pô hlăk ai, ƀiă klei thâo leh anăn ƀiă klei thâo săng êlam mkă hŏng ama hlăm klei đăo pô, ƀiădah Khua ƀĭng kna Y-Pôl mtă kơ Y-Timôthê brei jhŏng kriê kjăp klei đăo leh anăn bi leh bruă klam Aê Diê jao ti Êphêsô.
Êlan 2 brei kơ drei dŭm klei ktrâo atăt klă kơ hdră mjuăt bi hriăm phung ƀĭng kna kjăp ktang kơ Khua Yang. Tal sa, bruă mtô Klei Aê Diê Blŭ leh anăn bi mjing phung ƀĭng kna jing bruă brei ngă nanao hlăm lu ênuk gưl. Mâo pă ênuk gưl dưi lač ti nei: Ênuk gưl “kâo” jing Khua ƀĭng kna Y-Pôl, ênuk gưl ” anak” jing Y-Timôthê, ênuk gưl mâo Y-Timôthê “jao wĭt”, leh anăn ênuk gưl “phung mkăn.” Klei anei brei ƀuh bruă “mtô kơ jih jang mnuih” hlue si klei Khua Yang Yêsu jao hlăm Y-Mathiơ 28:19 amâo dưi mjưh knŏng kơ gưl phung khua thŭn, mâo lu klei thâo kral Aê Diê ôh, ƀiădah brei jing bruă ngă nanao mơ̆ng grăp čô phung đăo “sĭt suôr”.
Tal dua, hdră Khua ƀĭng kna Y-Pôl ba mdah dưi hlue ngă sơăi: “jao”, amâodah lŏ mtô kơ pô mkăn “Ya klei ih hmư̆ leh mơ̆ng kâo” (êlan 2). Hriăm leh anăn thâo săng ya klei, brei lŏ mtô klei anăn. Boh sĭt, mnuih hriăm lu hĭn jing pô lŏ mtô ya klei pô thâo săng leh. Drei đăm mtô ôh ya klei drei ka hriăm, ka thâo, ƀiădah kăn brei drei bi kdung kơ mmông “thâo djăp” leh kơh lŏ mtô, kyuadah knư̆ hriăm, drei knư̆ ƀuh klei thâo săng pô adôk điêt đei. Klei hriăm jing bruă ngă jih klei hdĭp. Kyuanăn, brei drei amâo mâo mdei ôh hriăm mơ̆ng phung nao êlâo, leh anăn brei drei mprăp mtô kơ mnuih mkăn ya klei drei hriăm leh.
Tal tlâo, hnơ̆ng čuăn ruah mnuih čiăng mtô jing “sĭt suôr”. Boh blŭ anei lač kơ knuih sĭt suôr leh anăn ăt lač kơ klei pap Aê Diê brei. Boh blŭ “dưi mtô kơ phung mkăn” jing “čiăng kơ diñu mâo klei thâo mtô bi hriăm pô mkăn” (êlan 2). Khua pô mtô hlăk ai Y-Timôthê brei duah phung sĭt suôr čiăng mjuăt bi hriăm jing mnuih mtô pô mkăn.
Klei Aê Diê Blŭ dưi bi lar hŏng klei mtô mơ̆ng ênuk anei truh kơ ênuk mkăn, kyua anăn Phung Sang Aê Diê brei mâo nanao phung sĭt suôr thâo mtô klei đăo hlăm dŭm boh adŭ hriăm Klei Aê Diê Blŭ aguah knăm kjuh, êpul djă bruă mdê mdê. Amĭ ama ăt brei mâo klei mjuăt bi hriăm čiăng mtô kơ anak čô pô hlăm êlan Aê Diê. Grăp čô đăo brei mâo bruă klam mtô kơ phung pô đua klam kơ diñu čiăng kơ Phung Sang Aê Diê dưi rŭ mdơ̆ng leh anăn đĭ kyar kjăp ktang.
Hlei pô “sĭt suôr” čiăng kơ drei “jao” ya klei pô hriăm leh kơ digơ̆?
Wah lač: Ơ Khua Yang, kâo mni lač jăk kơ Ih kyua kâo ngă leh leh anăn dôk dưi rông ba kyua mơ̆ng phung mtô klei đăo sĭt suôr. Akâo kơ Ih đru kâo ăt sĭt suôr jao ya klei pô hmư̆ leh, hriăm leh kơ pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
