Klei Aê Diê Blŭ: II Y-Timôthê 1:13-18
Êlan kliăng: “Brei ih tui hlue klei bi hmô tui si klei blŭ doh ih hmư̆ leh mơ̆ng kâo, hlăm klei đăo leh anăn klei khăp hlăm Krist Yêsu.” (II Y-Timôthê 1:13)
Klei êmuh ksiêm mĭn: Ya jing “Klei bi hmô tui si klei blŭ doh” leh anăn “Djă pioh klei jăk”? Êlan 15-18, čih anăn dua êpul mnuih mdê mdê. Ti êpul anăn? Lŏ dlăng wĭt ktuê êlan tui hlue Khua Yang, drei ƀuh drei dôk hlăm ti êpul mnuih hlăm klei dôk dơ̆ng ƀơ̆ng huă hŏng pô mkăn?
Tơdah yua dua pruê̆ blŭ čiăng klah čŭn kdrêč tal 1 hlăm hră II Y-Timôthê, snăn anăn jing pruê̆ blŭ “brei lŏ bi hdơr kơ klei pap” leh anăn “djă pioh”. Tơdah “lŏ bi hdơr klei pap” djŏ tuôm kơ klei iêô mthưr mă bruă, snăn “djă pioh” djŏ tuôm kơ klei “Klei bi hmô tui si klei blŭ doh” leh anăn “djă pioh klei jăk” (êlan 13, 14). Boh blŭ “bi hmô” jing “klei čih mkra mơ̆ng phung kač rup rŭ mdơ̆ng”, brei ƀuh mâo sa hnơ̆ng čuăn kơ klei mtô phung đăo hlăm Phung Sang Aê Diê tal êlâo, čiăng mơ̆ng anăn klei hriăm kơ klei đăo leh anăn klei mtô dưi bi mklă. Klei bi hmô anei jing klei êkei hlăk ai Y-Timôthê hmư̆ leh leh anăn mă mơ̆ng Khua ƀĭng kna Y-Pôl. Lač mkăn, anăn jing klei sĭt nik Klei Mrâo Mrang Jăk dưi hiu hưn kơ Y- Timôthê . Hŏng “bi hmô” leh anăn djă pioh Klei Mrâo Mrang Jăk anei, bruă drei ngă jing brei “djă” (êlan 13-14). Tơdah bi mlih klei bi hmô anăn, drei amâo lŏ jing hnơ̆ng mkă mkăn čiăng ksiêm dlăng djŏ amâodah soh ôh. “Djă” jing sĭt suôr hŏng Klei Mrâo Mrang Jăk, hŏng Klei Aê Diê Blŭ. Tur knơ̆ng čiăng “djă” jing “hlăm klei đăo leh anăn klei khăp hlăm Krist Yêsu” (êlan 13).
Êlan 15-18 lač kơ sa klei sĭt suôr mkăn: sĭt suôr hŏng phung dĭng buăl kjăp Aê Diê. Boh blŭ “bi juh kâo leh jêñ jêñ”, “arăng kă kâo hŏng klei săng đai” brei drei ƀuh anei jing wưng mmăt tĭt hŏng Khua ƀĭng kna Y-Pôl. Sa hlăm dŭm mta phŭn ngă kơ ñu tuôm hŏng klei dleh dlan jing kyua “jih phung hlăm čar Asi lui kâo leh” (êlan 15). Y-Phijêl leh anăn Y-Hermôgen hưn mdah anăn klă klơ̆ng, năng ai kyua diñu tuôm jĕ giăm ñu, ngă kơ klei ruă ai tiê arăng lui ƀrư̆ êlam hĭn hlăm ñu. Khădah snăn, hlăm boh klei anăn, Khua ƀĭng kna Y-Pôl amâo djŏ knŏng dlăng hlăm boh sĭt năng ênguôt ôh, ñu ăt hdơr knga leh anăn mpŭ kơ phung dôk giăm ñu, msĕ si Y-Ônêsiphôr leh anăn “mnuih ti ƀuôn Êphêsô”(êlan 18). Ñu mâo klei bi juh prŏng mơ̆ng klei digơ̆ sĭt suôr.
Sĭt suôr hŏng Klei Aê Diê Blŭ jing klei mđing tal êlâo, khădah snăn, Phung đăo kơ Krist huĭ mpŭ găn dŭm ênuk ăt mâo klei mtô amâo “lui” phung ayŏng adei sĭt suôr hŏng Krist, phung mă bruă mbĭt, phung ktrâo atăt klei hdĭp myang diñu pô. Hruê anei, klei sĭt suôr amâo lŏ mâo klei mpŭ ôh. Drei kreh mđing êlâo hĭn kơ dŭm klei tŭ dưn kơ pô hĭn kơ klei sĭt suôr hŏng pô mkăn. Lu mnuih lač knŏng brei drei jing sĭt suôr hŏng Aê Diê, amâo djŏ ôh brei drei jing sĭt suôr hŏng mnuih. Ƀiădah Aê Diê amâo čiăng kơ drei jing sĭt suôr hŏng Ñu ƀiădah lui hĕ phung mă bruă mbĭt hŏng drei, ƀĭng găp drei, êpul biăp drei, phung mtô klei đăo kơ drei tơdah amâo mâo mta phŭn djŏ ôh, boh nik êjai digơ̆ tuôm hŏng klei knap mñai kyua Aê Diê.
Si ngă čiăng kơ drei kriê pioh, amâo lui klei sĭt nik Klei Mrâo Mrang Jăk pô mă tŭ leh?
Wah lač: Ơ Khua Yang, akâo kơ Ih brei klei myang mơ̆ng Yang Mngăt Jăk leh anăn klei đăo čiăng kơ kâo djă pioh Klei Mrâo Mrang Jăk kâo mă tŭ leh hŏng klei đăo leh anăn klei khăp hlăm Ih. Akâo kơ ih đru kâo djă pioh, amâo lui tơl hruê bi tuôm hŏng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
