2 Timautes 1:13-18
Nqe cim:
“Koj yuav tsum muab tej lus tseeb uas kuv qhia rau koj lawm los ua yamntxwv thiab muab siab rau ntseeg thiab hlub lwm tus. Rau qhov Vajtswv xav kom peb txhua tus uas nrog Yexus Khetos sib raug zoo lawm muaj lub siab zoo li ntawd” (2 Timautes 1:13)
Lus nug xav:
– “Ua yamntxwv thiab muab siab rau ntseeg” thiab “saib tej uas Vajtswv muab tso rau koj lawm zoo zoo” yog dabtsi?
– Nqe 15-18, hais npe ob pab neeg sib txawv, ntawd yog ob pab neeg twg?
– Tig saib ncua kev nrog tus Tswv mus dhau los, peb pom yus yog pab neeg twg hauv tus cwjpwm coj rau lwm tus?
Yog peb siv ob lo lus los sau zog 2 Timautes tshooj 1, ces yog “yam uas Vajtswv pub rau koj” thiab “ceev cia”. Yog lo lus “yam uas Vajtswv pub” ntsig txog Vajtswv txoj kev hu kom ua haujlwm rau Nws, ces lo lus “ceev cia” txuas ncaj qha rau kev “ua yamntxwv thiab muab siab rau ntseeg” thiab “saib tej uas Vajtswv muab tso rau koj lawm zoo zoo” (nqe 13–14). Lo lus “yam ntxwv” txhais tau hais tias zoo li “daim qauv kos uas tus kws tsim vajtse kos tseg”, tus yam ntxwv qhia kev ntseeg, kev qhuab qhia no muaj nyob hauv pawg ntseeg xubthawj los ua qauv rau peb paub qhov tseeb qhov cuav. Tus yamntxwv no yog tej uas tus hluas Timautes tau hnov thiab tau txais los ntawm timthawj Paulus. Hais ua lwm seem, ntawd yog Txojmoo Zoo tseeb uas tau tshaj tawm qhia rau Timautes. Hais txog “yam ntxwv” thiab yam uas muab tso rau Timautes ntawm Txojmoo Zoo no, peb txoj haujlwm yog yuav tsum “ceev cia” (nqe 13–14). Yog peb hloov tus yam ntxwv ntawd lawm, ces peb yuav tsis muaj ib tus tshim twg los ntsuas thiab ntaus nqi saib yog los txhaum. Lo lus “ceev cia” txhais hais tias ua ncaj ncees thiab muab siab npuab Txojmoo Zoo uas yog Vajtswv Txojlus. Lub hauv paus uas pab kom peb “ceev cia” tau ruaj khov yog “muab siab rau ntseeg thiab hlub lwm tus. Rau qhov Vajtswv xav kom peb txhua tus uas nrog Yexus Khetos sib raug zoo lawm muaj lub siab zoo li ntawd” (nqe 13)
Nqe 15-18 hais txog lwm txoj kev ncaj ncees: ua ib tus tub txib ncaj ncees rau tus Tswv. Lolus “rau qhov nws txhawb kuv lub zog ntau zaus los lawm”, “tsis txajmuag rau qhov uas kuv raug kaw rau hauv tsev lojcuj li” Nov pom hais tias lub sijhawm ntawd yog ib lub sijhawm tsaus ntuj nti rau timthawj Paulus. Ib qho vimchiv uas ua rau Paulus ntsib kev nyuaj siab yog “cov neeg uas nyob hauv lub xeev Axias Yau tau tso kuv tseg lawm” (nqe 15). Cov neeg ntawd muaj ib tug hu ua Finkelus thiab ib tug hu ua Hemaunkenes. Tej zaum vim lawv ib txwm nyob ze Paulus thiab nrog nws ua Vajtswv tes haujlwm, yog li thaum lawv tso nws tseg haj yam ua rau nws mob heev ntxiv. Txawm li ntawd los, thaum nyob hauv lub tsamthawj no, timthawj Paulus tsis yog tsuas tig saib tej kev nyuaj siab xwb, tiamsis nws tseem nco cov neeg uas tseem nyob ntawm nws ib sab txiajntsig xws li Aunexifaulus thiab cov uas nyob hauv Efexaus (nqe 18). Lawv txoj kev ncaj ncees thiab kev mob siab Paulus ua rau nws tau txais kev nplij siab thiab txhawb zog kawg nkaus.
Muab siab npuab Vajtswv Txojlus yog qhov tseemceeb tshaj plaws, tiamsis cov ntseeg uas hwm Vajtswv hauv txhua tiam dhau los kuj tau qhia hais tias tsis txhob “tso tseg” peb cov kwvtij nkauj muam uas muab siab npuab tus Tswv, cov uas koom tes ua Vajtswv tes haujlwm nrog peb, thiab cov uas coj peb rau sab ntsujplig. Niaj hnub no, kev ncajncees tsis tshua muaj neeg saib tseemceeb lawm. Peb feem ntau muab yam uas muaj nqi rau peb tus kheej tso ua ntej, es tsis ua ncaj ncees rau lwm tus lawm. Coob tus xav hais tias tsuas cheemtsum ua ncaj ncees rau Vajtswv xwb tsis tsum ua ncaj ncees rau tibneeg. Tiamsis Vajtswv tsis xav kom peb hais tias peb muab siab npuab Nws es tsis muaj lajthawj tsim nyog los cia li tso tseg cov neeg uas koom tes nrog peb ua haujlwm ua ke, cov phooj ywg, cov yaj uas Vajtswv muab rau peb saib xyuas, lossis cov uas qhia Vajtswv Txojlus rau peb, tshwjxeeb yog thaum lawv tabtom ntsib kev nyuaj siab vim yog lawv muab siab npuab tus Tswv.
Thov Vajtswv,
Tus Tswv, thov Koj pub Vaj Ntsujplig lub hwjchim thiab kev ntseeg rau nyuam yaus, kom nyuam yaus thiaj ceev tau Txojmoo Zoo uas nyuam yaus tau txais los ntawm Koj, kom nyuam yaus muaj lub siab ntseeg ruaj thiab hlub Koj. Thov pab kom nyuam yaus tuav rawv Txojmoo Zoo no, tsis txhob tso tseg, mus txog hnub uas nyuam yaus tau ntsib Koj. Nyuam yaus tuav Tswv Yexus Khetos lub npe thov, Amees.
Yuav ua li cas kom peb ceev tau Txojmoo Zoo uas peb tau txais lawd tsis txhob tso tseg?
Nyeem Vajluskub hauv peb lub xyoos: Yauj 26
Kênh Youtube BHKTHN:
