Klei Aê Diê Blŭ: I Kôrantô 9:1-14
Êlan kliăng: “Ƀiădah hmei amâo yua klei dưi anăn ôh. Hmei gĭr tŭ jih jang klei, huĭdah bi gun êlan klei mrâo mrang jăk Krist” (I Kôrantô 9:12b)
Klei êmuh ksiêm mĭn: Si ngă Khua ƀĭng kna Y-Pôl yua kơ ñu pô klei mtô kơ klei êngiê hlăm kdrêč 8? Ñu brei thâo ya klei dưi ñu mâo leh anăn ya ngă ñu amâo mă tŭ ôh klei dưi anăn?
Amâo djŏ Khua ƀĭng kna Y-Pôl knŏng mtô ƀiădah amâo ngă ôh. Ñu mă yua kơ ñu pô hdră êlan hdĭp amâo brei ôh klei êngiê pô bi têč hnêč kơ phung ayŏng adei đăo awăt (I Kôrantô 8:13). Jih kdrêč 9, ñu êmuh lu klei êmuh amâo čiăng kơ klei lŏ wĭt lač ôh brei ƀuh kơ ñu mâo anôk kna kluôm dhuôm hlăm klei yua klei dưi čiăng mă tŭ mnơ̆ng đru hrô kơ klei ngă bruă ngă sang čhiăm duah mnơ̆ng ƀơ̆ng huă kơ ñu pô. Ƀiădah ñu čuăn amâo yua ôh klei dưi anăn čiăng đăm bi gun êlan klei mrâo mrang jăk Krist (êlan 12).
Hlăm êlan 1-6, Khua ƀĭng kna Y-Pôl blŭ tui si klei ñu jing khua ƀĭng kna leh anăn pô ba Klei Mrâo Mrang Jăk kơ phung đăo ti ƀuôn Kôrantô. Hŏng klei jing anei, amâo djŏ knŏng hjăn ñu ôh năng mă tŭ klei đru mnơ̆ng ƀơ̆ng huă, ƀiădah ñu leh anăn Y-Ƀarnaƀas ăt mâo wăt klei dưi “atăt ba hŏng hmei sa čô mô̆, msĕ si phung khua ƀĭng kna mkăn leh anăn phung adei Khua Yang, wăt Y-Sêphas” (êlan 5). Hlăm êlan 7-8, ñu lŏ blŭ tui si klei bhiăn djŏ hlăm klei hdĭp: Sa čô kahan amâo tuôm bi liê prăk ñu pô ôh, pô pla đang boh kriăk ƀâo ƀơ̆ng boh gơ̆, pô rông mnơ̆ng srăng mnăm êa ksâo digơ̆. Tơdah klei bhiăn aguah tlam anăn guôp mơh tơdah yua kơ bruă myang, snăn tui si klei mtă mơ̆ng klei bhiăn Klei Bi Mguôp Hđăp: “Đăm guôm hĕ amung êmô juă mdiê” ôh, Khua ƀĭng kna Y-Pôl êmuh: “Aê Diê mĭn knŏng kơ êmô mơ̆? Amâo djŏ hĕ Ñu blŭ klei anăn kyua drei?” Leh anăn ñu lŏ wĭt lač klă: “Ñu lač klei anăn kyua drei yơh, kyuadah jing djŏ pô kai hma srăng kai hŏng klei čang hmăng, leh anăn pô juă mdiê srăng juă hŏng klei čang hmăng srăng mâo kơ ñu đa” (êlan 9-10). Čiăng lač jưh ti klei phung khua ƀĭng kna mkăn bhiăn ngă, tui si klei bhiăn djŏ kơ klei hdĭp, wăt tui si klei bhiăn Klei Bi Mguôp Hđăp, ñu mâo klei dưi mă tŭ sơăi klei đru brei mnơ̆ng ƀơ̆ng huă kơ bruă hiu hưn Klei Mrâo Mrang Jăk hrô kơ klei ñu ngă bruă čhĭt sang čhiăm. Ƀiădah lĕ, Khua ƀĭng kna Y-Pôl ngă klei bi hmô kơ pô “amâo yua” klei dưi anăn ôh, “huĭdah bi gun êlan Klei Mrâo Mrang Jăk Krist” (êlan 12). Ñu amâo yua ôh klei êngiê ñu čiăng kơ Klei Mrâo Mrang Jăk Khua Yang dưi hưn kơ pô mkăn hŏng klei êngiê. Ñu duah mă mnơ̆ng ƀơ̆ng huă kơ ñu pô, hrô kơ klei mă tŭ mnơ̆ng đru mơ̆ng phung ñu tuôm mtô leh, čiăng kơ phung mkăn amâo tuôm hŏng klei dleh ôh tơdah mă tŭ Klei Mrâo Mrang Jăk.
Tui knuih hdĭp mă bruă mơ̆ng Khua ƀĭng kna Y-Pôl, amâo djŏ ôh tơdah mâo klei dưi, mâo sa klei êngiê ngă sa mta klei snăn drei srăng ngă mtam yơh klei anăn amâo lŏ uêñ ôh kơ jih jang klei mkăn. Akâo Khua Yang đru drei mă bruă kơ Ñu hŏng ai tiê mĭn nanao êlâo hĭn kơ mngăt ka mâo klei bi mtlaih ôh. Jhŏng lui hĕ klei tŭ dưn leh anăn klei êngiê drei čiăng kơ Klei Mrâo Mrang Jăk Khua Yang dưi hưn kơ lu mnuih.
Ya klei drei čuăn amâo srăng ngă ôh kyua klei tŭ dưn pô mkăn?
Wah lač: Ơ Khua Yang, tơdah mâo klei srăng bi têč hnêč kơ phung ayŏng amai adei kâo, akâo Khua Yang đru kâo thâo săn asei bi mđĭ ai phung ayŏng adei hlăm klei đăo čiăng hŏng klei anăn lu mnuih srăng mâo klei bi mtlaih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
