Mathiơ 26:17-25
“Inh Kon Bơngai gô lôch ‘blep trŏ thoi đe chih roi lê̆ hơdrol lăm sơ̆p hla bơar ‘Bok Kei-Dei. Mă-lei mơnat kơ bơngai mă plơ̆ plĕch Inh noh đĕch pŭ tơdrong pơmat, ‘lơ̆ng hloh đe dah lê̆ kơ tơpŭ kơ sư sơ̆!” (Mathiơ 26:24)
Nơ̆r jet tơchĕng pơwao:
– Kră Yang Yêsu păng lu bơngai pơhrăm năm pơm Giĕng Năm Brih tơyơ?
– Kơplah oei sŏng sa Kră Yang khan kiơ hăm lu bơngai pơhram păng Sư gah tơdrong arih bơngai plơ̆ plĕch Kră Yang?
– Dang ei, Kră Yang khă bơ̆n thoi yơ?
Giĕng Năm Brih noh giĕng tih lu bơngai Juđê, rim hnam dơnŏ hơmet kơ năr giĕng ‘nâu, Kră Yang Yêsu păng lu bơngai pơhrăm păng Sư kư̆m lei lăi. Kiơ̆ kơ Sơ̆p hla bơar Tơdrong ‘Nao ‘Lơ̆ng Luka 22:7-13, Kră Yang Yêsu athei Pêtrôs păng Yôhan năm adrol wă hơmet anih kơ Kră Yang păng lu bơngai pơhrăm păng Sư pơm giĕng. Lu sư pơm kiơ̆ nơ̆r Kră Yang Yêsu athei, năm kiơ̆ minh ‘nu bơngai chĕp kơthŭng đak mơ̆t na apinh anih ăn kơ Yêsu păng lu bơngai pơhrăm păng Sư wă pơm Giĕng Năm Brih “Biĕm apinh sư thoi noh, sư gô tơ’bôh kơ biĕm minh pôm anih să tôch tơ kơpal ti, đei bơ̆n gơ’bang tangdŏ sư hơmet lê̆ tôm boih, na biĕm hơmet kơ bơ̆n tơmam sa tơ ei.” (Luka 22:12).
Tơmam sŏng sa lăm năr Giĕng Năm Brih lu bơngai Juđê, đei ‘BĔNG MI ƯH KƠ ĐEI PUIH PÔNG, ‘nhot tăng, sik hơmu. Lu sư rơih păng pơlôch minh pôm kon triu tơ hnam akŭm, iŏk pham dan tơ chơnang soi, păng ‘buh minh pôm kon triu noh, đơ̆ng noh pơtơm giĕng sŏng sa. Kơplah oei sŏng sa drơ̆m kơsơ̆ ‘năr mơ̆t, hơdai hăm lu bơngai pơhrăm păng Sư, Kră Yang Yêsu khan: “Kơplah lu sư oei sŏng sa Yêsu khan: “Inh khan kơ iĕm tơpă, đei minh ‘nu lăm lu iĕm dang ei wă plơ̆ plĕch Inh.” (trong 21). Ưh kơ sĭ khan roi kơnê̆ kơ ‘bok Juđa Ikariôt ôh, mălei Sư wă tơ’bôh tơdrong ‘mêm păng tơdrong mơnat ăn kơ Juđa. Sư kăl kơ hơmet jơhngơ̆m păng băt đei yua đơ̆ng plơ̆ plĕch Kră Yang krưp dêh, wă kơ đei jơ năr tơbral wih brŏk. Lu bơngai pơhrăm păng Sư sơleng kơ đon păng jet Yêsu hăm trŏ kơ inh ưh, păng Juđa Ikôriôt kư̆m jet thoi noh: “Na Juđa bơngai wă plơ̆ plĕch Sư ei khan: Ơ ‘Bok Thây, inh hă? Yêsu khan: Trŏ boih, ih wă plơ̆ plĕch Inh.” (trong 25). Kră Yang Yêsu tơl pă minh ‘măng dơ̆ng noh nơ̆r pơma jăng khan tơbăt kơ ‘bok Juđa. Lăm trong 24 Kră Yang Yêsu khan hơđăl tơdrong tơdă dŏng pơklaih đei hơmet lê̆ bơih păng gô pơm pơkeh, mă khan đei ‘bok Juđa Ikariôt dah ưh “Mơnat kơ bơngai mă plơ̆ plĕch ‘noh đĕch pŭ tơdrong pơmat!”. Yua kơ plơ̆ plĕch Kră Yang, ‘bok Juđa Ikariôt gô pŭ iŏk tơdrong pơmat krưp dêh, mălei sơ’ngon dêh jơhngơ̆m ‘bok Juđa ưh kơ tơdrŏ!
Dang ei, Kră Yang kư̆m oei yua trong ‘nâu dah trong nai wă khă tơbăt kơ bơ̆n băt dôm tơdrong glăi bơ̆n. Nơ̆r tơ’blŏk adar adeh rơngơp, noh kư̆m tơdrong thuơ răm; phŏ phŏ Kră Yang pơma tơbăt pơma phơ̆t hloi, pơm kơ bơ̆n pŭ iŏk lơ tơdrong pơmat, mălei đĭ đăng noh yua kơ tơdrong ‘mêm Kră Yang ‘măn kơ bơ̆n, Sư wă kơ bơ̆n kơchăng wă kơ bơ̆n tam jah tơbral adrol kơ ưh pă tam. Athei wei tơdrong tơ’bưh ‘lơ̆ng hăm Kră Yang păng ‘bônh kơ hlôh băt hăm dôm nơ̆r Kră Yang khan lăm tơdrong arih bơ̆n, păng athei đĭ jơhngơ̆m tơbral hloi wă kơ huay pŭ iŏk tơdrong pơmat ‘măn kơ bu mă arăng kơ̆l.
Ơ Kră Yang mă ‘mêm, apinh Ih ăn kơ inh ‘bônh kơ hlôh lăm dôm nơ̆r tơ’blŏk ăn, apinh Ih ăn kơ inh tơjur akâu tơbral hloi, rim wơ̆t Kră Yang khă tơbăt, tơ’blŏk gah dôm tơdrong glăi inh. Krao khan yua anăn Kră Yang Yêsu Krist, Amen.
Kră Yang oei tơ’blŏk kơ bơ̆n tơdrong kiơ? Athei sơng iŏk păng jah tơbral.
Đŏk Sơ̆p hla bơar ‘Bok Kei-Dei lăm pêng sơnăm: Jop 12
Kênh Youtube BHKTHN:
