Klei Aê Diê Blŭ: Y-Mathiơ 26:17-25
Êlan kliăng: “Anak Mnuih srăng djiê tui si Klei Aê Diê Blŭ čih leh djŏ kơ Ñu, ƀiădah knap mñai yơh kơ pô lhiăr kơ Anak Mnuih! Jăk hĭn arăng amâo tuôm kkiêng kơ gơ̆ ôh” (Y-Mathiơ 26:24)
Klei êmuh ksiêm mĭn: Ti anôk Khua Yang Yêsu leh anăn phung ƀĭng kna Ñu ƀơ̆ng Knăm Klei Găn? Êjai dôk ƀơ̆ng huă tlam mmăt ya Khua Yang lač kơ phung ƀĭng kna djŏ kơ klei knhal tuč kơ pô lhiăr kơ Ñu? Hruê anei, si Khua Yang hưn êlâo brei drei răng?
Knăm Klei Găn jing hruê knăm prŏng phung Yuđa, grăp boh gŏ huă mprăp mkra sơăi kơ knăm anei, Khua Yang Yêsu leh anăn phung ƀĭng kna Ñu ăt msĕ mơh. Tui si Klei Mrâo Mrang Jăk Y-Luk 22:7-13, Khua Yang Yêsu tiŏ nao Khua ƀĭng kna Y-Pêtrôs leh anăn Y-Yôhan nao êlao mkra sa anôk pioh kơ Khua Yang leh anăn phung ƀĭng kna ƀơ̆ng Knăm Klei Găn. Diñu đuĕ nao tui si klei Khua Yang lač leh, diñu tui hlue sa čô êkei djă bŭ êa, mŭt hlăm sang gơ̆ leh anăn êmuh ti anôk Khua Yang leh anăn phung ƀĭng kna Ñu srăng ƀơ̆ng Knăm Klei Găn. “Leh anăn ñu srăng ktrâo brei kơ diih sa boh adŭ prŏng tal dlông mprăp leh. Tinăn yơh diih mkra” (Y-Luk 22:12).
Mnơ̆ng phung Yuđa ƀơ̆ng hlăm Knăm Klei Găn jing: kpŭng amâo mâo kpei, djam phĭ, kpiê boh kriăk ƀâo. Diñu srăng ruah leh anăn bi mdjiê sa drei êđai biăp ti sang Kkuh mpŭ, mă êrah dưm ti dlông knưl ngă yang, leh anăn ghang jih sa drei biăp hŏng pui, leh anăn dơ̆ng kơ klei ƀơ̆ng huă yơh. Êjai diñu dôk ƀơ̆ng huă, Khua Yang Yêsu lač, “Sĭt nik Kâo lač kơ diih, sa čô hlăm phung diih srăng lhiăr kơ Kâo.” Amâo djŏ Khua Yang Yêsu čŏng čiăng bi hêñ Y-Yuđas Iskariôt ôh, ƀiădah Ñu dôk bi êdah klei khăp leh anăn klei pap kơ gơ̆. Čiăng kơ gơ̆ mdih ai tiê leh anăn thâo kral boh jhat bŏ hŏng klei knap mñai pioh kơ pô hliăr kơ Khua Yang, brei kơ gơ̆ mmông myun kmhal kơ klei soh leh anăn lŏ wĭt. Jih jang phung ƀĭng kna kdjăt snăk leh anăn êmuh kơ Khua Yang Yêsu thâodah diñu pô lhiăr kơ Khua Yang, leh anăn Y-Yuđas Iskariôt ăt êmuh msĕ snăn mơh: “Djŏ mơ̆ kâo, Ơ Nai?” Yêsu lač kơ gơ̆, “Ih pô lač leh klei anăn” (êlan 25), klei Khua Yang Yêsu lŏ wĭt lač lŏ sa blư̆ bi mdih ktang snăk kơ ai tiê Y-Yuđas. Hlăm êlan 24 Khua Yang Yêsu lač hdră bi mtlaih mkra leh – leh anăn srăng bi leh wăt tơdah mâo Y-Yuđas Iskariôt hĕ amâodah hơăi, ƀiădah “knap mñai yơh kơ pô lhiăr kơ Anak Mnuih! Jăk hĭn arăng amâo tuôm kkiêng kơ gơ̆ ôh!” Kyua lhiăr kơ Khua Yang, Y-Yuđas Iskariôt srăng mă tŭ klei bi kmhal bŏ hŏng klei knap mñai snăk. Ƀiădah ênguôt đei, ai tiê Y-Yuđas amâo mâo mgei ôh!
Hruê anei, Khua Yang srăng yua êlan anei amâodah êlan mkăn čiăng brei drei kmhal kơ klei soh drei ngă leh. Tăp năng hŏng klei bi hriăm hŏng asăp êdu, tăp năng hŏng klei amâo mâo boh tŭ ôh hlăm bruă drei ngă, mâo blư̆ Khua Yang mkra mjuăt hŏng klei khăng, brei drei tŭ lu klei knap, ƀiădah jih jang klei anăn kbiă mơ̆ng klei Khua Yang khăp kơ drei sơăi, Ñu čiăng bi êrâo drei brei drei kmhal hĕ mtam kơ klei soh êlâo êgao mmông. Djă pioh bĕ bi jăk klei bi mguôp hŏng Khua Yang leh anăn hmư̆ bĕ mtam klei Ñu blŭ hlăm klei hdĭp drei, leh anăn hŏng jih ai tiê kmhal hĕ mtam kơ klei soh čiăng đăm drei mă tŭ klei knhal tuč bŏ hŏng knap mñai pioh leh kơ phung khăng ai tiê.
Ya klei Khua Yang dôk mñă kơ drei? Mă tŭ bĕ leh anăn kmhal hĕ mtam.
Wah lač: Ơ Khua Yang Pô bŏ hŏng klei khăp, đru kâo djăl hmư̆ klei Ih bi hriăm kâo, đru kâo bi luă gŭ kâo pô leh anăn kmhal hĕ mtam grăp blư̆ Khua Yang ktrâo leh anăn hưn ya klei soh kâo ngă leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
