Klei Aê Diê Blŭ: Klei Mphŭn Dơ̆ng 14:17-24
Êlan kliăng: “Tơdah Y-Abram hmư̆ kơ anak adei ñu jing mnă leh, ñu atăt ba tlâo êtuh pluh sa păn čô ñu bi hriăm leh, phung kkiêng leh hlăm sang ñu, leh anăn tiŏ phung roh truh ti ƀuôn Dan” (Klei Mphŭn Dơ̆ng 14:14)
Klei êmuh ksiêm mĭn: Leh wĭt mơ̆ng klei dưi hŏng klei bi blah, Y-Abram bi tuôm hŏng hlei pô? Hŏng si klei diñu bi tuôm hŏng Y-Abram? Klei Y-Abram ngă hŏng grăp čô mtao lač kơ ya klei? Ya klei hriăm drei mâo mơ̆ng klei Y-Abram bi hmô?
Leh wĭt mơ̆ng klei dưi hlăm klei bi blah hŏng phung mtao ngă klei bi mguôp, arăng drông phung kahan Y-Abram ti Tlung Mtao (êlan 17). Y-Abram bi tuôm hŏng mtao ƀuôn Sôđôm leh anăn mtao ƀuôn Salem jing Y-Mêlkisađek. Hră Klei Aê Diê Blŭ amâo yăl dliê lu ôh kơ mtao ƀuôn Sôđôm ƀiădah čih yăl dliê êlam hĭn kơ mtao ƀuôn Salem snei, “Y-Mêlkisadek jing khua ngă yang kơ Aê Diê, Pô Ti Dlông Hĭn” (êlan 18), jing Aê Diê Pô Y-Abram kkuh mpŭ mơh (êlan 22). Mtao Y-Mêlkisađek jing rup kơ Yang Krist, jing mtao leh anăn khua ngă yang prŏng hlŏng lar (Hêbrơ 7).
Hdră dua čô mtao nao bi tuôm hŏng Y-Abram mdê mdê mơh. Tơdah “Y-Mêlkisađek mtao ƀuôn Salem djă ba mdơ̆ng kpŭng leh anăn kpiê”, bi mtao ƀuôn Sôđôm lĕ nao kngan mang. Êlâo tinăn, hlăm klei bi blah hŏng phung mtao ngă klei bi mguôp čar Mêsôpôtami, mtao ƀuôn Sôđôm amâo mâo dưi ôh leh anăn êran đuĕ. Ngăn drăp, mnơ̆ng ƀơ̆ng huă leh anăn mnuih ƀuôn sang phung dưi plah mă jih. Bi ară anei, Y-Abram dưi leh hŏng phung roh leh anăn sua mă lŏ atăt wĭt phung ƀuôn sang ƀiădah mtao ƀuôn Sôđôm amâo mâo sa bruă ngă klă ôh čiăng bi êdah klei hdơr knga. Năng ai anăn jing knuih sa boh ƀuôn prŏng bŏ hŏng klei soh hdruôm hră Klei Aê Diê Blŭ lač leh êlâo tinăn (Klei Mphŭn Dơ̆ng 13:13). Êjai Mtao ƀuôn Salem hriê hơêč hmưi kơ Y-Abram leh anăn myơr jih klei guh kơang kơ Aê Diê (êlan 19-20a), bi mtao ƀuôn Sôđôm lĕ hriê akâo kơ Y-Abram jao wĭt phung ƀuôn sang kơ ñu (êlan 21). Năng ai ñu huĭ Y-Abram mjhua mmông găl anei srăng plah mă hĕ klei ñu jing mtao!
Klei Y-Abram lŏ wĭt ngă kơ dua čô mtao anei mdê mdê mơh. Kơ Mtao Y-Mêlkisađek, Y-Abram mă tŭ klei hơêč hmưi leh anăn myơr sa kdrêč hlăm pluh jih jang mnơ̆ng ñu plah mă leh kơ mtao hŏng klei gơ̆ jing sa čô khua ngă yang kơ Aê Diê, bi êdah kơ Y-Abram hdơr knga leh anăn myơr jih jang klei guh kơang kơ Aê Diê kyua klei ñu dưi leh. Bi kơ mtao ƀuôn Sôđôm, Y-Abram blŭ klă ñu amâo mă sa mta ôh dŏ mtao, wăt sa mnơ̆ng điêt dhiêt kăn ñu mă rei huĭdah mtao lač ñu mdrŏng kyua mtao ƀuôn Sôđôm (êlan 23).
Mâo lu mnuih dưi hŏng jih jang bruă dleh dlan hlăm klei hdĭp ƀiădah êdei tinăn ñu lĕ tơdah dôk dơ̆ng ti anăp klei mnuih mkăn bi mni, dôk ti anăp klei mplư kơ klei hing ang leh anăn mnơ̆ng mnuă. Dưi lač klei klei bi blah hŏng klei mplư leh mâo klei dưi leh jing ktang hĭn kơ klei bi blah hŏng phung roh amâodah hŏng klei dleh dlan. Tui knuih Y-Abram, akâo Khua Yang đru drei leh grăp blư̆ drei dưi brei drei myơr jih jang klei guh kơang kơ Aê Diê leh anăn hngah hĕ jih jang klei iêo jak mơ̆ng lăn ala soh jhat anei.
Ya drei srăng ngă leh grăp blư̆ drei mâo klei dưi Khua Yang brei?
Wah lač: Ơ Khua Yang, bi mni kơ Ih kyuadah Ih jing Pô brei klei dưi kơ hlei pô knang kơ Ih. Đru kâo thâo luă gŭ, thâo myơr jih klei guh kơang kơ Ih. Brei kâo hngah khut khat kơ klei mplư djŏ kơ klei hing ang, klei tŭ dưn, klei dưi hlăm lăn ala anei, leh anăn duah klei mưn hlŏng lar Ih brei brei hlăm Ƀuôn Jăk Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
