Mathais 5:14-16
Nqe cim zaj kawm:
“Ib yam li ntawd, nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej.” (Mathais 5:16)
Lus nug xav:
– Tswv Yexus siv ob daim duab pivtxwv twg los qhia txog txojkev kaj?
– Vajtswv cov menyuam yuav tsum ci qhia tshwm tus Tswv txojkev ncaj ncees hauv ntiajteb li cas?
– Lub homphiaj uas peb ci kaj yog dabtsi?
Tswv Yexus tabtom qhia cov neeg uas raws Nws qab. Tus Tswv muab Vajtswv cov menyuam piv rau “lub teeb uas ci rau neeg ntiajteb pom kev” (nqe 14). Nws siv ob daim duab pivtxwv uas yoojyim to taub los qhia, uas yog: ib lub nroog uas nyob saum roob thiab ib lub teeb uas txawb rau saum tus ncej txawb teeb (nqe 15). Lub nroog uas nyob saum roob thaum tseem nyob deb sawvdaws twb saib pom lawm. Lub teeb tsis muaj leejtwg taws cig lawm ho muab phiab khwb rau, tiamsis yuav tsum muab txawb rau ntawm qhov chaw uas ci tau rau sawvdaws pom kev. Ob daim duab pivtxwv no ceeb toom peb hais tias peb txojkev ntseeg tsis yog yuav khaws zais lossis npog cia xwb; tiamsis yuav tsum qhia tshwm kom sawvdaws pom.
Qhov kaj kuj ci qhia qhov tseeb thiab nthuav tej uas muab zais cia kom tshwm los. Thaum qhov kaj los txog, nws yuav ntiab qhov tsaus ntuj mus. Yog li ntawd, thaum Vajtswv cov menyuam yog “lub teeb,” lawv yuav tsum ci qhia tshwm tus Tswv txojlus tseeb thiab txojkev ncaj ncees. Qhov no txhais hais tias, thaum peb ua neej ncaj ncees thiab ua neej zoo, peb tabtom qhia tshwm Vajtswv tus yamntxwv. Nyob hauv lub ntiajteb uas tibneeg feem coob txuas tes nrog kev txhaum, ces qhov uas Pawg Ntseeg ua neej ncaj ncees yuav qhia tshwm tau tseeb meej heev. Tej zaum sawvdaws yuav tsis thoojyim rau peb txhua lub sijhawm, tiamsis lawv yeej yuav pom tias muaj ib yam txawv ntawm peb. Tsis tas li ntawd xwb, qhov kaj kuj ua rau muaj kev sov siab thiab kev taw qhia. Tej haujlwm zoo, muaj siab hlub tshua thiab khuvleej kuj ci ntsa iab thiab ua rau coob leej pom. Thaum peb paub zam txim, nqis tes pab thiab mob siab rau lwm tus, ces peb tabtom qhia tshwm Vajtswv txojkev ncaj ncees thiab txojkev hlub.
Tswv Yexus qhia meej txog lub homphiaj uas peb yuav tsum ci kaj. Nws hais tias: “Nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej” (nqe 16). Lub homphiaj tsis yog kom lwm tus tig los saib thiab qhuas peb, tiamsis yog coj lwm tus los cuag tus Tswv. Peb lub neej yuav dhau los ua ib lo lus timkhawv, kom Vajtswv tau koob meej. Pawg Ntseeg yuav tsum ci qhia tshwm tus Tswv txojkev ncaj ncees thiab txojkev hlub rau hauv ntiajteb. Tej zaum vim peb ntshai tsam tej phooj ywg tsis nrog peb ua si, ntshai tsam luag thuam lossis cem peb, ces peb ho xaiv nyob twj ywm lossis ua raws li sawvdaws, tsis kam qhia tshwm qhov kaj cawm dim. Nyob ntawm no, Tswv Yexus ceeb toom peb hais tias qhov uas zais qhov kaj yuav ua rau peb plam lub homphiaj ntawm qhov kaj.
“Ua lub teeb” tsis txhais hais tias peb twb zoo tag nrho lawm. Tiamsis txhais hais tias peb txaus siab cia Tswv Yexus ci ntsa iab dhau ntawm peb lub neej hauv txhua yam haujlwm txhua hnub. Vajtswv cov menyuam hauv Pawg Ntseeg yuav tsum paub meej tias yus yog qhov kaj rau neeg ntiajteb, thiab Pawg Ntseeg yuav tsum zoo li lub teeb ntawm ntug hiavtxwv, ci qhia kev kom coj tau cov neeg uas mus yuamkev los cuag tus Tswv.
Thov Vajtswv,
Tus Tswv, thov Koj ceeb toom nyuam yaus kom nco ntsoov tias nyuam yaus yog qhov kaj thiab yuav tsum ci qhia tshwm Koj txojkev ncaj ncees thiab txojkev hlub rau hauv ntiajteb. Thov pab kom nyuam yaus koom tes nrog Pawg Ntseeg, ua qhov kaj uas coj coob leej los cuag tus Tswv. Nyuam yaus tuav Tswv Yexus Khetos lub npe thov, Amees.
Peb tabtom ci qhia dabtsi rau neeg ntiajteb dhau ntawm peb txojkev ua neej txhua hnub?
Nyeem Vajluskub hauv peb lub xyoos: Yauj 6
Kênh Youtube BHKTHN:
