Yausuas 7:5-9
Nqe cim:
“Kuv ntshai thiab xav hais tias nws ntiab kuv tawm ntawm nws lub xubntiag mus lawm. Tiamsis nws tseem hnov kuv lub suab quaj, thaum kuv thov nws pab.” (Ntawv Nkauj 31:22)
Lus nug xav:
– Yausuas ua li cas thaum uas lawv swb rog?
– Koj xav li cas txog Yausuas tej lus thov Vajtswv?
– Thaum ntsib kev swb tsam, kev sim siab, yog tsis pom Vajtswv kev pab cawm peb yuav ua li cas?
Tom qab uas cov Yixayees swb rog ntawm lub nroog A-is, lawv qaug zog thiab ntshai kawg nkaus, Yausuas los kuj puv nkaus kev chim siab thiab kev ntshai. Yausuas thiab cov Yixalayees cov thawjcoj dua lawv tej tsho thiab nyuaj siab kawg, lawv txhos caug khoov ti nkaus hauv av tabmeeg tus TSWV lub Phijxab ib hnub tsaus ntuj, lawv tsuab hmoov av rau saum lawv taubhau qhia hais tias lawv nyuaj siab kawg li.
Hauv txoj kev nyuaj siab ntawd, Yausuas thov Vajtswv peb yam: Tim ib, vim li cas tus Tswv yuav coj Nws haivneeg hla tus dej Yauladees los cob rau cov Amaules txhais tes kom lawv raug puastsuaj tas? Tim ob, cov tubrog Yixalayees raug yeebncuab tua swb thim rov los lawm, Yausuas yuav hais li cas rau lawv? Yav tas los tus Tswv tau coglus “Kuv yuav ua rau cov neeg uas thaiv nej kev kom lawv ntshai kuv; kuv yuav coj kev ntxhov siab los rau cov neeg uas nej yuav mus tua ntawd thiab kuv yuav ua kom nej cov yeebncuab khiav tawm ntawm nej mus” (Khiavdim 23:27), cov Kana-as thiab tej neeg uas nyob hauv lub tebchaws no yuav hnov tej xwm no, lawv yuav tuaj vij thiab muab Vajtswv haivneeg txhua tus tua huv tibsi (nqe 9). Tim peb, tus Tswv yuav ua li cas kom Nws lub npe thiaj tsis raug luag txob thuam vim Nws haivneeg? Yausuas ntseeg hais tias Vajtswv yog tus uas muaj hwjchim loj kawg nkaus, qhov uas lawv swb rog yeej yog Nws pom zoo. Vim li ntawd, Yausuas taij thov Vajtswv hais tias vim Vajtswv lub npe thov cawm Cov Yixalayees.
Txawm yog ib tug thawjcoj uas hlub thiab hwm Vajtswv los Yausuas yeej zam tsis dhau qhov uas ua yuam kev. Txawm twb pom Vajtswv ua txujci pab lawv hla dhau tus dej Yauladees thiab kovyeej lub nroog Yelikaus lawm los Yausuas kuj zam tsis dhau kev ntshai, kev ua xyem xyav txog Vajtswv txoj kev tiv thaiv, kev hlub uas pub rau nws thiab cov Yixalayees. Tsimnyog Yausuas yuavtsum thov kom Vajtswv qhia tawm nws thiab cov pejxeem qhov kev uas tau ua yuam kev lawm, tiamsis nws tseem rov nug thiab yws Vajtswv. Nws tsis totaub Vajtswv txojkev. Nws tsis paub hais tias vim dabtsi cas zoo li tus Tswv tsis ua raws li tus Tswv tej lus cogtseg lawm, vim lub sijhawm no Yausuas tsis tau paub dabtsi txog Akhas txoj kev txhaum. Txawm li ntawd los, thaum ntsib kev kub ntxhov, Yausuas thiab cov thawjcoj tseem qhia tshwm lawv txoj kev ntseeg, tig los cuag Vajtswv, qhib lawv lub siab rau Nws, thiab thov Nws txoj kev hlub tshua. Vim li ntawd, Vajtswv tus uas puv npo kev hlub tshua thiaj taw qhia Yausuas kev los daws qhov teebmeem ntawd.
Yuav muaj tej lub sijhawm uas peb pom peb nyob rau hauv lub tsam thawj tas kev cia siab, thiab yuav nug ntau lo lus nug hais tias “vim li cas?” peb kuj yuav pib ua xyem xyav txog Vajtswv txoj kev hlub. Thaum ntawd peb tsis txhob tso Vajtswv tseg, cia li los cuag Vajtswv, qhib peb lub siab rau Nws, thov Vajtswv qhia peb txog tej kev ua yuam kev uas peb tseem tsis tau paub, lees peb tej kev txhaum thiab thov Vajtswv zam txim, rau qhov Nws yeej tsis tso peb tseg li.
Thov Vajtswv,
Tus Tswv, thov Koj pab kom nyuam yaus tsis txhob hnov qab txhua yam zoo uas Koj tau ua rau nyuam yaus. Thaum nyuam yaus ntsib teebmeem lossis kev txomnyem, thov pab kom nyuam yaus pheej tso siab rau Koj txoj kev hlub thiab tos ntsoov Koj txoj kev pab kev coj. Nyuam yaus tuav Tswv Yexus Khetos lub npe thov, Amees.
Puas muaj tej thaum uas peb ua xyem xyav rau Vajtswv kev hlub? Thaum ntawd peb yuav ua li cas?
Nyeem Vajluskub hauv peb lub xyoos: 2 Kauleethaus 9
Kênh Youtube BHKTHN:
