Klei Aê Diê Blŭ: I Kôrantô 7:25-40
Êlan kliăng: “Kâo čiăng kơ diih jing êngiê mơ̆ng klei ênguôt hnĭng. Êkei hliê uêñ kơ bruă Khua Yang, čiăng dưi bi mơak kơ Khua Yang.” (I Kôrantô 7:32)
Klei êmuh ksiêm mĭn: Ya mta phŭn Khua ƀĭng kna Y-Pôl hưn mdah kơ bruă dôk hliê jing jăk hĭn kơ dôk ung, mô̆? Hlăm klei ksiêm dlăng kơ hruê knhal tuč, si klei ñu lač kơ bruă dôk hliê? Ya klei hriăm mñă kơ drei?
Hlăm trăn Klei Aê Diê Blŭ hruê anei, Khua ƀĭng kna Y-Pôl bi trông kơ bruă mnuih dôk hliê, ka dôk ung, mô̆ wăt phung bi lui leh ung mô̆, amâodah ung, mô̆ djiê leh, mnuih dôk hliê mda asei leh anăn wăt phung khua thŭn hĭn. Ăt djă pioh klei mĭn dôk hliê jing sa klei hrŏng ruah jăk siam, boh nik brei mđĭ ai, ñu lač klei jăk siam bruă dôk hliê mâo mơ̆ng dua mta phŭn: tal sa, “mâo ênuk dleh anei” (êlan 26), leh anăn tal dua, “ênuk drei dôk hdĭp amâo sui ôh…, kyudah lăn ala anei dơ̆ng êgao tuč”(êlan 29, 31). Dua pruê̆ blŭ anei brei ƀuh hdĭp dôk hliê jing sa klei ruah jăk kyua klei mjêč ruăt mơ̆ng dŭm hruê knhal tuč.
Hlăm klei dlăng kơ hruê knhal tuč, dôk hliê jing jăk, kyua hlăk anăn pô ruah hdĭp dôk hliê srăng ƀuh êngiê kơ dŭm “klei dleh dlan kơ kđeh asăr” čiăng mâo kluôm hruê mmông leh anăn ai tiê klei mĭn mă bruă kơ Aê Diê. Lač mkăn, klei ñu lač jing mâo leh gŏ sang snăn mâo bruă klam bi mơak kơ ung, mô̆ jing bruă brei ngă. Lui tha mô̆ anak mă anăn mă bruă kơ Aê Diê jing amâo djŏ Klei Aê Diê Blŭ mtô ôh. Kyua anăn, êlan “Mơ̆ng anei kơ anăp, phung mâo mô̆ leh brei dôk hdĭp msĕ si diñu amâo mâo mô̆” (êlan 29) brei dưi dlăng hlăm mtô mñă mơ̆ng kluôm Klei Aê Diê Blŭ. Brei thâo săng phung mâo gŏ sang brei mâo klei bi ktlah kơ ai tiê hŏng klei rŭng răng đei kơ klei hdĭp anei. Brei diñu khăp leh anăn kriê dlăng gŏ sang pô, ƀiădah amâo brei ôh klei anăn mâo kluôm hlăm ai tiê klei mĭn leh anăn hruê mmông kơ klei kñăm yuôm bhăn hĭn jing hdĭp bi mơak kơ Aê Diê. Kơ klei anei, mnuih dôk hliê mâo “mmông wăn” hĭn, “amâo rŭng răng kơ ya klei ôh”, mơ̆ng anăn mâo lu hruê mmông čiăng “uêñ kơ bruă Khua Yang, čiăng dưi jing doh jăk hlăm asei mlei leh anăn mngăt” (êlan 32, 34). Snăn, mnuih dôk hliê “amâo mâo klei mĭn bi mbha ôh hlăm bruă ngă kơ Khua Yang” (êlan 35). Kyua anăn, Khua ƀĭng kna Y-Pôl mtă kơ pô ka dôk ung, mô̆ leh anăn ka mâo klei kuôl kă hŏng hlei pô brei lŏ dơ̆ng dôk snăn jing jăk, bi phung djiê ung snăn êngiê lŏ dôk ung amâodah hơăi, ƀiădah ñu mtă brei dôk snăn. Bruă dôk snăn kyua klei kñăm yuôm bhăn mâo Khua ƀĭng kna Y-Pôl lač jing “mâo klei jăk mơak hĭn” (êlan 40).
Hlăm boh klei hruê anei, klei hriăm mñă kơ drei đăm dlăng ôh bruă mkŏ mjing gŏ sang jing tŭ jing, bi hdĭp dôk hliê jing amâo tŭ jing. Hlăm klei mngač mơ̆ng Klei Aê Diê Blŭ, pô dôk ung, mô̆ amâodah dôk hliê jăk mơak sơăi hlăm ală Khua Yang. Klei yuôm bhăn hĭn jing grăp čô wăt tơdah si jing snăn ăt brei mđing hdĭp myơr jih kơ Khua Yang, boh nik hlăm hruê mmông bhiâo riâo rit hlăm dŭm hruê knhal tuč anei.
Drei khăng mtrŭt kpĭ anak čô pô dôk ung, mô̆ hlue si klei pô čiăng mơ̆?
Wah lač: Ơ Khua Yang, akâo kơ Ih đru kâo amâo mtrŭt anak čô, ƀĭng găp dôk hliê pô dôk ung, mô̆ čiăng kơ digơ̆ amâo mâo klei ktrŏ ôh. Akâo kơ Khua Yang đru kâo đru kơ pô mkăn duah klei Khua Yang čiăng hlăm klei bi dôk ung, mô̆ digơ̆. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
